Read Bibliya Yera 1951 2 Abami 21 Bible Online

2 Abami 21 - Bibliya Yera 1951 bible

2 Abami 21

¹ Manase yagiye ku ngoma amaze imyaka cumi n’ibiri; ayimarakw imyaka mirongwitanu n’itanu ar’ i Yerusalemu; nyina yitwa Hefusiba.

²Akora ivyo Uhoraho abona kw ari bibi, aja mu bizira vy’ubuyobe vy’abanyamahanga, abo Uhoraho yari yarirukanye imbere y’Abisirayeli.

³Yongera gutabisha ibitabo ku mpinga z’imisozi, ivyo se Hezekiya yari yarasibanganije, yubakira Bayali ibicaniro, abāza igishushanyo ca Ashera, nk’uko Ahabu umwami w’Abisirayeli yagize; asenga ingabo zose zo kw ijuru, ari zo nyenyeri, arazisaba.

⁴Yubaka n’ibicaniro mu ngoro y’Uhoraho, ari ho Uhoraho yari yaravuze, at’ I Yerusalemu ni ho nzoshira izina ryanje.

⁵Kandi yubakira izo ngabo zose zo kw ijuru ibicaniro mu ntangaro no mu nyubakwa vyo ku ngoro y’Uhoraho.

⁶Atanga umuhungu wiwe kw ikimazi ngo yoserezwe mu muriro, agapfumuza, agatera amabara, akaja kuraguza abahamagara imizimu, n’ abamenyi; yakora ibibi vyinshi imbere y’Uhoraho, bimutera umwikomo.

⁷Ca gishushanyo ca Ashera yabāje agishinga mu ngoro y’Uhoraho, iyo Uhoraho yari yarabariye Dawidi na Salomo umuhungu wiwe, ati Mur’ iyi ngoro, bo n’i Yerusalemu, ni ho natoranije mu miryango yose y’Abisirayeli ko nzohashira izina ryanje ngo rihabe ibihe vyose.

⁸Kand’ ati Sinzosubira guturatuza Abisirayeli ngo bave mu gihugu nahaye ba sekuruza, ni bitondera ivyo nabageze vyose, n’ivyagezwe vyose umusavyi wanje Mose yabageze.

⁹Yamara ntibaruha bavyumva; ariko Manase abakwegera mu bibi kuruta ivyo amahanga yakora, ayo Uhoraho yaranduye imbere y’Abisirayeli.

¹⁰Bukeye Uhoraho avugira mu basavyi biwe yavugisha,

¹¹ati Manase umwami w’i Buyuda ko yakoze ivyo bizira vyose vy’ubuyobe, agakora ibibi kuruta ivyo Abamori bāmubanjirije bākoze vyose, agacumurisha Abayuda ibishushanyo vyiwe;

¹²ni co gitumye jewe Uhoraho Imana y’Abisirayeli mvuze, nti Ngira ntēze i Yerusalemu n’i Buyuda ivyago bikomeye, bitume ūzovyumva wese iminzerere imuvuga mu matwi.

¹³Kand’ umugozi nageresheje i Samariya ni wo nzogeresha i Yerusalemu, mpagereshe na karisho[5] nageresheje inzu ya Ahabu; kandi nzohanagura Yerusalemu, nk’uk’ umuntu ahanagura isahani, agaheza akayubika.

¹⁴Kandi nzoshiburira hirya amasigarira yo mw ishamvu yanje, mbagabure mu maboko y’abansi babo, bahinduke inyagano n’isahu ku bansi babo bose;

¹⁵kuko bākoze ibibi imbere yanje, bakantera umwikomo bakandatsa, uhereye ku musi ba sekuruza bāviriye muri Egiputa gushitsa na bugingo n’ubu.

¹⁶Kandi Manase yavishije amaraso menshi y’aberanda, araruha yuzuza Yerusalemu amaraso uhereye ku ruhande rumwe ugashitsa ku rundi; ivyo abigereka ku caha ciwe yakwegeyemw’ Abayuda, ngo bakore ivyo Uhoraho abona kw ari bibi.

¹⁷Nukw ibindi vyose vyadonzwe kuri Manase, n’ivyo yakoze vyose, n’ivyaha yakoze, mbega ntivyanditswe mu gitabo c’ivyo ku ngoma z’abami b’Abayuda?

¹⁸Nuko Manase ahamvya ba sekuruza, ahambga mu murima wo ku rugo rwiwe, war’ umurima wa Uza; maz’ umuhungu wiwe Amoni asubira ku ngoma yiwe.

¹⁹Amoni yagiye ku ngoma amaze imyaka mirongwibiri n’ibiri; ayimarakw imyaka ibiri ar’ i Yerusalemu; nyina yitwa Meshulemeti umukobga wa Harusi w’i Yotuba.

²⁰Akora ivyo Uhoraho abona kw ari bibi, nk’uko se Manase yakora.

²¹Yagendana ingeso zose za se, agasaba ibishushanyo se yasaba, akabisenga.

²²Ava k’Uhoraho Imana ya ba sekuruza, ntiyagendera mu nzira ziwe.

²³Bukeye abanyarugo b’ umwami Amoni baramugarariza, bamutsinda mu ngoro yiwe.

²⁴Maz’ abantu bo mu gihugu bica abo bantu bose bāgararije umwami Amoni, baraheza bimika Yosiya umuhungu wiwe, bamusubiza ku ngoma yiwe.

²⁵Ibindi vyose vyadonzwe kuri Amoni, mbega ntivyanditswe mu gitabo c’ivyo ku ngoma z’abami b’i Buyuda?

²⁶Nukw ahambga mu mva yiwe yari yarimbishije muri wa murima war’ uwa Uza; maz’ umuhungu wiwe Yosiya asubira ku ngoma yiwe.