Read Bibliya Yera 1951 2 Abami 18 Bible Online

2 Abami 18 - Bibliya Yera 1951 bible

2 Abami 18

¹Mu mwaka ugira gatatu Hoseya mwene Ela, umwami w’Abisirayeli ari ku ngoma, ni ho Hezekiya mwene Ahazi, umwami w’i Buyuda, yima.

²Yar’ amaze imyaka mirongwibiri n’itanu igihe yima, amara imyaka mirongwibiri n’icenda i Yerusalemu ari ku ngoma; nyina yitwa Abi, umukobga wa Zekariya.

³Akora ivyo Uhoraho abona kw ari vyiza, nk’ ivyo sekuruza Dawidi yakoze vyose.

⁴Akūrah’ ibitabo vyo ku mpinga z’imisozi, amenagura amabuye bāshinze, atemagura inkingi bāshingiye Ashera; amenagura igishushanyo c’inzoka Mose yacuze mu muringa; kuko gushitsa ico gihe Abisirayeli bācosereza imibavu; bācita Nehushitani.

⁵Hezekiya yizigira Uhoraho Imana y’Abisirayeli; kandi mu bami bose b’i Buyuda bāmuherukiye nta wahwanye na we, no mu bāmwitangiye imbere;

⁶kuko yifatanije n’Uhoraho akaramata, ntākevye ngw areke kumukurikira, arikw akitondera ivyagezwe Uhoraho yageze Mose.

⁷Kand’ Uhoraho yabana na we, akagira ukuboko kwiza aho yaja hose. Bukeye agarariza umwami w’i Ashuri, ntiyaba akimusaba.

⁸Atera Abafilisitiya ukarinda ushitsa i Gaza n’intāra yaho, uhereye ku minara y’abarinzi ugashitsa ku bisagara bizitijwe inzitiro.

⁹Mu mwaka ugira kane umwami Hezekiya ari ku ngoma, ari wo mwaka ugira indwi wo ku ngoma ya Hoseya mwene Ela, umwami w’Abisirayeli, Shalumaneseri umwami w’i Ashuri aradūga, atera i Samariya, arahugariza.

¹⁰Maze hashize imyaka itatu barahanesha; i Samariya hāneshejwe mu mwaka ugira gatandatu Hezekiya ari ku ngoma, ari wo mwaka ugira icenda wo ku ngoma ya Hoseya umwami w’ Abisirayeli.

¹¹Umwami w’i Ashuri araheza ajana Abisirayeli ar’ inyagano, abajana muri Ashuri, abashira i Hala no kuri Habori, uruzi rw’i Gozani, no mu bisagara vy’Abamedi;

¹²ivyo vyabaye kukw Abisirayeli batumviye Uhoraho Imana yabo, ariko bakava mw isezerano ryiwe, mu vyo Mose umusavyi wiwe yabageze vyose; bakanka kuvyumvira ngo babikore.

¹³Mu mwaka ugira icumi na kane umwami Hezekiya ari ku ngoma, Senakeribu umwami w’i Ashuri yaradūze, atera ibisagara vyose vyubakiwe inzitiro vy’i Buyuda, arabitsinda.

¹⁴Maze Hezekiya umwami w’i Buyuda atuma ku mwami w’i Ashuri i Lakishi, ut’ Arazi ko yakoze nabi; uti Non’ arakwisavye, umureke usubire i wawe; ut’ Ivyo umucira vyose azobitanga. Nuk’ umwami w’i Ashuri acira Hezekiya umwami w’i Buyuda italanto z’ifeza amajana atatu n’italanto z’izahabu mirongwitatu.

¹⁵Hezekiya amuha amafeza yose yari mu ngoro y’Uhoraho, n’ayari mu ngoro yiwe ubgiwe.

¹⁶Mur’ ico gihe Hezekiya umwami w’i Buyuda yomorora izahabu ku nzugi z’urusengero rw’ Uhoraho n’izo ku nkingi yari yarometseko, aziha umwami w’i Ashuri.

¹⁷Bukeye umwami w’i Ashuri atuma Tarutani na Rabusarisi na Rabushake, bava i Lakishi bajanye ingabo nyinshi, ngo baje ku mwami Hezekiya i Yerusalemu. Nuko baradūga baja i Yerusalemu nyene. Bashitseyo bahagarara ku mugende wo ku kidengeri co haruguru, ku nzira yo ku kibuga c’umumesuzi.

¹⁸Maze bahamagaje umwami, haca haza umuzezwarugo wiwe Eliyakimu mwene Hilukiya, n’umukarani Shebuna, n’umwanditsi w’ivyaja biraba yitwa Yowa mwene Asafu, barenga irembo barabasanganira.

¹⁹Rabushake arababarira, ati Ni mubarire Hezekiya, mut’ Uku ni k’ umwami ahambaye, ni we mwami w’i Ashuri, agize: ngo Mbeg’ ivyo vyizigiro wizigiye n’ibiki?

