Read Bibliya Yera 1951 2 Ivyo ku Ngoma 30 Bible Online

2 Ivyo ku Ngoma 30 - Bibliya Yera 1951 bible

2 Ivyo ku Ngoma 30

¹Bukeye Hezekiya atuma ku Bisirayeli no ku Bayuda bose, yandikira n’ivyete Abefurayimu n’Abamanase, ngo baze kugira umusi mukuru w’ivya Pasika y’Uhoraho Imana y’Abisirayeli, mu ngoro y’Uhoraho i Yerusalemu.

²Kuk’ umwami n’abaganwa biwe n’ikoraniro ryose ry’ i Yerusalemu bari bagiye inama yo kugira umusi mukuru w’ivya Pasika mu kwezi kwa kabiri.

³Ntivyābashobokeye mu gihe gikwiye, kukw igitigiri c’abaherezi biyejeje cāri gito, kand’ abantu batākoraniye i Yerusalemu.

⁴Nuk’ umwami n’iryo koraniro ryose barabishima;

⁵bashinga ko bitāngāzwa mu Bgisirayeli hose, uhereye i Berisheba ugashitsa i Dani, ngo baze i Yerusalemu ku musi mukuru wa Pasika y’Uhoraho Imana y’Abisirayeli; kuko batāri bakiza ari benshi nk’uko vyari vyarashinzwe.

⁶Nukw intumwa zijana ivyete bivuye ku mwami n’abaganwa biwe, zibikwiza mu Bgisirayeli hose no mu Buyuda, zivuga nk’uk’ umwami yashinze, ziti Yemwe Bisirayeli, ni mugaruke k’Uhoraho Imana ya Aburahamu na Isaka na Isirayeli, kugira ngo na we agaruke kuri mwebge abasigaye barokotse abami b’i Ashuri.

⁷Ngo Kandi ntimuse na ba sogokuruza banyu, cank’ abandi b’i wanyu bāgenda bacumura k’Uhoraho Imana ya ba sekuruza, bigatuma ibatanga bakagesezwa, nk’uko namwe mubibona.

⁸Ngo None rero mweho ntimugamike amazosi nka ba sogokuruza banyu, ariko muyoboke Uhoraho, muze muze mu rusengero rwiwe yejeje gushitsa ibihe vyose, mube abasavyi b’Uhoraho Imana yanyu, kugira ng’ uburake bgiwe bg’inkazi bubaveko.

⁹Ngo Kuko ni mwahindukirira Uhoraho, ab’ i wanyu n’abana banyu bazotera akagongwe abābajanye ar’ inyagano, babarekure bagaruke mur’ iki gihugu; ngo Kuk’ Uhoraho Imana yanyu ar’ umunyabuntu kandi n’umunyembabazi, ntazobakūrakw inyonga ziwe ni mwamugarukako.

¹⁰Nukw izo ntumwa ziragenda, zihetura ibisagara vyose vyo mu gihugu c’Abefurayimu n’ic’ Abamanase, zirinda zishika no mu c’ Abazebuloni; ariko barazitwenga cane, barazishinyagurira.

¹¹Mugabo bamwe bo mu Basheri no mu Bamanase no mu Bazebuloni barīhanūra, baja i Yerusalemu.

¹²Kandi n’i Buyuda ukuboko kw’ Imana kubaha guhūza umutima, bumvira ico cagezwe c’umwami n’ abaganwa kivuye kw ijambo ry’ Uhoraho.

¹³Nuko mu kwezi kwa kabiri hakoranira abantu benshi i Yerusalemu, kugira umusi mukuru w’ imitsima itambiwe, ar’ ikoraniro rinini cane.

¹⁴Bakūra hasi, bakūrah’ ibicaniro vyar’ i Yerusalemu, n’ibicaniro vyose vyo kwoserezakw imibavu, babita mu mugezi Kidironi.

¹⁵Maze ku musi ugira icumi na kane wo mur’ ukwo kwezi kwa kabiri, babāga ivya Pasika; maz’ abaherezi n’Abalewi baramāramāra, baraheza barīyeza, bazana ibimazi vyo kwoswa mu ngoro y’Uhoraho.

¹⁶Bahagarara mu myanya yabo basanganywe, nk’uko vyashinzwe na Mose umuntu w’Imana; abo baherezi bamija amaraso, Abalewi ari bo bayabahēreje;

¹⁷kuko mur’ iryo koraniro hāri benshi batiyejeje, bituma Abalewi ari bo bagerwa kubāgira umwagazi wa Pasika umuntu wese ahumanye, kugira ngo babēreze Uhoraho.

¹⁸Kukw abantu benshi cane batāri biyejeje, cane‐cane bār’ abo mu Befurayimu no mu Bamanase no mu Bisakari no mu Bazebuloni, bagapfa kurya ivya Pasika uburyo butemewe n’ivyanditswe. Kandi Hezekiya yari yābasengeye,

¹⁹at’ Uhoraho, ari we munyabuntu, n’aharire umuntu wese ashize umutima ku kurondera Imana, ari we Uhoraho Imana ya ba sekuruza, nah’ atejejwe nk’ukw ivyagezwe vy’urusengero rwera biri.

²⁰Nuk’ Uhoraho yumvira Hezekiya, atunga abantu.

²¹Nukw Abisirayeli bāri bakoraniye i Yerusalemu bamara imisi ndwi bari mu misi mikuru y’imitsima itambiwe bafise umunezero mwinshi; kand’ Abalewi n’abaherezi bāhimbaza Uhoraho uko bukeye, bamuririmbira n’amajwi arenga.

²²Hezekiya aremēsha imitima y’Abalewi bose bāgira umwete wo gukorera Uhoraho. Nukw abantu bamara iyo misi ndwi barya ivy’ iyo misi mikuru, batanga ibimazi vy’ishimwe, bakengurukira Uhoraho Imana ya ba sekuruza.

²³Maz’ ikoraniro ryose baja inama yo kwongera kumara iyindi misi mikuru ndwi; nuko bayimara banezerewe.

²⁴Kuko Hezekiya umwami w’Abayuda yari yahaye iryo koraniro amamasa igihumbi n’intama ibihumbi ndwi vyo gutanga kw ibimazi, abaganwa na bo bariha amamasa igihumbi nyene, n’intama ibihumbi cumi; nukw abaherezi benshi bariyeza.

²⁵Nukw iryo koraniro ryose ry’Abayuda riranezerwa, bo n’abaherezi n’ Abalewi, n’ikoraniro ryose ryavuye i Bgisirayeli, n’abari baravuye mu gihugu c’i Bgisirayeli bakaza kuba i Buyuda.

²⁶Nukw i Yerusalemu haba akanyamuneza kenshi, kuk’ uhereye ku ngoma ya Salomo mwene Dawidi umwami w’Abisirayeli, hatāri harīgeze kuba ibihwanye n’ivyo i Yerusalemu.

²⁷Maz’ abaherezi, ari bo Balewi, barahaguruka, bahezagira abantu; ijwi ryabo ryumvikana ku Mana, ugusenga kwabo gushika ahēra hayo ah’ iba, ari ho mw ijuru.