Read Bibliya Yera 1951 2 Abami 7 Bible Online

2 Abami 7 - Bibliya Yera 1951 bible

2 Abami 7

¹Elisa aramwishura, ati Ni mwumve ijambo ry’Uhoraho: uku ni k’Uhoraho agize, ngw Ejo nk’aya mango, kw irembo ry’i Samariya, ingero y’ifu igogōretse izogurwa shekeli imwe, kandi n’ ingero zibiri za sayiri zizogurwa shekeli imwe nyene.

²Arik’ umugabisha uwo mwami yagenda yegamiye yishura uwo muntu w’ Imana, ati Mbeg’ Uhoraho naho yotobora amadirisha mw ijuru, ivyo vyoshoboka? Aramwishura, at’ Uzobirābisha amaso, ariko ntuzobiryako.

³Kandi hār’ abantu bane b’abanyamibembe kw irembo ry’igisagara; baravugana, bati N’iki kitwicaritse ngaha kugira ngo tuhapfire?

⁴Tworamuka tugiye mu gisagara, kandi hariy’ inzara ingana irtyo, twogwayo; na ho nyene ni twapfa kwicara ngaha, n’ugupfa nta kindi. None rero ni muze twisabe ingabo z’Abasiriya; ni baduhangaza tuzobaho, na ho ni batwica, na kare kwar’ ugupfa n’ugupfa!

⁵Nuko bahenga buhwibiriye barīkora ngo baje ah’ Abasiriya bashagaje; ariko bashitse ah’ insago zabo zitangurira, basanga ata muntu akiharangwa;

⁶kuk’ Uhoraho yari yatumye haza mu matwi y’ingabo z’Abasiriya uguhinda kw’imikogote n’ukw’ amafarasi n’ukw’ ingabo nyinshi, bituma bavugana, bat’ Ereg’ umwami w’Abisirayeli yahēreye abami b’Abaheti n’abami bo muri Egiputa ngo badutere.

⁷Nuko bafashako baratemesha aho nyene bugihwibira, bata amahema yabo n’amafarasi yabo n’indogoba zabo, basiga vyose uko vyakabaye aho bashagaje, kugira ngo banyage amagara.

⁸Nukw abo banyamibembe bashitse ah’ izo nsago zitangurira, binjira mw ihema rimwe, bashirako bararya baranywa, basahuramw’ amafeza n’amazahabu n’imyambaro, baragenda barabinyegeza; baragaruka binjira mu rindi hema, basahuramw’ ibindi, na vyo nyene baragenda barabinyegeza.

⁹Hanyuma baravugana, bat’ Ivyo tugize si vyo, kuk’ uyu musi ar’ umusi wo kuvuga inkuru nziza, natwe takaba dupfuye kwihorera; ni twarorēra ko buca, bizodusubirako. Ni muze tugende tubibarire ab’i bgami.

¹⁰Nuko baragenda bahamagara abashibamyi b’irembo ry’igisagara, barababarira, bati Twagiye mu nsago z’ Abasiriya, dusanga hatarangwa umuntu n’umwe, ata n’agakakaza, atar’ amafarasi n’indogoba biziritse, kand’ amahema ar’ uko yakabaye.

¹¹Maz’ abo bashibamyi bahamagara abo mu rugo i bgami, barabibamenyesha.

¹²Nuk’ umwami avyukuruka mur’ iryo joro, abarira abantu biwe, ati Reka mbabarire inama Abasiriya batugīriye: bamenye kw inzara irikw iratwica; ni co gitumye bava aho bashagaje bakaja kunyegagira mw ishamba, ngo ni twasokoroka mu gisagara baducakire, babone ingene bashika imbere mu gisagara.

¹³Umwe mu bantu biwe aramubarira, at’ Enda rungika abajana amafarasi atanu mu yasigaye; ni bakira, bazoba bameze nk’ Abisirayeli bose basigaye ngaha batāpfuye; na ho ni bapfa, bazoba babaye nk’ Abisirayeli bandi bose bāpfuye: tubarungike turābe.

¹⁴Nuko bajana imikogote ibiri ikwegwa n’amafarasi, umwami arabarungika ngo bakurikire ingabo z’Abasiriya, ati Ni mugende murābe.

¹⁵Nuko baca aho baciye, barinda bashika kuri Yorodani; basanga inzira yose ar’ impuzu n’ibintu Abasiriya bagiye barata mu kwiruka. Nukw izo ntumwa ziragaruka zibibarira umwami.

¹⁶Maz’ abantu barasokoroka, basahura izo nsago z’Abasiriya; nukw ingero y’ifu igogōretse isigara igurwa shekeli imwe, n’ingero zibiri za sayiri zikagurwa shekeli imwe nyene, nk’ukw ijambo ry’Uhoraho ryavuze.

¹⁷Maze wa mugabisha umwami yagenda yegamiye, umwami amushira mw irembo kubuza ababandana; arikw abantu bamucako bamuhonyangira aho nyene mw irembo, arapfa, nk’uko wa muntu w’Imana yavuze, igihe umwami yaza ah’ ari.

¹⁸Birashika nk’uk’ uwo muntu w’Imana yabariye umwami, at’ Ejo nk’aya mango, kw irembo ry’i Samariya, ingero y’ifu igogōretse izogurwa shekeli imwe, kandi n’ingero zibiri za sayiri zizogurwa shekeli imwe nyene;

¹⁹uwo mugabisha akishura uwo muntu w’Imana, ati Mbeg’ Uhoraho naho yotobora amadirisha mw ijuru, ben’ ivyo vyoshoboka? na we akamwishura, at’ Uzobirābisha amaso, ariko ntuzobiryako.

²⁰Nuko bimushikako birtyo; abantu bamucako bamuhonyangira mw irembo, arapfa.