Read Bibliya Yera 1951 2 Abami 2 Bible Online

2 Abami 2 - Bibliya Yera 1951 bible

2 Abami 2

¹Igihe Uhoraho yagomba kujana Eliya mu gashururu ngw amudūgane mw ijuru, Eliya na Elisa bāri mu nzira bava i Gilugali.

²Maze Eliya abarira Elisa, at’ Enda sigara hano, kuk’ Uhoraho antumye i Beteli. Elisa aramwishura, ati Ndahiye uguhoraho kw’Uhoraho, nawe nyene ndakurahiye, sintandukana nawe. Nuko baramanuka baja i Beteli.

³Bashitseyo, abīgishirizwa i Beteli ivy’ ukuvugishwa baza gusanganira Elisa, baramubaza, bati Harya urazi yuk’ uyu musi Uhoraho agiye kukwaka shobuja? Arabishura, at’ Ego me ndabizi, ariko ni mupfe gucereza.

⁴Maze Eliya yongera kumubarira, at’ Enda rero Elisa, sigara hano, kuk’ Uhoraho antumye i Yeriko. Aramwishura, ati Ndahiye uguhoraho kw’Uhoraho, nawe nyene ndakurahiye, sintandukana nawe. Nuko baja i Yeriko.

⁵Bashitseyo, abīgishirizwa i Yeriko ivy’ ukuvugishwa baza kuri Elisa baramubaza, bati Harya urazi yuk’ uyu musi Uhoraho agiye kukwaka shobuja? Arabishura, at’ Ego me ndabizi, ariko ni mupfe gucereza.

⁶Eliya yongera kumubarira, at’ Enda sigara hano, kuk’ Uhoraho antumye kuri Yorodani. Na we aramwishura, ati Ndahiye uguhoraho kw’Uhoraho, nawe nyene ndakurahiye, sintandukana nawe. Nuko bompi barajana.

⁷Maz’ abantu mirongwitanu mu biga ivy’ ukuvugishwa baragenda bahagarara kure aharābana na bo, abo bompi bagihagaze kuri Yorodani.

⁸Maze Eliya yābīra umutamana wiwe, arawuzinga, awukubitisha amazi, aca yigabanyamwo kubiri, amwe aja ukwayo ayandi ukwayo, nuko bompi bajabukira ahūmūtse.

⁹Bamaze kujabuka, Eliya abarira Elisa, ati Nsaba ico ugomba ko ndagukorera, ntaratandukanywa nawe. Elisa aramwishura, ati Ntabara umpe imigabane ibiri y’impwemu yawe, ngw imbeko.

¹⁰Aramwishura, at’ Unsavye ikigoye; mugabo ni wambona ngitandukanywa nawe, biza kukubera birtyo; na ho n’utambona, ntibiza kuba birtyo.

¹¹Hanyuma bakiriko baragenda bayāga, bagize bartya, umukogote w’umuriro n’amafarasi y’umuriro birabatandukanya; Eliya adūganwa mw ijuru n’agashururu.

¹²Elisa abibonye, araboroga, ati Yewe ga data we, yewe ga data we, wabereye Abisirayeli imikogote n’abagendera ku mafarasi! Nuko ntiyongera kumubona ukundi. Maze yitantamurirakw impuzu ziwe, azigiramw’ ibitabu bibiri.

¹³Araheza atora umutamana wa Eliya wamukorokanye, arahindukira; ashitse ku nkombe ya Yorodani, ahagararaho.

¹⁴Yābīra wa mutamana wakorokanye Eliya, awukubitisha amazi, aravuga, at’ Uhoraho, Imana ya Eliya, ari hehe? Amaze gukubita amazi, aca yigabanyamwo kubiri, amwe aja ukwayo ayandi ukwayo; nuko Elisa arajabuka.

¹⁵Maze bamwe b’i Yeriko biga ivy’ ukuvugishwa, bār’ aharābana na we, baravuga, bat’ Impwemu ya Eliya iri kuri Elisa. Nuko baraza, baramusanganira, bakubita inkoro hasi imbere yiwe.

¹⁶Baramubarira, bati Twebge abasavyi bawe turi kumwe n’ abantu b’inkomezi mirongwitanu; nuko turakwinginze, reka bagende baje kurondera shobuja; kumbure Mpwemu w’Uhoraho yoba yamuteruye, akamuterera ku musozi muremure, canke mu mwonga. Aravuga, at’ Oya, ntimubarungike.

¹⁷Baramuzigiriza gushitsa aho vyamuteye isoni, araruha aremera, ati Ni mubatume. Nuko batuma abantu mirongwitanu, bamara gatatu bamurondera, baramubura.

¹⁸Bagarutse iy’ ari, basanga akir’ i Yeriko; arababarira, ati Sinababujije kugenda?

¹⁹Maz’ abantu bo mur’ ico gisagara babarira Elisa, bati Rāba iki gisagara ingene cubatswe ahantu heza, nk’uko nawe ubibona mugenzi; arikw amazi yaho ni mabi, kand’ atera uburambu mu gihugu.

²⁰Aravuga, ati Ni munzanire akavya gasha, mugashiremw’ umunyu. Nuko barakamuzanira.

²¹Ava mu gisagara, aja kw iriba, aritereramw’ umunyu, aravuga, at’ Uku ni k’Uhoraho agize, ngw Akijije aya mazi, nta ho azosubira kuzana urupfu canke kurūmvya.

²²Nukw amazi arakira gushitsa na bugingo n’ubu, nk’ukw ijambo Elisa yavuze riri.

²³Bukeye avayo, adūga i Beteli; akiri mu nzira arikw aradūga, haza abana b’abahungu bavuye mu gisagara baramutwenga, baramubarira, bati Dūga, busa bg’ubuhanza!

²⁴Arakebuka; ababonye abavuma mw izina ry’Uhoraho. Nuko haca haza ibikōko bibiri vy’idubu z’ingore zivuye mw ishamba, zitabagura abahungu mirongwine na babiri bo muri bo.

²⁵Avuyeyo, aja ku musozi Karumeli; hanyuma avayo, asubira i Samariya.