Read Bibliya Yera 1951 2 Abami 8 Bible Online

2 Abami 8 - Bibliya Yera 1951 bible

2 Abami 8

¹Kandi Elisa yari yarabariye wa mugore yazurira umwana, at’ Enda genda, mwe n’abo mu rugo rwawe, urondere ah’ usuhukira, kuk’ Uhoraho arekuye inzara, kand’ izomara imyaka ndwi mu gihugu.

²Nuk’ uwo mugore aragenda, agira nk’uk’ uwo muntu w’Imana yavuze, ajana n’abo mu rugo rwiwe, asuhukira mu gihugu c’Abafilisitiya, amaray’ imyaka ndwi.

³Iyo myaka ndwi ishize, uwo mugore arasuhukuruka, ava mu gihugu c’Abafilisitiya; araheza araza atakambira umwami, yitwarira urugo rwiwe n’itongo ryiwe.

⁴Kand’ uwo mwanya umwami yarikw arabonana na Gehazi, wa musuku wa wa muntu w’Imana, amubaza, at’ Enda mbarira ibintu bikomeye Elisa yakoze vyose.

⁵Nukw akirikw arīgānira umwami ingene yazuye uwapfuye, ako kanya nya mugore yazuriye umwana arashika; atakambira umwami yitwarira urugo rwiwe n’itongo ryiwe. Gehazi aca aravuga, ati Mwami wanje nyen’ ingoma, nguyu wa mugore navuga, nguyu na wa mwana wiwe Elisa yazura.

⁶Nuk’ umwami abibaza uwo mugore, na we arabimudondera. Umwami aca amuha umushikiriza, ati Genda umushikirize ibintu vyiwe vyose, n’ivyahimbuwe vyose uhereye ku musi yahaviriye ugashitsa n’ubu.

⁷Bukeye Elisa aja i Damasiko; ico gihe Beni‐hadadi umwami w’i Siriya yar’ arwaye; baramubarira, bati Wa muntu w’Imana yaje ar’ ino.

⁸Maz’ umwami abarira Hazayeli, at’ Enda abīra ingemu, uje guhūra n’uyo muntu w’Imana, umubarire ansigurize Uhoraho yuko nzokira iyi ndwara.

⁹Nuko Hazayeli aja guhūra na we atwaye ingemu zo ku vyiza‐vyiza vyose vy’i Damasiko, abiremētse ingamiya mirongwine; nukw arashika ahagarara imbere yiwe, aramubarira, at’ Umwana wawe Beni‐hadadi, umwami w’i Siriya, arantumye, ngo Mbeg’ ubona azokira iyo ndwara yiwe?

¹⁰Elisa aramwishura, ati Genda umubarire, uti Gukira uzokira; ariko rer’ Uhoraho anyeretse kw azopfa.

¹¹Araheza amushinga ijisho, kugeza aho Hazayeli yagiriye isoni. Uwo muntu w’Imana arahava ararira.

¹²Maze Hazayeli aramubaza, at’ Urizwa n’iki ga mugenzi? Aramwishura, ati N’uko mbona ibibi uzogirira Abisirayeli; amaboma yabo uzoyatongoza umuriro, n’abasore babo uzobicisha inkota; utuyoya twabo uzotumenagura, abagore babo bafise inda uzobafomoza.

¹³Hazayeli aramwishura, ati Mbega nkanje umuntu w’imbga, n’inda n’indesho, nd’ uwo gukora ibikomeye ben’ ivyo? Elisa aramwishura, at’ Uhoraho yanyeretse k’uzoba umwami w’i Siriya.

¹⁴Maz’ avuye aho Elisa ari, asubira kwa shebuja; shebuja aramubaza, ati Elisa yakubgiye iki? Na we aramwishura, ati Yambgiye ng’ Uzokira nta kabuza.

¹⁵Bukeye bgaho, Hazayeli yābīra uburengeti, abginika mu mazi, abumuta mu maso, aramupfunda arapfa. Hazayeli aca asubira ku ngoma yiwe.

¹⁶Mu mwaka ugira gatanu Yoramu mwene Ahabu umwami w’Abisirayeli, ari ku ngoma, ni ho Yehoramu mwene Yehoshafati umwami w’Abayuda, yaja ku ngoma i Buyuda.

¹⁷Aho yatangura kwima, yar’ amaze imyaka mirongwitatu n’ibiri; araheza amara imyaka munani i Yerusalemu ari ku ngoma.

¹⁸Ariko yagendera mu ngeso z’abami b’ Abisirayeli, nk’ukw ab’ inzu ya Ahabu bākora, kuko yari yābiriye umukobga wa Ahabu; nukw akora ivyo Uhoraho abona kw ari bibi.

¹⁹Mugabo Uhoraho yanka guhonnya Abayuda kubga Dawidi umusavyi wiwe, nk’uko yari yaramusezeraniye kuzomuha itara rizokwama ryaka mu ruvyaro rwiwe ibihe vyose.

²⁰Ku ngoma yiwe ni ho Abanyedomu bāgararije Abayuda, biyimikira uwabo mwami.

²¹Maze Yehoramu aca ajabukana n’imikogote yiwe yose y’intambara, afata i Zayiri; maz’ Abanyedomu bamutaye hagati, ahenga mw ijoro, bo n’abagabisha b’imikogote yiwe, bīcīra inzira mur’ abo Banyedomu; ingabo ziwe zica zirahunga zīsubirira i wabo.

²²Uko ni kw Abanyedomu bīkūye ku Bayuda gushitsa na bugingo n’ubu. Ico gihe ab’ i Libuna na bo baramugarariza.

²³Ibindi vyose vyadonzwe kuri Yehoramu, n’ivyo yakoze vyose, none ntivyanditswe mu gitabo c’ivyo ku ngoma z’ abami b’Abayuda?

²⁴Nuko Yehoramu ahamvya ba sekuruza, ahambga hamwe na bo ku murwa wa Dawidi; maz’ umuhungu wiwe Ahaziya asubira ku ngoma yiwe.

²⁵Mu mwaka ugira icumi na kabiri Yoramu mwene Ahabu umwami w’Abisirayeli ari ku ngoma, ni ho Ahaziya mwene Yehoramu umwami w’Abayuda yaja ku ngoma.

²⁶Ahaziya aho yatangura kwima yar’ amaze imyaka mirongwibiri n’ibiri; araheza amara umwaka umwe i Yerusalemu ari ku ngoma. Nyina yitwa Ataliya, umwuzukuru wa Omuri umwami w’Abisirayeli.

²⁷Yagendera mu ngeso z’ab’ inzu ya Ahabu, agakora ivyo Uhoraho abona kw ari bibi, nk’ukw ab’ inzu ya Ahabu nyene bāgenda bakora; kuko yar’ afitaniye akamwe na bo.

²⁸Bukeye atabara Yoramu mwene Ahabu, baja gutera Hazayeli umwami w’i Siriya i Ramoti‐gileyadi; maz’ Abasiriya bakomeretsa Yoramu.

²⁹Nuk’ umwami Yoramu aratabaruka, aja i Yezireli kugira ngw arwarirey’ izo nguma yakomerekerejwe n’Abasiriya i Rama, igihe yarwanya Hazayeli umwami w’i Siriya. Bukeye Ahaziya mwene Yehoramu umwami w’i Buyuda, amanuka i Yezireli kurāba Yoramu mwene Ahabu ukw ameze, kuko yar’ arwaye.