Read Bibliya Yera 1951 1 Ivyo ku Ngoma 29 Bible Online

1 Ivyo ku Ngoma 29 - Bibliya Yera 1951 bible

1 Ivyo ku Ngoma 29

¹Maz’ umwami Dawidi abarira ikoraniro ryose, at’ Umuhungu wanje Salomo, ari we nyene Imana yatoranije, aracari muto, ntarakura, na co igikorwa ari kinini; kukw iyo ngoro itazoba iy’ abantu, arikw izoba iy’ Uhoraho Imana.

²Jewe niteguye ivy’ iyo ngoro y’Imana yanje uko nshoboye kwose; narondeye amazahabu yo gukoramw’ ibintu vy’amazahabu nyene, n’amafeza y’ivy’ amafeza nyene, n’imiringa y’ivy’ imiringa, n’ivyuma vy’ibintu vy’ivyuma, n’ibiti vyo gukūramw’ ibintu vy’ibibāzano; niteguye n’utubuyenge twitwa shohamu, n’utundi tubuyenge two kuzorumikwa mw izahabu, n’utundi twitwa puku, n’utundi tujererenze amabara, mbere utubuyenge tw’uburyo bgose tw’igiciro kinini; niteguye n’amabuye yitwa marimari atagira akagero.

³Kandi rero, kubg’ urukundo nkunze iyo ngoro y’Imana yanje, har’ itunga ryanje nari mfise ry’amazahabu n’amafeza, na vyo ndabihaye iyo ngoro y’Imana yanje, bigereke ku vyo niteguriye iyo ngoro yera vyose;

⁴ntanze amazahabu yavuye i Ofiru italanto ibihumbi bitatu, n’amafeza aramuye italanto ibihumbi ndwi, vyo kwomeka kur’ iyo ngoro imbere;

⁵ayo mazahabu ndayatanze kuzokoramw’ ibintu vy’amazahabu nyene, n’ayo mafeza kuzokoramw’ ivy’ amafeza nyene, kugira ngw abacuzi b’abahinga babikūremw’ ibintu vy’uburyo bgose. None rero ni nde yemeye gutanga ivyiwe agashikanira Uhoraho uyu musi?

⁶Maz’ abakuru b’amazu ya ba sekuruza, n’abaganwa b’imiryango y’Abisirayeli, n’abagabisha bāgaba ibihumbi n’abāgaba amajana, n’ababgiriza bājejwe ivy’ ibikorwa vy’umwami, bashikana n’umutima ukunze;

⁷batanga amazahabu italanto ibihumbi bitanu, n’ayandi y’intete zitwa dariki ibihumbi cumi, n’amafeza italanto ibihumbi cumi nyene, n’imiringa italanto ibihumbi cumi n’ umunani, n’ivyuma italanto ibihumbi ijana, kugira ngo bikoreshwe igikorwa c’iyo ngoro y’Imana.

⁸Kand’ abāri bafise utubuyenge tw’igiciro kinini baradutanga, badushira mu bubīko bg’ivy’ iyo ngoro y’Uhoraho, bgāri bujejwe Yehiyeli Umugerushoni.

⁹Maz’ abantu bagira akanyamuneza ko gutanga bivuye mu mitima, kuko bashikaniye Uhoraho n’ imitima ishize icīra, babikunze rwose; kand’ umwami Dawidi na we anezerwa akanyamuneza kenshi.

¹⁰Ni co catumye Dawidi ashimira Uhoraho imbere y’ikoraniro ryose, akavuga, at’ Ewe Uhoraho, Mana ya sogokuruza wacu Isirayeli, ur’ uwo guhimbazwa ibihe bitazoshira.

¹¹Uhoraho, ubukuru n’ubushobozi n’icubahiro n’ inganji n’igitinyiro n’ivyawe; kukw ibiri mw ijuru n’ibiri mw isi vyose ar’ ivyawe; ubgami n’ubgawe, ewe Uhoraho, kandi ni wewe ushizwe hejuru ng’ube ūsumba vyose.

¹²Ubutunzi n’icubahiro ni wewe vyandurukako, kandi ni wewe uganza vyose; mu kuboko kwawe harimw’ ububasha n’inkomezi; kandi ni wewe ushobora guha bose icubahiro n’inkomezi.

¹³None rero, Mana yacu, turagukengurukiye, duhimbaje izina ryawe ry’icubahiro.

