Read Bibliya Yera 1951 2 Ivyo ku Ngoma 18 Bible Online

2 Ivyo ku Ngoma 18 - Bibliya Yera 1951 bible

2 Ivyo ku Ngoma 18

¹Nuko Yehoshafati yar’ afise ubutunzi bginshi n’icubahiro gihambaye. Bukeye bashingirana na Ahabu.

²Hashize imyaka aramanuka aja kuramutsa Ahabu i Samariya. Maze Ahabu abāgira Yehoshafati n’abari kumwe na we intama n’inka nyinshi cane; araheza aramukubakuba ngo batabarane gutera i Ramoti‐gileyadi.

³Nuko Ahabu umwami w’Abisirayeli abaza Yehoshafati umwami w’Abayuda, ati Mbega wokwemera kuntabara, ukajana natwe i Ramoti‐gileyadi? Aramwishura, at’ Ego cane, jewe nd’ umwe nawe, n’abantu banje ni bo b’iwawe: nzogutabara mur’ iyo ntambara.

⁴Maze Yehoshafati abarira umwami w’Abisirayeli, at’ Enda se banza usiguze ijambo ry’Uhoraho.

⁵Nuk’ umwami w’ Abisirayeli akoranya ba kamenyi, bār’ abantu amajana ane; arababaza, ati Mbega tuje gutera i Ramoti‐gileyadi, canke dusigeho? Baramwishura, bati Dūga uhatere, kuk’ Uhoraho azohagabura mu maboko yawe, mugenzi.

⁶Ariko Yehoshafati arabaza, ati Mbeg’ uretse aba, nta muntu avugishwa n’Uhoraho yobaho ngo tumusiguze?

⁷Umwami w’Abisirayeli yishura Yehoshafati, ati Haracasigaye umuntu umwe twoshobora kubaza, akadusiguriza Uhoraho; ariko ndamwanka, kukw ata ho avugishwa ivyiza kuri jewe, atar’ ivyago; yitwa Mikaya mwene Imula. Yehoshafati aramubarira, ati Sigaho mugenzi, nta co uvuga urtyo!

⁸Nuk’ umwami w’Abisirayeli ahamagara umuntu w’inkone, aramubarira, ati Genda unyaruka uzane Mikaya mwene Imula.

⁹Kand’ umwami w’Abisirayeli na Yehoshafati umwami w’Abayuda bari bavyagiye ku ntebe zabo z’ ubgami, bambaye imyambaro yabo y’ubgami, bari ku nama kw ishikiro ry’ikirimba c’i Samariya; ba kamenyi bose bavugishirizwa imbere yabo.

¹⁰Maze Zedekiya mwene Kenayana yicurishiriza amahembe y’ivyuma, aravuga, at’ Uku ni k’Uhoraho agize, ngw Aya mahembe ni yo uzokwirukanisha Abasiriya gushitsa baherengeteye.

¹¹N’abandi ba kamenyi bose bavugishwa bartyo, bati Dūga utere i Ramoti‐gileyadi, bizokubera ko, kuk’ Uhoraho azohagabura mu maboko yawe, mugenzi.

¹²Maz’ intumwa yari yagiye guhamagara Mikaya iramubarira, it’ Abavugishwa bose bahūrije hamwe gusigurira umwami ivyiza; none rero nawe amajambo yawe n’abe nk’ayabo, uvuge ivyiza.

¹³Mikaya aramwishura, ati Ndakurahiye uguhoraho kw’Uhoraho, ico Imana imbarira cose ni co nja kuvuga.

¹⁴Nukw arengutse imbere y’umwami, umwami aramubaza, ati Mikaya, tuje gutera i Ramoti‐gileyadi, canke dusigeho? Aramwishura, ati Ni mudūge mutere, bizobabera ko, kandi bazogaburwa mu maboko yanyu!

¹⁵Umwami aramubarira, at’ Aho nakurahirije nzogeza ryari, kugira ngo ntugire ico umbarira kitar’ ic’ ukuri mw izina ry’ Uhoraho?

¹⁶Aramwishura, ati Mbonye Abisirayeli bose basābagiye ku misozi nk’intama zitagira umwungere; kand’ Uhoraho agize ngo Bariya n’abatagira shebuja; ni basubire i wabo, umuntu wese yīgīre amahoro.

