Read Bibliya Yera 1951 1 Ivyo ku Ngoma 11 Bible Online

1 Ivyo ku Ngoma 11 - Bibliya Yera 1951 bible

1 Ivyo ku Ngoma 11

¹Bukeye Abisirayeli bose bakoranira hamwe i Heburoni, baja kwa Dawidi, baramubarira, bat’ Ehe rāba, tur’ akara kamwe n’ amaraso amwe.[3]

²Kandi mu bihe vya kera, hamwe Sauli yar’ umwami, ni wewe wajana Abisirayeli gutabara, mugatabarukana. Kand’ Uhoraho Imana yawe yarakubgiye kw ari wewe uzoragira abantu biwe b’Abisirayeli, kandi k’uzoba segaba wabo.

³Uko ni kw abashingantahe bose b’Abisirayeli bāshengereye umwami i Heburoni; nuko Dawidi asezeranira na bo isezerano imbere y’ Uhoraho i Heburoni nyene; bamwimikisha amavuta ngw abe umwami w’Abisirayeli, nk’ukw ijambo ry’Uhoraho riri, iryo yavugiye muri Samweli.

⁴ Maze Dawidi n’Abisirayeli bose baja gutera i Yerusalemu, ari ho i Yebusi, kand’ Abayebusi, ari bo nyene b’inyamo z’ico gihugu, ni ho bāba.

⁵Maz’ ab’i Yebusi babarira Dawidi, bati Ntuzopfa ushitse ngaha. Ariko Dawidi atsinda iboma ry’i Siyoni, ari ho hāciye hahinduka umurwa wiwe.

⁶Maze Dawidi aravuga, at’ Ūzotanga abandi kunesha Abayebusi ni we azoba umukuru n’umugabisha. Maze Yowabu umwana wa Seruwiya aradūga, atanga abandi kubashikīra, aca amugira mukuru.

⁷Nuko Dawidi aba mur’ iryo boma, ni co catumye bahīta Umurwa wa Dawidi.

⁸Yubaka ico gisagara hirya no hino yawo, uhereye ku ruzitiro rw’i Milo n’impande zose; Yowabu na we asana ibice vyaco vyari bisigaye.

⁹Nuko Dawidi arushiriza kuba agahambaye, kuk’ Uhoraho Nyen’ ingabo yari kumwe na we.

¹⁰Aba ni bo bāsumba abandi mu bahizi ba Dawidi, bakerekana ubuhizi bgabo kuri we, bagashigikira ingoma yiwe, bagafatanya n’Abisirayeli bose kumwimika, nk’ukw ijambo ry’Uhoraho riri, iryo yavuze ku Bisirayeli.

¹¹Ngaba abahizi Dawidi yar’ afise, nk’ukw igitigiri cabo kiri. Yashobeyamu Umunyahakimoni, ni we yar’ umukuru wa bamwe batatu; ni we yarāgūriye icumu abantu amajana atatu, abahindikiranya umusi umwe.

¹²Uwa kabiri kuri we muri ba bahizi batatu ni Eleyazari mwene Dodo Umwahohi.

¹³Yari kumwe na Dawidi i Pasi‐damimu, igihe Abafilisitiya bakoraniyeyo babateye, barumanira ku murima wa sayiri; nukw ingabo zihunga Abafilisitiya.

¹⁴Ariko bo bīhagararira muri wa murima, barawurwanira, bica Abafilisitiya; nuk’ Uhoraho atanga intsinzi ikomeye, arabakiza.

¹⁵Umusi ur’ izina batatu bo muri bamwe mirongwitatu b’abahizi baramanuka, baja kuri ca gitandara iyo Dawidi ari, muri rya senga ry’i Adulamu; kand’ ingabo z’Abafilisitiya zari zishagaje ku mwonga Refayimu.

¹⁶Ico gihe Dawidi yari mw isenga, kandi hār’ insago z’Abafilisitiya i Betelehemu.

¹⁷Dawidi yumva akumbuye amazi yaho; aravuga, at’ Icompa nkabona uwompa ku mazi y’iriba ryo kw irembo ry’i Betelehemu, nkayanywa!

¹⁸Maze bamwe batatu baca mu ngabo z’ Abafilisitiya, bavoma amazi mur’ iryo riba ryo kw irembo ry’i Betelehemu, barayazana, bayaha Dawidi; ariko yanka kuyanywa, ayavyagiza imbere y’Uhoraho.

