Read Bibliya Yera 1951 1 Ivyo ku Ngoma 16 Bible Online

1 Ivyo ku Ngoma 16 - Bibliya Yera 1951 bible

1 Ivyo ku Ngoma 16

¹Nuko binjiza iyo sandugu y’Imana, bayishira hagati mw ihema Dawidi yari yarayishingiye. Baraheza batangira imbere y’Imana ibimazi vyoswa n’ivy’ ishimwe.

²Nuko Dawidi amaze kwosa ikimazi, no gutanga ibimazi vy’ishimwe, ahezagira abantu mw izina ry’Uhoraho.

³Maz’ agaburira abantu bose b’ Abisirayeli, abagabo n’abagore, umwe‐umwe amuha umutsima n’ inkekera y’inyama n’akarobe kabumbabumbge mu nzabibu zumye.

⁴Kand’ ashiraho bamwe mu Balewi ngo bashitse igikorwa cabo imbere y’isandugu y’Uhoraho, bibutse abantu ivy’ Uhoraho Imana y’Abisirayeli, bamukengurukire, bamutazire.

⁵Abo yashizeho n’ aba: Asafu ni we yari mukuru, agakurikirwa na Zekariya na Yaziyeli na Shemiramoti na Yehiyeli na Matitiya na Eliyabu na Benaya na Obed‐edomu na Yeyeli, bafise amakembe n’inanga; kandi Asafu yar’ afise ivyo avuza vyitwa matowazi,

⁶na Benaya na Yahaziyeli abaherezi bari bafise inzumbete, bakāma babivuza imbere y’iyo sandugu y’isezerano ry’Imana.

⁷Kur’ uwo musi Dawidi ni ho yatanguriye gushinga ko Asafu na bagenzi be ari bo baririmba batazira Uhoraho.

⁸Ni mushime Uhoraho, mwambaze izina ryiwe; Mumenyekanishe ibikorwa vyiwe mu mahanga.

⁹Mumuririmbire, mumuririmbire ishimwe; Muvuge ibikorwa vyiwe vyose bitangaje.

¹⁰Mwirate izina ryiwe ryera, Imitima y’abarondera Uhoraho inezerwe.

¹¹Murondere Uhoraho n’inkomezi ziwe; Murondere mu nyonga hiwe ibihe bidashira.

¹²Mwibuke ibikorwa vyiwe bitangaje yakoze; Ibitangaza vyiwe n’amateka yo mu kanwa kiwe;

¹³Yemwe ruvyaro rwa Isirayeli umushumba wiwe, Yemwe bana ba Yakobo, abo yatoranije.

¹⁴Uhoraho ni we Mana yacu; Amatēka yiwe ari mw isi yose.

¹⁵Mwibuke isezerano ryiwe imisi yose, Ijambo yashinze muryibuke uk’ urunganwe rwanyu rugenda rukurikirana gushitsa ibihe igihumbi,

¹⁶Ni ryo sezerano yasezeranye na Aburahamu, Indahiro yarahiye Isaka,

¹⁷Akayongera kuri Yakobo ayitsindagira, ngw ibe icagezwe, Kuri Isirayeli ngw ibe isezerano ry’intahava;

¹⁸Akavuga, ati Ni wewe nzoha igihugu c’i Kanani, Ngo kibe ishamvu mukubitiwe amabango.

¹⁹Bāri bakir’ abantu b’imparūrwa, Mbere bāri bake cane, kand’ ar’ inyambukīra muri co,

²⁰Bāyerēra, bava mw ihanga baja mu rindi, Bava ku mwami umwe baja mu bundi bgoko.

²¹Ntiyakundira umuntu n’umwe kw abazingirikira, Mbere yahannye abami ababahōra,

²²Ati Ntimukore ku bo narobanuje amavuta, Ntimugire ico mugira abavugishwa nanje.

²³Yemwe abari mw isi mwese, muririmbire Uhoraho, Mumenyekanishe agakiza kiwe uko bukeye.

²⁴Mwamamaze mu mahanga ubgiza bgiwe, N’ibikorwa bitangaje yakoze muvyamamaze mu moko yose.

²⁵Kuk’ Uhoraho ahambaye, abereye gushimwa cane: N’uw’ igitinyiro kuruta ibigirwamana vyose.

²⁶Kukw ibigirwamana vy’amahanga vyose ar’ ubusa, Arik’ Uhoraho ni we yaremye amajuru.

²⁷Icubahiro n’ububasha bir’ imbere yiwe, Ubushobozi n’akanyamuneza bir’ ah’ aba.

²⁸Yemwe miryango y’amahanga, mwaturire Uhoraho, Mwaturire Uhoraho ingen’ afise icubahiro n’inkomezi.

²⁹Mwaturire Uhoraho ingen’ izina ryiwe ribereye icubahiro; Muze imbere yiwe muzanye ishikanwa. Musenge Uhoraho mwubashe, mushazishije ukwera.

³⁰Yemwe abari mw isi mwese, muhindire agashitsi imbere yiwe: Isi na yo irashimangiye, ntishobora kunyiganyiga.

³¹Ijuru ni rinezerwe, isi n’ihimbarwe, Ni bavuge mu mahanga, bat’ Uhoraho arahangamye.

³²Ikiyaga ni kibomborane bo n’ ibicuzuye, Indimiro n’ibizezemwo ni bivuze impundu;

³³Ni ho ibiti vyose vyo mw ishamba bizoririmbishwa n’ akanyamuneza imbere y’ Uhoraho, Kukw agira aze gucira abari mw isi imanza.

³⁴Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.

³⁵ Muvuge, mut’ Udukize, ewe Mana y’agakiza kacu, Udukoranirize hamwe, udukize amahanga, Kugira ngo dushime izina ryawe ryera, Twirate ishimwe ryawe.

³⁶Uhoraho, Imana y’Abisirayeli, n’ashemagizwe Nk’uko vyamye uhereye kera hose, ugashitsa ibihe bidashira. Nukw abantu bose baritabiriza, bati Amen; batazira Uhoraho.

³⁷Maze kur’ iyo sandugu y’isezerano ry’Uhoraho ahisiga Asafu na bagenzi be, kugira ngo baze bame bashitsa igikorwa cabo imbere yayo na ntaryo, nk’ukw igikorwa gikwiye gukorwa uko bukeye;

³⁸ahasiga na Obed‐edomu na bagenzi be mirongwitandatu n’ umunani; ahasiga na Obed‐edomu mwene Yedutuni na Hosa ngo bayishibamire.

³⁹Maze Sadoki umuherezi, n’abaherezi bagenzi be, abashira kw ihema ry’Uhoraho riri ku mpinga y’umusozi Gibeyoni,

⁴⁰kugira ngo baze bame bosereza Uhoraho ibimazi ku gicaniro co kuvyoserezako, mu gitondo no ku mugoroba ubudasiba, nk’uko vyari vyaranditswe vyose mu vyagezwe Uhoraho yageze Abisirayeli;

⁴¹kandi hamwe na bo ashiraho Hemani na Yedutuni n’abandi bātowe, bavuzwe amazina, kugira ngo bashimire Uhoraho yukw imbabazi ziwe zamah’ ibihe bidashira.

⁴²Kandi Hemani na Yedutuni abo bāri n’ inzumbete n’ivyitwa matowazi vyo kuvuza, n’ibindi vyo kuvuza bijana n’indirimbo z’Imana. Kand’ ashiraho bene Yedutuni ngo barinde irembo.

⁴³Maz’ abantu bose barataha, umuntu wese asubira i we; Dawidi na we asubira i we ngw ahezagire abo mu nzu yiwe.