¹⁷Umwami w’Abisirayeli abarira Yehoshafati, ati Sinakubariye kw atogira ivyiza avugishwa kuri jewe, atar’ ibibi?

¹⁸Mikaya arongera, ati None rero ni mwumve ijambo ry’Uhoraho: mbonye Uhoraho avyagiye ku ntebe yiwe, ingabo zose zo mw ijuru zimuhagaze i buryo n’i bumoso.

¹⁹Maz’ Uhoraho arabaza, ati Ni nde yogenda kwosha Ahabu umwami w’Abisirayeli, ngw adūge i Ramoti‐gileyadi, agweyo? Nuk’ umwe aravuga, ashira ukwiwe, uwundi ukwiwe.

²⁰Hanyuma haza impwemu, ihagarara imbere y’ Uhoraho, iravuga, iti Jewe ndamwosha. Uhoraho arayibaza, at’ Uja kumwosha ute?

²¹Na yo iti Ndagenda nihindure impwemu y’ibinyoma mu kanwa ka ba kamenyi biwe bose. Na we arayishura, ati Nuk’ uramwosha, kand’ uzobishobora; genda ugire urtyo.

²²Nuko non’ ehe rāba, Uhoraho ashize impwemu y’ibinyoma mu kanwa k’aba ba kamenyi bawe bose; kand’ akugeneye ivyago.

²³Maze Zedekiya mwene Kenayana yēgēra Mikaya amukubita urushi, aramubaza, at’ Iyo mpwemu y’Uhoraho yaciye hehe mu kuva muri jewe iza kuvugana nawe?

²⁴Mikaya aramwishura, at’ Uzoba urabimenya ku musi uzokwitera haruguru mu mpete winyegeza.

²⁵Maz’ umwami w’ Abisirayeli aravuga, ati Ni mufate Mikaya, mumushīre Amoni umukuru w’umurwa, na Yowasi umwana wanje,

²⁶mut’ Umwami agize ng’ Uru rugabo murushire mw ibohero, murugaburire ivyo kurya n’amazi vy’intica ntīkize, uti Kugeza ah’ azotabarukira amahoro.

²⁷Mikaya aravuga, ati Ni waramuka utabarutse amahoro, Uhoraho azoba atamvugishije. Arongera ati Mwa bantu mwese, muraba muvyumvise!

²⁸Nuk’ umwami w’Abisirayeli na Yehoshafati umwami w’Abayuda baradūga, baja gutera i Ramoti‐gileyadi.

²⁹Maz’ umwami w’Abisirayeli abarira Yehoshafati, ati Ngiye kwiyoberanya, nje mu rugamba; ariko weho ni wambare imyambaro yawe y’ubgami. Nuk’ umwami w’Abisirayeli ariyoberanya; baraheza baja mu rugamba.

³⁰Kand’ umwami w’i Siriya yari yabariye abagabisha b’ imikogote yiwe y’intambara, ati Ntimutumbere kurasa abandi, ar’ aboroshe cank’ abahambaye, atar’ umwami w’Abisirayeli wenyene.

³¹Nukw abo bagabisha b’imikogote y’intambara babonye Yehoshafati, baravuga, bati Nguriya umwami w’Abisirayeli! Nuko barakebānuka, batumbera we; ariko Yehoshafati atura ubuku, maz’ Uhoraho Imana aramutabara, abatera kumuvako.

³²Maz’ abo bagabisha b’imikogote babonye kw atar’ umwami w’Abisirayeli, barahindukira bareka kumwirukana.

³³Maz’ umuntu umwe wo mu rugamba apfa kurasa, agema umwami w’Abisirayeli ah’ ivyuma bimukingīra bihūrira; aca abarira ūtumbereza umukogote wiwe, ati Hindukiza, unkūre mu rugamba, kuko nkomeretse bibi.

³⁴Uwo musi intambara irushiriza kuba ihambaye; umwami apfa kwinanata akomeza guhagarara mu mukogote wiwe, ahangana n’Abasiriya gushitsa ku mugoroba; maze nko ku karengazuba aratanga.