Read Bibliya Yera 1951 1 Ivyo ku Ngoma 12 Bible Online

1 Ivyo ku Ngoma 12 - Bibliya Yera 1951 bible

1 Ivyo ku Ngoma 12

¹Aba ni bo bagiye kubana na Dawidi i Sikulagi, igihe yar’ acinyegeje Sauli mwene Kishi, kandi bāri muri ba bahizi bāmutabara mu ntambara;

²bār’ abanyamiheto, kandi mu kurasa canke mu guteresha ibuye umugozi,[5] bāpfa ukwo bakoresheje, ar’ ukuryo cank’ ukubamfu; bār’ abo mu muryango wa Sauli bo mu Babenyamini.

³Umukuru yari Ahiyezeri, uwa kabiri kuri we ni Yowasi, kandi bari bene Shemaya w’i Gibeya; na Yeziyeli na Peleti, bene Asumaveti, na Bereka na Yehu w’i Anatoti;

⁴na Ishimaya w’i Gibeyoni, w’umuhizi muri bamwe mirongwitatu, kandi yar’ umukuru muri bo; na Yeremiya na Yahaziyeli na Yohanani, na Yozabadi w’i Gedera;

⁵na Eluzayi na Yerimoti na Beyaliya na Shemariya, na Shefatiya w’i Harufu;

⁶bo na Elukana na Ishiya na Azareli na Yowezeri na Yashobeyamu, bo mu ba Kora;

⁷bo na Yowela na Zebadiya, bene Yerohamu w’i Gedori.

⁸Kandi no mu Bagadi, abīherereje ku ruhande rwa Dawidi, igihe yari mw isenga mu bugaragwa, bār’ abantu b’abahizi, bīze ivyo kurwana, bazi uburyo bgo gutwara inkinzo n’amacumu, bateye ubgoba nk’intambge, biruka nk’ingeregere iyo ziruka ku misozi;

⁹ni bo aba: umukuru ni Ezeri, uwa kabiri ni Obadiya, uwa gatatu ni Eliyabu,

¹⁰uwa kane ni Mishumana, uwa gatanu ni Yeremiya,

¹¹uwa gatandatu ni Atayi, uw’ indwi ni Eliyeli,

¹²uw’ umunani ni Yohanani, uw’ icenda ni Elizabadi,

¹³uw’ icumi ni Yeremiya, uw’ icumi na rimwe ni Makubanayi.

¹⁴Abo bantu b’Abagadi bār’ abagabisha b’ingabo; uwo hanyuma y’abandi muri bo yar’ ahwanye n’abantu ijana, umukuru agahwana n’abantu igihumbi.

¹⁵Abo ni bo bājabutse Yorodani mu kwezi kwa mbere, igihe rwari rwamaze iminyika yose; batera abāba mu biyaya vy’i burasirazuba n’i burengerazuba, babirukana bose.

¹⁶Bukeye abo mu Babenyamini n’abo mu Bayuda baza kuri Dawidi aho yari muri rya senga.

¹⁷Dawidi arasohoka, arabasanganira; arababarira, ati Namba muzanywe n’amahoro, muje kuntabara, umutima wanje uzomatana n’iyanyu; na ho namba muje kundaha, ngo mundangire abansi banje, kand’ ata kibi nakoze, Imana ya ba sogokuruza n’ibirābe, iducire urubanza.

¹⁸Maze Mpwemu aca aza kuri Amasayi, umukuru wa ba bandi mirongwitatu, aravuga, ati Tur’ abawe, Dawidi; turi ku ruhande rwawe, wewe mwene Isayi! Amahoro, amahoro abe kuri wewe, abe no ku bagutabara, kukw Imana yawe ari yo igutabara. Nuko Dawidi arabākīra, abagira abagabisha bo kugaba ibitero.

¹⁹Kandi no mu Bamanase har’ abācīkiye Dawidi, igihe yajana n’ Abafilisitiya bagiye gutera Sauli; mugabo ntiyabafasha, kukw abaganwa b’Abafilisitiya, bamaze kuja inama baciye bamurungika, bati Yohava aduta, agaherēra ku ruhande rwa shebuja Sauli, natwe ntituhokore agatwe kacu.

²⁰Nukw akiri mu nzira asubira i Sikulagi, abo bantu bo mu Bamanase bāciye bamucīkira, ni bo aba: Aduna na Yozabadi na Yediyayeli na Mikayeli na Yozabadi na Elihu na Siletayi, abakuru bo mu mazu y’Abamanase.

