Read Bibliya Yera 1951 2 Ivyo ku Ngoma 34 Bible Online

2 Ivyo ku Ngoma 34 - Bibliya Yera 1951 bible

2 Ivyo ku Ngoma 34

¹Yosiya yagiye ku ngoma amaze imyaka munani; ayimarakw imyaka mirongwitatu n’ umwe ar’i Yerusalemu.

²Akora ivyo Uhoraho abona kw ari vyiza, agendera mu ngeso nziza za sekuruza Dawidi, ntiyatambamira i buryo cank’ i bumoso.

³Mu mwaka ugira umunani ari ku ngoma, akir’ umwana, yatanguye kurondera Imana ya sekuruza Dawidi; maze mu mwaka ugira icumi na kabiri atangura gutunganya i Buyuda n’i Yerusalemu, ahakūra ibitabo vyo ku mpinga z’imisozi, n’inkingi bāshingiye Ashera, n’ibishushanyo bibājwe bo n’ivyavugutiwe mu nkero;

⁴basangangura ibicaniro vya za Bayali abahagarikiye, asitaguza n’ inkingi zashingiwe izuba zari zibihanamiye hejuru; amenagura n’inkingi zashingiwe Ashera, n’ ibishushanyo bibājwe n’ivyavugutiwe mu nkero, abigira ishingwe, arimēmēra ku mva z’abābiha ibimazi.

⁵Aturirira amagufa y’ abaherezi ku bicaniro vyabo; nukw atunganya i Buyuda n’i Yerusalemu.

⁶Kandi ni ko yagenjeje no mu bisagara vyabaye amatongo impande zose, ivy’ Abamanase n’ ivy’ Abefurayimu n’ivy’ Abasimeyoni, no kurinda ashitsa no mu vy’i Bunafutali.

⁷Asangangura ibicaniro, ajonjanga inkingi zāshingiwe Ashera, n’ibishushanyo bibājwe, abigira ifu; asitagura n’ inkingi zose zāshingiwe izuba mu gihugu cose c’i Bgisirayeli; araheza arahindukira, asubira i Yerusalemu.

⁸Maze mu mwaka ugira icumi n’umunani ari ku ngoma, ahejeje gutunganya igihugu n’urusengero, arungika Shafani mwene Asaliya, na Mayaseya umukuru w’umurwa, na Yowa mwene Yowahazi umwanditsi w’ivyaja biraba, ngo baje gusanisha ingoro y’Uhoraho Imana yiwe.

⁹Bashikīra Hilukiya umuherezi mukuru, bamushikiriza amahera yazanywe mu ngoro y’ Imana, ayo Abalewi b’abakumirizi bari barakoranije mu Bamanase no mu Befurayimu no mu masigarira yose y’Abisirayeli, no mu Bayuda bose no mu Babenyamini no mu baba i Yerusalemu;

¹⁰bayaha abāshinzwe gukoresha ibikorwa vyo ku ngoro y’Uhoraho, na bo bayahemba abakozi bakora iyo ngoro, kugira ngo bayisanure bayikomeze;

¹¹bayaha ababāji n’ abubatsi kugira ngo bagure amabuye abājwe n’ibiti vy’imyaro n’ ivy’ ibishoro vyo gusanura inyubako abami b’i Buyuda bononye.

¹²Nukw abo bantu bakora ico gikorwa ar’ abizigirwa; abābarāba n’aba: Yahati na Obadiya, Abalewi bo mu ba Merari, na Zekariya na Meshulamu bo mu ba Kohati, ni bo bābakoresha; kand’ abandi Balewi bose b’abahinga bazi ivyo kuvuza,

¹³ni bo bāgenda barāba ivy’ abikorezi, bagakoresha n’ abandi bose bakora igikorwa ic’ ari co cose; kand’ Abalewi bamwe bār’ abakarani n’abashingantahe n’abakumirizi.

¹⁴Maze bariko barasohora amahera yazanywe mu ngoro y’Uhoraho, Hilukiya umuherezi arenguka ku gitabo c’ivyagezwe vy’ Uhoraho, ivyo Mose yazanye.

¹⁵Hilukiya abarira Shafani umukarani, ati Ntoye igitabo c’ivyagezwe mu ngoro y’Uhoraho. Hilukiya araheza agiha Shafani.

¹⁶Shafani ajana ico gitabo, agishīra umwami, amudondera uko vyagenze, at’ Ivyo abasavyi bawe bāgezweko vyose, bābikoze;

¹⁷kandi bābiriye amahera yari mu ngoro y’Uhoraho, bayashikirije abakoresha ibikorwa n’abakozi.