¹⁹Aravuga, ati Mana yanje, ntibikabeho ko nokora ntyo! Ndābe nnywe amaraso y’aba bantu bahevye amagara yabo? Kuko mu kuyazana bahevye amagara yabo. Ni co catumye yanka kuyanywa. Ivyo ni vyo vyakozwe na ba bandi batatu b’abahizi.

²⁰Kandi Abishayi murumuna wa Yowabu ni we yar’ umukuru wa bamwe mirongwitatu. Yarāgūriye icumu abantu amajana atatu, arabahindikiranya, aronka izina rya rurangiranwa mur’ abo mirongwitatu.

²¹Yaravugangwa mur’ abo mirongwitatu nyene, bituma agirwa umukuru wabo. Ariko rero ntiyashikīra ba bandi batatu ba mbere.

²²Kandi na Benaya mwene Yehoyada, umuntu w’umuhizi w’i Kabuseli, na we yari yarakoze ivy’ ubutōre; ni we yishe bene Ariyeli w’i Mowabu; kandi yaramanutse yicira intambge mw isenga, ku musi shelegi[4] yar’ iguye.

²³Yishe n’Umunyegiputa, kandi yar’ umugabo muremure cane, uburebure bgiwe bgar’ amatambge atanu y’ukuboko uciriye mu nkokora; uwo Munyegiputa yar’ afise icumu mu minwe, uruti rwaryo rwāngana n’umwaro ujishirwakw impuzu; ariko we amanuka iy’ ari atwaye ubuhiri gusa; amushikura iryo cumu, ararimwicisha.

²⁴Ivyo ni vyo Benaya mwene Yehoyada yakoze, aronka izina rya rurangiranwa muri ba bahizi mirongwitatu.

²⁵Yaravugangwa mur’ abo mirongwitatu nyene, ariko ntiyashikīra ba bandi batatu ba mbere. Maze Dawidi amugira umukuru w’abashibamyi biwe.

²⁶Kand’ abahizi bo mu ngabo ziwe bar’ aba: Asaheli murumuna wa Yowabu, na Eluhanani mwene Dodo w’i Betelehemu;

²⁷na Shamoti w’i Harori, na Helezi w’i Peloni;

²⁸na Ira mwene Ikeshi w’i Tekowa, na Abiyezeri w’i Anatoti;

²⁹na Sibekayi w’i Hushati, na Ilayi w’i Ahohi;

³⁰na Maharayi w’i Netofati, na Heleda mwene Bayana w’i Netofati nyene;

³¹na Itayi mwene Ribayi w’i Gibeya h’Ababenyamini, na Benaya w’i Piratoni;

³²na Urayi wo ku migezi y’i Gashi, na Abiyeli w’i Arubati;

³³na Azimaveti w’i Bahurimu, na Eliyaba w’i Shaliboni;

³⁴na bene Hashemu w’i Gizoni, na Yonatani mwene Shage w’i Harari;

³⁵na Ahiyamu mwene Sakari w’i Harari nyene, na Elifali mwene Uri;

³⁶na Heferi w’i Mekerati, na Ahiya w’i Peloni;

³⁷na Hesiro w’i Karumeli, na Narayi mwene Ezubayi;

³⁸na Yoweli murumuna wa Natani, na Mibuhari mwene Hagiri;

³⁹na Seleki Umwamoni, na Naharayi w’i Beroti, ari we yatwaza Yowabu umwana wa Seruwiya ibirwanishwa;

⁴⁰na Ira w’i Ituri, na Garebu w’i Ituri nyene;

⁴¹na Uriya Umuheti, na Zabadi mwene Ahulayi,

⁴²na Adina mwene Shiza Umureyubeni, yar’ umukuru mu Bareyubeni, kandi yari n’abantu mirongwitatu bari kuri we;

⁴³na Hanani mwene Mayaka, na Yoshafati w’i Mituni;

⁴⁴na Uziya w’i Ashiterati, na Shama na Yeyeli bene Hotamu w’i Aroweri;

⁴⁵na Yediyayeli mwene Shimuri, na murumuna we Yoha w’i Tisi;

⁴⁶na Eliyeli w’i Mahavi na Yeribayi na Yoshaviya bene Elunamu, na Ituma w’Umunyamowabu;

⁴⁷na Eliyeli na Obedi, na Yasiyeli w’i Mezoba.