¹⁴Ariko jewe n’inda n’indēsho, nar’ iki, twe n’abantu banje, vyotumye dushobora gushikana n’imitima ikunze durtyo? Kuko vyose biva kuri wewe, kand’ ivyawe akaba ari vyo tuguhayeko.

¹⁵Kukw imbere yawe tur’ akavantara n’abātsi b’indaro, nk’uko ba sogokuruza bose bāri bameze; imisi yacu tumara kw isi ihwanye n’igitūtu, kandi nta vyizigiro dufise.

¹⁶Ewe Uhoraho Mana yacu, ibi bintu vyose twiteguye kukwubakishiriza ingoro y’izina ryawe ryera, biva mu kuboko kwawe, kandi vyose n’ivyawe.

¹⁷Kandi Mana yanje, nzi yuk’ usuzuma umutima, kandi k’uhimbarwa n’ubugororotsi. Nanje nshikanye ibi bintu vyose bivuye mu mutima ugororotse. Kand’ ubu ngize akanyamuneza kubona abantu bawe bari hano bagushikanira n’imitima ikunze.

¹⁸Ewe Uhoraho, Mana ya ba sogokuruza bacu Aburahamu na Isaka na Isirayeli, uze wame ukomeza mu mitima y’abantu bawe iyo migabo n’ivyo vyiyumviro, kandi wame werekeje imitima yabo kuri wewe.

¹⁹Kand’ umuhungu wanje Salomo umuhe kwitondera ivyagezwe vyawe n’ amabgirizwa yawe n’ivyo washinze, kugira ngw avyitondere n’ umutima wose, kand’ akore n’ivyo vyose, yubake n’iyo ngoro niteguye ivyayo.

²⁰Dawidi araheza abarira iryo koraniro ryose, at’ Enda ni muhimbaze Uhoraho Imana yanyu. Nukw ikoraniro ryose bahimbaza Uhoraho Imana ya ba sekuruza, bunamika amaso, bakubita inkoro hasi imbere y’Uhoraho n’imbere y’umwami.

²¹Bukeye bgaho bazanira Uhoraho ibimazi, batanga n’ivyo kumwosereza, amapfizi igihumbi, n’amapfizi y’intama igihumbi nyene, n’imyagazi y’intama igihumbi, babitangana n’amashikanwa y’ibiturire ukw agendana na vyo; batanga n’ibindi bimazi vyinshi cane kubg’ Abisirayeli bose.

²²Uwo musi bararya baranywa bar’ imbere y’Uhoraho, bafise akanyamuneza kenshi. Maze bongera kwimika Salomo umuhungu wa Dawidi ubugira kabiri, ngw abe umwami, bamurobanuza amavuta imbere y’Uhoraho ngw abe segaba, na Sadoki ngw abe umuherezi.

²³Nuko Salomo avyagira ku ntebe y’ubgami ishinzwe n’Uhoraho, ar’ umwami mu gishingo ca se Dawidi; agira ikiganza ciza, kand’ Abisirayeli bose baramwumvira.

²⁴Abaganwa bose n’abantu b’abahizi, bo n’abana bose b’umwami Dawidi, bakomera amashi umwami Salomo.

²⁵Uhoraho akuza Salomo cane imbere y’Abisirayeli bose, amuha icubahiro c’ubgami kitīgeze kuba ku mwami n’umwe mu bamwītangiye imbere mu Bisirayeli.

²⁶Dawidi mwene Isayi yaganje Abisirayeli bose.

²⁷Igihe yamaze ku ngoma aganza Abisirayeli yar’ imyaka mirongwine, kuko yamaze imyaka ndwi aganziriza i Heburoni, akamara n’iyindi mirongwitatu n’itatu i Yerusalemu.

²⁸Atanga yīsāziye neza, ageze mu zabukuru, ar’ umutunzi n’umunyacubahiro; maz’ umuhungu wiwe Salomo asubira ku ngoma yiwe.

²⁹Ivyādonzwe ku mwami Dawidi, uhereye ku ca mbere ugashitsa ku c’imperēra, biranditswe mu vyādonzwe na Samweli kamenyi, no mu vyādonzwe na Natani yavugishwa n’Imana, no mu vyādonzwe na Gadi kamenyi,

³⁰hamwe n’ivyabaye ku ngoma yiwe vyose, n’ivy’ ubuhizi yakoze, n’ ivyabaye kuri we no ku Bisirayeli, no ku bami bose bo mur’ ivyo bihugu.