Read Bibliya Yera 1951 2 Ivyo ku Ngoma 28 Bible Online

2 Ivyo ku Ngoma 28 - Bibliya Yera 1951 bible

2 Ivyo ku Ngoma 28

¹Ahazi yar’ amaze imyaka mirongwibiri igihe yima, amara imyaka cumi n’itandatu i Yerusalemu ari ku ngoma. Mugabo ntiyakora ivyo Uhoraho abona kw ari vyiza, nk’uko sekuruza Dawidi yakora;

²ariko yagendera mu ngeso z’abami b’Abisirayeli, agakoresha ibishushanyo vya za Bayali bivugutiwe mu nkero.

³Ikigeretseko, yosereza imibavu mu mwonga wa mwene Hinomu, atanga n’abana biwe kw ibimazi ngo boserezwe mu muriro, nk’ ukw ibizira vy’ubuyobe vy’abanyamahanga vyari bimeze, abo Uhoraho yari yarirukanye imbere y’Abisirayeli.

⁴Yatanga ibimazi akosereza imibavu mu bitabo no ku mpinga z’imisozi no musi y’ igiti cose gitotahaye.

⁵Kubg’ ivyo Uhoraho Imana yiwe amugabura mu maboko y’umwami w’i Siriya. Abasiriya baramunesha, bafata mpiri benshi cane mu bantu biwe, babajana i Damasiko ar’ inyagano. Arongera agaburwa mu maboko y’umwami w’Abisirayeli, na we aramunesha, yica benshi cane.

⁶Kuk’ uwo mwami Peka mwene Remaliya yishe mu Bayuda ingabo ibihumbi ijana na mirongwibiri ku musi umwe, bose ar’ abantu b’abahizi; inyanduruko n’uko bāri baretse Uhoraho Imana ya ba sekuruza.

⁷Kandi Zikuri, umuntu w’umuhizi wo mu Befurayimu, yica Mayaseya umwana w’umwami, na Azurikamu umubgiriza wo mu ngoro i bgami, na Elukana uwa kabiri ku mwami.

⁸Nukw Abisirayeli bajana mu b’i wabo abantu ibihumbi amajana abiri ar’ inyagano, b’abagore n’ abahungu n’abakobga, babasahura n’amasahu menshi cane, babijana i Samariya.

⁹Ariko hāriy’ ūvugishwa n’Uhoraho yitwa Odedi; aragenda aja gusanganira izo ngabo zihindukiye i Samariya, arababarira, at’ Ereg’ icātumye Uhoraho Imana ya ba sogokuruza agabura Abayuda mu maboko yanyu n’uko yar’ abarakiye, ariko mwebge mwabicanye ishavu ryinshi rishika mw ijuru.

¹⁰None mugabiye kugandura Abayuda n’ab’i Yerusalemu ngo mubagire abagurano n’abaguranokazi; aho mwebge nta bicumuro mufise vyanyu ubganyu mwācumuye k’ Uhoraho Imana yanyu?

¹¹Enda rero ni munyumve, ni musubizey’ aba bantu b’i wanyu mwanyaze; kuk’ uburake bg’inkazi bg’Uhoraho buri kuri mwebge.

¹²Maz’ abaganwa bamwe b’Abefurayimu, Azariya mwene Yohanani, na Berekiya mwene Meshilemoti, na Yehizikiya mwene Shalumu, na Amasa mwene Hadulayi, barahaguruka, babuza abo batabārutse mu ntambara,

¹³barababarira, bat’ Abo bantu b’inyagano ntimubazane ngaha; kukw ico mugomba gukora kizoducumuza k’ Uhoraho, congereze ivyaha vyacu n’ibicumuro vyacu; kuko na none twācumuye bikomeye, kandi twebge Abisirayeli dufitiwe uburake bg’inkazi.

¹⁴Nukw izo ngabo zica zisiga abo bantu b’inyagano bo n’amasahu basahuye imbere y’ abo baganwa, n’imbere y’abāhakoraniye bose.

¹⁵Maz’ abo bantu bavuzwe amazina barahaguruka, bābīra abo bantu b’inyagano; abāri bambaye ubusa bose bo muri bo babambika ivyo bakūye mu masahu, babaha impuzu n’ inkweto, barabagaburira, babaha n’ivyo kunywa, babasiga amavuta; abananiwe bose muri bo babashira ku ndogoba, babashikana mu b’i wabo i Yeriko, igisagara c’ibigazi; baraheza basubira i Samariya.

¹⁶Ico gihe umwami Ahazi atuma ku mwami w’i Ashuri ngw amutabare,

¹⁷kukw Abanyedomu bāri bongeye gutera i Buyuda, bakahanesha, bakajana abaho ar’ inyagano.

¹⁸Kandi n’Abafilisitiya na bo bāri bateye ibisagara vyo mu kiyaya, n’ivy’ i Buyuda bg’i bumanuko, bafata i Beti‐shemeshi, n’i Ayaloni, n’i Gederoti, n’i Sokoho, n’ibisagara bihakūkira, n’i Timuna n’ibisagara bihakūkira, n’i Gimuzo na ho nyene n’ibisagara bihakūkira; baca barahinjira.

¹⁹Uhoraho yari yacishije Abayuda bugufi, abahōye Ahazi umwami wabo,[16] kuko yakoze ivy’ isoni nke mu Buyuda, agacumura k’Uhoraho bitangaje.

²⁰Nuko Tigulati‐pileseri umwami w’i Ashuri aza kuri we; ariko mu gishingo co kumuremesha amurandura umutima.

²¹Kuko Ahazi yābiriye ibintu bimwe vyo mu ngoro y’Uhoraho, no mu ngoro yiwe ubgiwe, no mu mazu y’ abaganwa, akabishikanira umwami w’i Ashuri; ariko ntivyagira ico bimumarira.

²²Maz’ uwo mwami Ahazi nyene, igihe aburaniwe arushiriza kuja imbere gucumura k’ Uhoraho,

²³kuko yahaye ibimazi imana z’i Damasiko zamunesheje, akavuga, at’ Izo mana z’abami b’i Siriya ko zabafashije, hinge nanje ndazihe ibimazi zintabare. Ariko zāmukwegeye akaziri, bo n’Abisirayeli bose.

²⁴Nuko Ahazi akoranya ibintu vyose vy’imbombovu vyo mu ngoro y’Imana, arabijanjagura, yugara inzugi z’iyo ngoro y’Uhoraho; yiyubakira ibicaniro ahantu hose h’i Yerusalemu.

²⁵No mu gisagara cose c’i Buyuda atabamw’ ibitabo vy’aho kwosereza imibavu izindi mana, atera umwikomo Uhoraho Imana ya ba sekuruza.

²⁶Ibindi vyose vyadonzwe kuri we, n’ivy’ ingeso ziwe zose, uhereye ku vya mbere ugashitsa ku vy’ imperēra, vyanditswe mu gitabo c’abami b’Abayuda n’ab’ Abisirayeli.

²⁷Nuko Ahazi ahamvya ba sekuruza, bamuhamba ku murwa w’i Yerusalemu, kuko batāmuhamvye mu mva z’abami b’i Buyuda;[17] maz’ umuhungu wiwe Hezekiya asubira ku ngoma yiwe.