¹⁸Uwo mukarani Shafani yongera kubarira umwami, ati Kand’ umuherezi Hilukiya andungikanye igitabo. Nuko Shafani agisomera umwami.

¹⁹Maz’ umwami yumvise amajambo yo mu vyagezwe, yitantamurirakw impuzu ziwe.

²⁰Umwami araheza atuma Hilukiya na Ahikamu mwene Shafani na Abudoni mwene Mika n’uwo mukarani Shafani nyene na Asaya umumenyekana wiwe,

²¹ati Ni mugende munsigurize Uhoraho, twe n’amasigarira yo mu Bisirayeli no mu Bayuda, ivy’ amajambo yo mur’ ico gitabo batoye; kuk’ uburake bg’Uhoraho budusutsweko ari bginshi, kubga ba sogokuruza batumviye ijambo ry’Uhoraho, ngo bakore ivyanditswe mur’ iki gitabo vyose.

²²Nuko Hilukiya n’abo bandi umwami yatumye, baragenda, baja k’ūvugishwa n’Imana Hulida muka Shalumu, Shalumu mwene Tokihati, umwuzukuru wa Hasira, yajejwe ububīko bg’imyambaro, bamusiguza ivyo. Kand’ uwo mugore yaba i Yerusalemu mu gice caho ca kabiri.

²³Arabishura, at’ Uku ni k’Uhoraho Imana y’Abisirayeli agize, ngo Murabarira uwo muntu yamubatumyeko,

²⁴mut’ Uhoraho agize ngw Azotēza ivyago aha hantu, bo n’abahaba, ngo Ni yo mivumo yose yanditswe mur’ ico gitabo bagusomeye, wewe nyene umwami w’i Buyuda;

²⁵muti Kuko bāmuvuyeko, bakosereza imibavu izindi mana, muti Bakamutēza umwikomo ibikorwa vyose vy’intoke zabo; muti Ni co kizotuma uburake bgiwe busukwa aha hantu, ntihagire ikibuzimya.

²⁶Ati Kandi mubarire uwo mwami w’i Buyuda yabatumye gusiguza Uhoraho, mut’ Uku ni k’Uhoraho Imana y’ Abisirayeli agize, ngo Ku vy’ ayo majambo wumvise,

²⁷ngo Kuko watsinzwe mu mutima wawe, ukicisha bugufi imbere yiwe, ari yo Mana, igihe wumva amajambo yavuze ku vy’ aha hantu bo n’ abahaba, ng’ Ukicisha bugufi imbere yiwe, ukītantamurirakw impuzu zawe, ukaririra imbere yiwe, ngo Na we arakwumvise; ni k’Uhoraho agize.

²⁸Ngo Nukw azoguha guhambga hamwe na ba sogokuruza, ushike mu mva yawe amahoro; ngo Kand’ amaso yawe ntazobona ivyo vyago vyose azotēza aha hantu n’abahaba. Nuko baraza, bagarukanira umwami ayo majambo.

²⁹Maz’ umwami atuma gukoraniriza hamwe abakuru bose b’i Buyuda n’i Yerusalemu.

³⁰Umwami araheza aradūga, aja ku ngoro y’Uhoraho, bo n’abashingantahe b’i Buyuda bose n’ ababa i Yerusalemu, bo n’abaherezi n’Abalewi n’abantu bose, abahambaye n’aboroshe; abasomera amajambo yose yo mur’ ico gitabo c’isezerano bātoye mu ngoro y’Uhoraho.

³¹Maz’ umwami ahagarara ahantu yamenyereye, asezeranira imbere y’Uhoraho kw azomukurikira, no kuzokwitondera ivyagezwe vyiwe n’amabgirizwa yiwe n’ivyo yashinze, no kuzovyitonderesha umutima wiwe wose n’ubugingo bgiwe bgose, no kuzoshitsa amajambo y’iryo sezerano yanditswe mur’ ico gitabo.

³²Araheza yemeza iryo sezerano ababa i Yerusalemu n’Ababenyamini bose. Nukw ab’i Yerusalemu bashitsa iryo sezerano ry’ Imana, ari yo Mana ya ba sekuruza.

³³Maze Yosiya akūra ibizira vyose vy’ubuyobe mu ntāra zose z’Abisirayeli, yemeza abari mu gihugu c’i Bgisirayeli bose gusaba Uhoraho Imana ya ba sekuruza. Igihe cose yamaze akiriho nta ho bāretse gukurikira Uhoraho, Imana ya ba sekuruza.