²¹Batabara Dawidi, barwanya ca gitero c’abanyazi; bose bār’ abahizi, kandi bār’ abagabisha b’ingabo.

²²Nuko, uko bukeye hama haza abantu kuri Dawidi bo kumurwanira, gushitsa aho bāhindutse ingabo nyinshi, zihwanye n’iz’ Imana.

²³Iki ni co gitigiri c’imice y’ingabo zaje gushengerera Dawidi i Heburoni zitwaje ibirwanishwa, ngo zimusubize ku ngoma ya Sauli, nk’ukw ijambo ry’Uhoraho ryavuze.

²⁴Abo mu Bayuda bitwaje inkinzo n’amacumu bār’ ibihumbi bitandatu n’amajana munani biteguye kurwana.

²⁵Abo mu Basimeyoni, abantu b’abahizi b’abanyentambara, bār’ ibihumbi ndwi n’ijana.

²⁶Abo mu Balewi bār’ ibihumbi bine n’amajana atandatu;

²⁷na Yehoyada, umukuru w’ab’ inzu ya Aroni, azanana n’ibihumbi bitatu n’amajana ndwi;

²⁸haza na Sadoki, yar’ umusore w’umuhizi, azanana n’abagabisha mirongwibiri na babiri bo mu nzu ya sekuruza.

²⁹Abo mu Babenyamini b’i wabo wa Sauli bār’ ibihumbi bitatu; kuko gushitsa ico gihe abenshi muri bo bāri bagiherereye ku nzu ya Sauli.

³⁰Abo mu Befurayimu bār’ ibihumbi mirongwibiri n’amajana munani, abantu b’abahizi, ba rurangiranwa mu mazu ya ba sekuruza.

³¹Ab’ igihimba c’ umuryango wa Manase bār’ ibihumbi cumi n’umunani, kand’ abo bāri bavuzwe amazina ngo baje kwimika Dawidi.

³²Abo mu Bisakari bazi ubgenge bgo kumenya ibihe, bakamenya n’ivyo Abisirayeli bakwiye gukora, bār’ abakuru amajana abiri, bāzananye n’ abandi b’i wabo bāgaba.

³³Abo mu Bazebuloni bār’ ibihumbi mirongwitanu, bashobora kuja mu ntambara, bakamenya uburyo bgo gutondesha urugamba no kurwanisha ibirwanishwa vy’uburyo bgose, bama biteguye gutabara badafise imitima ibiri.

³⁴Abo mu Banafutali bār’ abagabisha igihumbi, bari kumwe n’abitwaje inkinzo n’amacumu ibihumbi mirongwitatu n’indwi.

³⁵Abo mu Badani bazi uburyo bgo gutondesha urugamba bār’ ibihumbi mirongwibiri n’umunani n’amajana atandatu.

³⁶Abo mu Basheri bashobora kuja mu ntambara, bakamenya uburyo bgo gutondesha urugamba, bār’ ibihumbi mirongwine.

³⁷N’abo hakurya ya Yorodani, abo mu Bareyubeni no mu Bagadi no mu gihimba c’ umuryango w’Abamanase, biteguye kurwana bafise ibirwanishwa vy’uburyo bgose, bār’ ibihumbi ijana na mirongwibiri.

³⁸Abo banyentambara bose, abantu bazi gutondesha urugamba, ni bo baje i Heburoni bahūje imitima, bazanywe no kwimika Dawidi ngw abe umwami w’Abisirayeli bose; mbere n’abandi Bisirayeli bose bāri bahūje imitima ngo bimike Dawidi.

³⁹Nuko bamara gatatu bari ngaho nyene kwa Dawidi, barya, banywa, kuko bagenzi babo bāri babiteguriye.

⁴⁰Kandi n’abāba hafi yaho, mber’ ugashitsa n’i Bgisakari n’i Buzebuloni n’i Bunafutali, bazanye ingemurano baziremētse indogoba n’ingamiya n’ inyumbu n’inka, ingemurano z’ amafu, n’uturobe tubumbabumbge mu nsukoni, n’imisoko y’ inzabibu zumye, na vino, n’amavuta ya elayo, n’inka n’intama vyinshi cane; kuko hār’ akanyamuneza mu Bisirayeli.