Read Bibliya Yera 1951 1 Ivyo ku Ngoma 23 Bible Online

1 Ivyo ku Ngoma 23 - Bibliya Yera 1951 bible

1 Ivyo ku Ngoma 23

¹Dawidi amaze gusāza, ageze mu zabukuru, yimika umuhungu wiwe Salomo, ngw abe umwami w’Abisirayeli.

²Maze Dawidi akoranya abaganwa bose b’Abisirayeli, n’abaherezi n’Abalewi.

³Maze baharūra Abalewi uhereye ku bamaze imyaka mirongwitatu no kuja hejuru, igitigiri cabo uko baharūwe umwe‐umwe bār’ ibihumbi mirongwitatu n’umunani.

⁴Aravuga, ati Kur’ abo, ibihumbi mirongwibiri na bine baze bashikirizwe igikorwa co ku ngoro y’ Uhoraho; abandi ibihumbi bitandatu baze babe abashingantahe n’ abacamanza;

⁵abandi ibihumbi bine baze babe abashibamyi; n’ abandi ibihumbi bine nyene baze babe abo gutazira Uhoraho, bavuza ibintu nakoresheje vyo kuvuzwa ngo babimutazirishe.

⁶Maze Dawidi abacamw’ ibice, akurikiye ukw abahungu ba Lewi bāri bari: aba Gerushoni n’aba Kohati n’aba Merari.

⁷Bene Gerushoni bāri Ladani na Shimeyi.

⁸Bene Ladani, umukuru yari Yehiyeli, agakurikirwa na Zetamu na Yoweli; n’abo ukw ari batatu.

⁹Bene Shimeyi bāri Shelomoti na Haziyeli na Harani, ukw ari batatu. Abo ni bo bār’ abakuru bo mu mazu ya Ladani.

¹⁰Bene Shimeyi bāri Yahati na Ziza na Yushi na Beriya; abo ukw ari bane bāri bene Shimeyi.

¹¹Yahati ni we yar’ umukuru, uwa kabiri yari Ziza; ariko Yushi na Beriya ntibāgira abana benshi, ni co catumye babasokanya, bakabagira inzu imwe.

¹²Bene Kohati bāri Amuramu na Isihari na Heburoni na Uziyeli, ukw ari bane.

¹³Bene Amuramu bāri Aroni na Mose; kandi Aroni yari yarobanuwe kugira ngo yezwe, abe uwera cane, bo n’abahungu biwe, gushitsa ibihe vyose, ngo bame bosereza imibavu imbere y’Uhoraho, bamusukūrire, basabire abantu umugisha mw izina ryiwe ibihe vyose.

¹⁴Ariko Mose umuntu w’Imana, abahungu biwe bo bāharūrwa mu muryango wa Lewi.

¹⁵Bene Mose bāri Gerushomu na Eliyezeri.

¹⁶Mu ba Gerushomu, Shebuweli ni we yari mukuru;

¹⁷muri bene Eliyezeri, Rehabiya ni we yari mukuru; mbere Eliyezeri nta bandi bahungu yagira, ariko Rehabiya yar’ afise benshi cane.

¹⁸Muri bene Isihari, Shelomiti ni we yari mukuru.

¹⁹Muri bene Heburoni, Yeriya ni we yari mukuru, uwa kabiri ni Amariya, uwa gatatu ni Yahaziyeli, uwa kane ni Yekameyamu.

²⁰Muri bene Uziyeli, Mika ni we yari mukuru, uwa kabiri ni Ishiya.

²¹Bene Merari bāri Mahili na Mushi. Bene Mahili bāri Eleyazari na Kishi.

²²Eleyazari apfa adasize agahungu, atar’ abakobga gusa; basāzābo bene Kishi barabarongora.

²³Bene Mushi bāri Mahili na Ederi na Yeremoti ukw ari batatu.

²⁴Abo ni bo bākomōtse kuri Lewi, nk’ukw amazu ya ba sekuruza ari; bābaharūye mu mazina umwe‐umwe bakurikiye ukw ayo mazu ya ba sekuruza ari. Ni bo bāgerewe kuzokora igikorwa co ku ngoro y’Uhoraho, uhereye ku bamaze imyaka mirongwibiri no kuja hejuru.

²⁵Kuko Dawidi yari yavuze, at’ Uhoraho Imana y’Abisirayeli yahaye abantu biwe impore, kandi kukw azohora aba i Yerusalemu ibihe vyose,

²⁶Abalewi ntibazosubira kurinda kwikorera ihema n’ibintu vyose vy’ ibikoreshwa vyaryo.

²⁷Kubg’ ijambo ry’imperuka Dawidi yasize avuze, ni co catumye Abalewi baharūrwa uhereye ku bamaze imyaka mirongwibiri no kuja hejuru.

²⁸Igikorwa cabo kwar’ ugufasha aba Aroni mu vyo gukora mu ngoro y’Uhoraho, no mu nyubakwa no mu vyumba, no kwoza ibintu vyose vy’ivyera, n’ ikindi gikorwa ic’ ari co cose co mu ngoro y’Imana;

²⁹no gukora ivy’ imitsima y’ibiterekērwa, n’ivy’ amafu agogōretse yo gushikana kw ishikanwa ry’amafu, ar’ ishikanwa ry’udutsima tutambiwe, ar’ iry’ udukaranzwe, ar’ iry’ ifu ivangishijwe amavuta ya elayo, no kugeresha ingero, no kugeresha metero;

³⁰no kwama bahagarara mu gatondo bakengurukira Uhoraho bamutazira, no ku mugoroba n’uko,

³¹no mu gihe co gutanga ibimazi vyose vyoserezwa Uhoraho, ari ku masabato, ari mu mboneko z’ ukwezi, ari ku misi mikuru yashinzwe, nk’ukw igitigiri c’ivyo bimazi cāshinzwe, bar’ imbere y’ Uhoraho na ntaryo;

³²no gukora ivyo bājejwe vy’ihema ry’ibonaniro, n’ivy’ Ahēra, n’ivya bene wabo aba Aroni, ngo bashitse igikorwa co mu ngoro y’Uhoraho.