Read Bibliya Yera 1951 2 Abami 15 Bible Online

2 Abami 15 - Bibliya Yera 1951 bible

2 Abami 15

¹Mu mwaka ugira mirongwibiri n’indwi Yerobowamu umwami w’Abisirayeli ari ku ngoma, Uziya mwene Amaziya umwami w’i Buyuda ni ho yima.

²Yagiye ku ngoma amaze imyaka cumi n’itandatu, ayimarakw imyaka mirongwitanu n’ibiri i Yerusalemu; nyina yitwa Yekoliya w’i Yerusalemu nyene.

³Akora ivyo Uhoraho abona kw ari vyiza, nk’ivyo se Amaziya yakoze vyose.

⁴Mugabo ibitabo vyo ku mpinga z’imisozi ntivyakūrwaho; abantu bari bagitangira ibimazi mur’ ivyo bitabo, bakahosereza imibavu.

⁵Hanyuma Uhoraho atēza umwami imibembe, arinda atanga akir’ umunyamibembe, aba mu nzu ya wenyene; maze Yotamu umwana wiwe ni we yagaba ivyo mu rugo, agacira abantu bo mu gihugu imanza.

⁶Nukw ibindi vyose vyadonzwe kuri Uziya, n’ivyo yakoze vyose, none ntivyanditswe mu gitabo c’ivyo ku ngoma z’abami b’Abayuda?

⁷Nuko Uziya ahamvya ba sekuruza, bamuhamba hamwe na bo ku murwa wa Dawidi; maz’ uwo muhungu wiwe Yotamu asubira ku ngoma yiwe.

⁸Mu mwaka ugira mirongwitatu n’umunani Uziya umwami w’i Buyuda ari ku ngoma, ni ho Zekariya mwene Yerobowamu yima i Samariya mu Bisirayeli; amara amezi atandatu ari ku ngoma.

⁹Akora ivyo Uhoraho abona kw ari bibi, nk’uko ba sekuruza bākora, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

¹⁰Maze Shalumu mwene Yabeshi aramugarariza, amugurukirakw imbere y’abantu, aramwica, asubira ku ngoma yiwe.

¹¹Nukw ibindi vyose vyadonzwe kuri Zekariya vyanditswe mu gitabo c’ivyo ku ngoma z’abami b’Abisirayeli.

¹²Vyabaye nk’ukw ijambo Uhoraho yari yarabariye Yehu ryāvuze, rit’ Abana bawe bazokomeza ku ngoma mu Bisirayeli gushitsa ku mwuzukururuza wawe. Nuko birashika.

¹³Mu mwaka ugira mirongwitatu n’icenda Uziya umwami w’i Buyuda ari ku ngoma, ni ho Shalumu mwene Yabeshi yima; amara ukwezi kumwe i Samariya ari ku ngoma.

¹⁴Maze Menahemu mwene Gadi ava i Tirusa, aradūga aja i Samariya, amutsindaho aramwica, asubira ku ngoma yiwe.

¹⁵Ibindi vyose vyadonzwe kuri Shalumu, n’ingene yagararije, vyanditswe mu gitabo c’ivyo ku ngoma z’abami b’Abisirayeli.

¹⁶Menahemu araheza atera i Tifusa, arahatsinda, ageseza n’ abari mur’ ico gisagara bose, anesha n’intara yaco uhereye i Tirusa nyene; icatumye ahageseza n’uko banse kumwugururira amarembo; nukw afomoza abagore bose bafise inda bari muri co.

¹⁷Mu mwaka ugira mirongwitatu n’icenda Uziya umwami w’ Abayuda ari ku ngoma, ni ho Menahemu mwene Gadi yima mu Bisirayeli; amara imyaka cumi i Samariya ari ku ngoma.

¹⁸Akora ivyo Uhoraho abona kw ari bibi, ntiyigeze ava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

¹⁹Bukeye Puli umwami w’i Ashuri atera igihugu; maze Menahemu amuhongera italanto z’ifeza igihumbi, kugira ngo buzure, amuhagarikire, ahangame ku ngoma yiwe.