²⁰Muti K’uvuze ng’ ufise inama n’inkomezi zo kurwana, ariko n’ amagambo y’impfagusa! Muti Mbeg’ uwo wishimiye ni nde, yatumye umugarariza?

²¹Mut’ Erega wishimiye ya nkoni y’irenga rivunitse, ni ryo Egiputa, umuntu yoryishimikiza, ryomutobekeranya ikiganza. Mut’ Uko ni ko Farawo umwami wa Egiputa amerera abamwishimiye bose.

²²Naho mwomubarira ko mwishimiye Uhoraho Imana yanyu: none si yo Hezekiya yakūyeh’ ibitabo vyayo n’ibicaniro vyayo, akabarira Abayuda n’ab’i Yerusalemu, ati Muze musengere imbere y’iki gicaniro i Yerusalemu?

²³Muti None rero, enda shinga na shebuja umwami w’i Ashuri; muti Na we Rabushake araguha amafarasi ibihumbi bibiri, namba nawe ubgawe woshobora kuronka abo uyūriza.

²⁴Muti None se woshobora ute gukora mu maso y’umugabisha n’umwe wo mu basavyi ba shebuja bo hanyuma y’abandi, mut’ Asangw’ ar’ ukwishimira Abanyegiputa kw ari bo bazoguha imikogote ikwegwa n’ amafarasi n’abo kuyagenderako?

²⁵Muti Mbega yadūze gutera aha hantu no kuharandura, atari kubg’ Uhoraho? Mut’ Ereg’ Uhoraho ni we nyene yamubariye, ati Dūga utere ico gihugu, ukirandure.

²⁶Maze Eliyakimu mwene Hilukiya, na Shebuna na Yowa, bishura Rabushake, bat’ Enda se turakwinginze, utubarire mu Gisiriya kuko tucumva; ariko nta co utubaririra mu Kiyuda mu matwi y’aba bantu bari hejuru ku ruzitiro rw’amabuye.

²⁷Ariko Rabushake arabishura, ati Mbeg’ ugira ngo databuja yantumye kuri shobuja namwe gusa kubabgira aya majambo? Ntiyantumye kur’ aba bagabo bicaranye namwe hejuru ku ruzitiro, kugira ngo barīre amavyi yabo hamwe n’ayo basōvye?

²⁸Maze Rabushake arahagarara, avuga n’ijwi rirenga mu rurimi rw’Ikiyuda, ati Ni mwumve ijambo ry’umwami ahambaye, ni we mwami w’i Ashuri.

²⁹Uku ni k’umwami agize, ngo Hezekiya ntabahende; ngo Kukw atazoshobora kubakiza ngo ntimukorokere mu maboko yiwe.

³⁰Ngo Kandi Hezekiya ntabizigize Uhoraho, ababarira, ng’ Uhoraho ntazobura kubakiza, kandi ng’ Uyu murwa ntuzotangwa ng’ ukorokere mu maboko y’umwami w’i Ashuri.

³¹Ntimwumvire Hezekiya: kuk’ ukw ari k’umwami w’i Ashuri agize, ngo Kunda mwuzure na we, musokoroke muje iy’ ari, umuntu wese ngw abone kurya ku muzabibu wiwe no ku musukoni wiwe, no kunywa ku mazi yo mw ivomo ryiwe,

³²ngo Gushitsa igihe azozira akabajana mu gihugu gihwanye n’icanyu, igihugu c’ ingano na vino, igihugu c’indya n’inzabibu, igihugu c’amavuta ya clayo n’ubūki, kugira ngo mubone kubaho, ntimupfe; kandi ntimuze mwumvire Hezekiya ni yabahenda, avuga ng’ Uhoraho azobakiza.

³³Mbega mu mana z’abanyamahanga hari n’imwe yigeze gukiza igihugu cayo ngo ntigikorokere mu maboko y’umwami w’i Ashuri?

³⁴Ngo Mbeg’ imana z’i Hamati n’izo muri Arupadi ziri hehe? Imana z’i Sefaravayimu n’iz’ i Hena n’iz’ i Iva ziri hehe? Ngo Mbega zarakijije Samariya ngo ntihakorokere mu maboko yiwe?

³⁵Ngo N’izihe mu mana zose zo mur’ ivyo bihugu zākijije igihugu cazo ngo ntigikorokere mu maboko yiwe, ng’Uhoraho na we akize Yerusalemu ngo ntihakorokere mu maboko yiwe?

³⁶Maz’ abantu barihorera, ntibamwishura ijambo na rimwe, kukw ijambo ry’umwami ryari ryavuze, ngo Ntimugire ico mumwishura.

³⁷Hanyuma wa muzezwarugo Eliyakimu mwene Hilukiya, n’umukarani Shebuna, n’ umwanditsi w’ivyaja biraba yitwa Yowa mwene Asafu, baza kuri Hezekiya bitantamuriyekw impuzu zabo, bamudondera amagambo ya Rabushake.