Read Bibliya Yera 1951 2 Ivyo ku Ngoma 13 Bible Online

2 Ivyo ku Ngoma 13 - Bibliya Yera 1951 bible

2 Ivyo ku Ngoma 13

¹Mu mwaka ugira icumi n’ umunani Yerobowamu ari ku ngoma, ni ho Abiya yīma i Buyuda.

²Amara imyaka itatu i Yerusalemu ari ku ngoma, kandi nyina yitwa Mikaya umukobga wa Uriyeli w’i Gibeya. Maze habah’ intambara hagati ya Abiya na Yerobowamu.

³Abiya aja mu ntambara afise ingabo ibihumbi amajana ane, abantu b’intōre b’abahizi bazi kurwana; Yerobowamu atonda urugamba ahahanganye na we, afise ingabo ibihumbi amajana munani b’intōre nyene b’abahizi.

⁴Maze Abiya ahagarara ku musozi Semarayimu wo mu mugamba w’Abefurayimu, aravuga, ati Ni muntege amatwi, yewe Yerobowamu, mwe n’Abisirayeli mwese:

⁵mbega ntimwari mukwiye kumenya yuk’ Uhoraho Imana y’Abisirayeli yahaye Dawidi n’abahungu biwe ubgami, ngo baze baganze Abisirayeli kuzoshitsa ibihe bidashira, abisezeranishije isezerano ritazohinduka?[8]

⁶Ariko Yerobowamu mwene Nebati, umushumba wa Salomo mwene Dawidi, yarahagurutse agarariza shebuja.

⁷Maz’ abantu b’imburakimazi kandi b’inshirukanya bakoranira kuri we, baraheza binantaza kuri Rehobowamu mwene Salomo, igihe Rehobowamu yar’ akiri muto, akiri seniryo, adashobora kubahagarara imbere.

⁸Non’ ehe muriyumvira ko muzotsinda ubgami bg’Uhoraho buri mu maboko ya bene Dawidi, kuko mur’ amasinzi n’amasinzi, mukaba mufise n’ibishushanyo vy’amamasa vy’izahabu, ivyo Yerobowamu yabacurishirije ngo bibe imana zanyu!

⁹Mbega ntimwirukanye abaherezi b’Uhoraho bo mu ba Aroni, n’Abalewi, mukīronderera abandi baherezi nk’ ukw imigenzo y’amahanga yo mu bindi bihugu imeze? Ereg’ ūpfuye kwihitanira imasa y’umukangara n’amasuguru ndwi y’intama ngw arobanurwe, muca mumwemerera ubuherezi bg’imana zitar’ Imana!

¹⁰Ariko tweho, Uhoraho ni we Mana yacu, kandi ntitwamuvuyeko; kand’ abaherezi b’ Uhoraho dufise n’abo kuri Aroni, n’Abalewi baracari ku mabango yabo.

¹¹Bama bosereza Uhoraho ibimazi uko bukeye uko bgije, bakamwosereza n’imibavu itāmirana, bagatondesha n’imitsima y’ ibiterekērwa ku meza yacuzwe mw izahabu iramuye, kand’ uko bgije bakadomeka n’amatara ari ku gitereko cayo c’izahabu; kuko tweho twitondera ivyagezwe vy’ Uhoraho Imana yacu, ariko mweho mwaramuvuyeko.

¹²Kand’ ehe rāba, Imana iri kumwe natwe itugiye imbere, kandi n’abaherezi bayo bafise inzumbete z’intabaza, biteguye kuzivuza ngo turwane namwe. Yemwe Bisirayeli, ntimurwanye Uhoraho Imana ya ba sogokuruza, kuko mutazotsinda.

¹³Ariko Yerobowamu yari yarekuye abaja kubaca igico, ngo babaturuke inyuma; nuko bamwe basigara bahanganye n’Abayuda, ababaciye igico babaturuka inyuma.

¹⁴Abayuda bagize bartya babona urugamba rur’ imbere yabo, urundi rur’ inyuma. Batakambira Uhoraho, abaherezi baca bavuza inzumbete,

¹⁵ingabo z’ Abayuda zīha akamo; maz’ izo ngabo zicihaye akamo, Imana ica irwaniriza Yerobowamu n’Abisirayeli bose imbere ya Abiya n’ Abayuda.

¹⁶Abisirayeli bakiriko barahunga Abayuda, Imana ibagabura mu maboko yabo;

¹⁷Abiya n’ingabo ziwe babatikiza agatikizo gakomeye; mu ngabo z’ Abisirayeli z’intorwa hapfamw’ ibihumbi amajana atanu.

¹⁸Uko ni kw Abisirayeli bāmazwe igabo ico gihe, Abayuda bakabanesha, kuko bizigiye Uhoraho Imana ya ba sekuruza.

¹⁹Abiya yōma inyuma ya Yerobowamu, amunyaga ibisagara, ni vyo ibi: Beteli na Yeshana na Efuroni, bo n’ udusagara tugenda tuhakūkira.

²⁰Mbere Yerobowamu ntiyasubira kuvyura umutwe ku ngoma ya Abiya; hanyuma Uhoraho amutēza indwara, arapfa.

²¹Ariko Abiya arushiriza kuba ūhambaye, arongora abamikazi cumi na bane, avyara abana b’abahungu mirongwibiri na babiri n’abakobga cumi na batandatu.

²²Ibindi vyose vyadonzwe kuri Abiya, n’ ivy’ ingeso ziwe, n’ivyo yavuze, biranditswe mu gitabo c’uwavugishwa n’Imana Ido co kudonda inkuru.