²⁰Kand’ ayo mahera Menahemu yari yayatoje mu Bisirayeli, mu bantu b’abatunzi, umuntu wese yari yamutoje shekeli mirongwitanu, ngw ayahe umwami w’i Ashuri. Nuk’ uwo mwami w’i Ashuri arahindukira, ntiyaguma mur’ ico gihugu.

²¹Non’ ibindi vyose vyadonzwe kuri Menahemu, n’ivyo yakoze vyose, mbega ntivyanditswe mu gitabo c’ivyo ku ngoma z’abami b’Abisirayeli?

²²Nuko Menahemu ahamvya ba sekuruza, maz’ umuhungu wiwe Pekahiya asubira ku ngoma yiwe.

²³Mu mwaka ugira mirongwitanu Uziya umwami w’Abayuda ari ku ngoma, ni ho Pekahiya mwene Menahemu yima i Samariya mu Bisirayeli; amara imyaka ibiri ari ku ngoma.

²⁴Akora ivyo Uhoraho abona kw ari bibi, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

²⁵Bukeye Peka mwene Remaliya, umugabisha wiwe, afatanya n’ Abanyegileyadi mirongwitanu, aramugarariza, amwicana na Arugobi na Ariyeha, abatsinda i Samariya mu munara wo mu rugo i bgami; nukw amaze kumwica asubira ku ngoma yiwe.

²⁶Nukw ibindi vyose vyadonzwe kuri Pekahiya, n’ivyo yakoze vyose, vyanditswe mu gitabo c’ivyo ku ngoma z’abami b’Abisirayeli.

²⁷Mu mwaka ugira mirongwitanu na kabiri Uziya umwami w’i Buyuda ari ku ngoma, ni ho Peka mwene Remaliya yima i Samariya mu Bisirayeli; amara imyaka mirongwibiri ari ku ngoma.

²⁸Akora ivyo Uhoraho abona kw ari bibi, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

²⁹Kandi ku ngoma ya Peka umwami w’Abisirayeli, Tigulati‐pileseri umwami w’i Ashuri araza, atera ahitwa Iyoni n’i Abeli‐beti‐mayaka, n’i Yanowa n’i Kedeshi, n’i Hasori n’i Gileyadi, n’i Galilaya n’igihugu cose c’i Nafutali; abantu baho abajana i Ashuri ar’ inyagano.

³⁰Hanyuma Hosheya mwene Ela agarariza Peka mwene Remaliya, amutsindaho aramwica, asubira ku ngoma yiwe; hāri mu mwaka ugira mirongwibiri Yotamu mwene Uziya ari ku ngoma.

³¹Ibindi vyose vyadonzwe kuri Peka, n’ivyo yakoze vyose, vyanditswe mu gitabo c’ivyo ku ngoma z’abami b’Abisirayeli.

³²Mu mwaka ugira kabiri Peka mwene Remaliya umwami w’Abisirayeli ari ku ngoma, ni ho Yotamu mwene Uziya, umwami w’i Buyuda, yima.

³³Yar’ amaze imyaka mirongwibiri n’itanu igihe yima; amara imyaka cumi n’itandatu i Yerusalemu ari ku ngoma. Nyina yitwa Yerusha, umukobga wa Sadoki.

³⁴Akora ivyo Uhoraho abona kw ari vyiza, nk’ ivyo se Uziya yakoze vyose.

³⁵Mugabo ibitabo vyo ku mpinga z’imisozi ntivyakūrwaho; abantu bāri bagitangira ibimazi mur’ ivyo bitabo, bakahosereza imibavu. Yotamu ni we yubatse ikirimba co haruguru ku ngoro y’ Uhoraho.

³⁶Nukw ibindi vyose vyadonzwe kuri Yotamu, n’ivyo yakoze vyose, none ntivyanditswe mu gitabo c’ivyo ku ngoma z’abami b’i Buyuda?

³⁷Mur’ ico gihe ni ho Uhoraho yatangura kugomora Rezini umwami w’i Siriya na Peka mwene Remaliya kurwanya Abayuda.

³⁸Maze Yotamu ahamvya ba sekuruza, ahambga hamwe na bo ku murwa wa sekuruza Dawidi; maz’ umuhungu wiwe Ahazi asubira ku ngoma yiwe.