Read Bibliya Yera 1951 1 Ivyo ku Ngoma 14 Bible Online

1 Ivyo ku Ngoma 14 - Bibliya Yera 1951 bible

1 Ivyo ku Ngoma 14

¹Bukeye Hiramu umwami w’i Tiro atuma intumwa kuri Dawidi, arungika n’ibiti vy’ amasederi n’abubatsi n’ababāji, kugira ngo bamwubakire ingoro.

²Nuko Dawidi aca atahura yuk’ Uhoraho ari we yamuteretse ngw abe umwami w’Abisirayeli, kandi k’ubgami bgiwe bushizwe hejuru kubg’ abantu biwe b’Abisirayeli.

³Maze Dawidi yābīrira i Yerusalemu abandi bamikazi, yongera kuvyara abandi bana b’abahungu n’abakobga.

⁴Aya ni yo mazina y’abana yavyariye i Yerusalemu: Shamuwa na Shobabu na Natani na Salomo,

⁵na Ibuhari na Elishuwa na Elipeleti,

⁶na Noga na Nefegi na Yafiya,

⁷na Elishama na Beliyada na Elifeleti.

⁸Maz’ Abafilisitiya bumvise ko Dawidi yimikishijwe amavuta ngw abe umwami w’Abisirayeli bose, Abafilisitiya bose baradūga baja kumuhīga. Dawidi avyumvise aja kubatega.

⁹Kand’ abo Bafilisitiya bari baje, basagaza ku mwonga Refayimu.

¹⁰Maze Dawidi asiguza Imana, ati Mbega ndūge nje gutera Abafilisitiya? Urabagabura mu maboko yanje? Uhoraho aramwishura, ati Dūga ubatere, kuko nzobagabura mu maboko yawe.

¹¹Nuko baja i Bayali‐perasimu, Dawidi abanesherezayo; aravuga, at’ Imana yampaye guhomvora abansi banje nk’ukw amazi ahomvora urugomero; ni co catumye bita aho hantu Bayali‐perasimu.[7]

¹²Abafilisitiya batay’ ibigirwamana vyabo; nuko Dawidi avuga ko babiturira.

¹³Bukeye Abafilisitiya basubira gusagaza ubugira kabiri kur’ uwo mwonga nyene.

¹⁴Dawidi yongera gusiguza Imana; maz’ Imana iramwishura, iti Ntudūge ngo mubīsanganize, ariko mubaturuke inyuma, mubaserukire aharābana n’ibiti vyitwa imibaka.

¹⁵Maze ni wumva imirindi y’ingabo ihindira hejuru kur’ iyo mibaka, uce ubatera, kuko jewe Imana nzoba nkwitangiye imbere gutera izo ngabo z’Abafilisitiya.

¹⁶Nuko Dawidi abigenza nk’ukw Imana yamubariye; bakinagiza izo ngabo z’Abafilisitiya uhereye i Gibeyoni ugashitsa i Gezeri.

¹⁷Maz’ inkuru za Dawidi zikwira mu bihugu vyose; Uhoraho atuma amahanga yose amutinya.