Read Bibliya Yera 1951 2 Ivyo ku Ngoma 15 Bible Online

2 Ivyo ku Ngoma 15 - Bibliya Yera 1951 bible

2 Ivyo ku Ngoma 15

¹Maze Mpwemu w’Imana aza kuri Azariya mwene Odedi;

²aja gusanganira Asa, aramubarira, ati Ni muntege amatwi, yewe Asa, mwe n’Abayuda n’Ababenyamini mwese: Uhoraho azokomeza kubana namwe ni mwakomeza kubana na we, kandi ni mwamurondera muzomubona; ariko ni mwamuheba na we azobaheba.

³Erega har’ igihe kirekire Abisirayeli bāmaze batagira Imana nyakuri, batagira abaherezi bo kubigisha, badafise n’ivyagezwe.

⁴Ariko bashitsweko n’ ivyago, bahindukirira Uhoraho Imana y’Abisirayeli, baramurondera, baramubona.

⁵Kandi mur’ ico gihe nta mutēkāno wariho ng’ umuntu agire aho yocārūkira, kuko hāba imivurungano myinshi mu bantu bose bāba mur’ ivyo bihugu,

⁶bakagenda bavunagurana, ihanga ritera irindi hanga, igisagara gitera ikindi gisagara, kukw Imana yagenda ibavurungisha ivyago vy’uburyo bgose.

⁷Ariko mweho mushikame, amaboko yanyu ntadendebukirwe, kukw ibikorwa vyanyu muzobihērwa ingero.

⁸Maze Asa yumvise ayo majambo, ayo mwene Odedi yavugishijwe, arema mu mutima, akūrah’ ibizira vy’ubuyobe mu gihugu cose c’i Buyuda n’i Bubenyamini, no mu bisagara yihesheje umuheto vyo mu mugamba w’ Abefurayimu; yongera guhagarika igicaniro cār’ imbere y’urubaraza rw’ingoro y’Uhoraho.

⁹Bukeye akoranya Abayuda n’Ababenyamini bose, n’abaje kuba muri bo bavuye mu Befurayimu no mu Bamanase no mu Basimeyoni; kuko benshi bamucikiye bavuye i Bgisirayeli, babonye yuk’ Uhoraho Imana yiwe ari kumwe na we.

¹⁰Nuko bakoranira i Yerusalemu mu kwezi kwa gatatu kwo mu mwaka ugira icumi na gatanu Asa ari ku ngoma.

¹¹Kur’ uwo musi baha Uhoraho ibimazi, inka amajana ndwi n’intama ibihumbi ndwi, babikūye ku minyago bāzanye.

¹²Maze basezerana isezerano ryo kuzokwama barondeza Uhoraho Imana ya ba sekuruza imitima yabo yose n’ubugingo bgabo bgose;

¹³kandi yuk’ ūtemeye kurondera Uhoraho Imana y’Abisirayeli azokwicwa, ar’ umuto cank’ umukuru, ar’ umugabo cank’ umugore.

¹⁴Nuko barahira Uhoraho n’ijwi rirenga, bashira urwamo hejuru, bavuza inzumbete n’inzamba.

¹⁵Kand’ Abayuda bose iyo ndahiro irabanezereza, kuko bari barahiye bīvuye inyuma, bakarondera Uhoraho n’umwete wabo wose, bakamubona; maz’ Uhoraho abaha kugira umutēkāno impande zose.

¹⁶Kand’ umwami Asa yirukana inakuru Mayaka mu bugabekazi, kuko yabājishije igishushanyo c’ubuyobe ngo kibe Ashera; asitura ubgo buyobe bgiwe, aragisya gihinduka ishingwe, agituririra ku mugezi Kidironi.

¹⁷Arikw ibitabo vyo ku mpinga z’imisozi vy’i Bgisirayeli ntivyākūrwaho; mugabo umutima wa Asa war’ utunganye igihe cose yamaze akiriho.

¹⁸Kandi yinjiza mu ngoro y’ Imana ibintu se yari yaratanze kw inyegu, n’ivyo yatanze kw inyegu na we ubgiwe, amafeza n’amazahabu n’ibintu vy’ibikoreshwa.

¹⁹Ntihasubira kuba iyindi ntambara gushitsa ku mwaka ugira mirongwitatu na gatanu Asa ari ku ngoma.