Read Bibliya Yera 1951 2 Ivyo ku Ngoma 4 Bible Online

2 Ivyo ku Ngoma 4 - Bibliya Yera 1951 bible

2 Ivyo ku Ngoma 4

¹Maz’ acurisha igicaniro mu miringa; uburebure bgaco bgar’ amatambge mirongwibiri y’ ukuboko uciriye mu nkokora, n’ubgaguke bgaco bgari mirongwibiri nyene, uburebure bg’ igihagararo bgar’ amatambge cumi.

²Maz’ akora igikarabiro citwa ikiyaga, akivugutiye mu nkero, ubgaguke bgaco, uhereye ku rubiga rw’uruhande rumwe ugashitsa ku rundi, bgar’ amatambge cumi y’ukuboko uciriye mu nkokora, bgarangana impande zose; uburebure bgaco bg’igihagararo bgar’ amatambge atanu; urubiga rwaco rwazengukwa n’umugozi w’amatambge mirongwitatu.

³Musi y’urubiga rwaco hari hakīkūjwe n’ibishushanyo vy’uturende,[3] mw itambge rimwe hār’ icumi‐icumi, dukīkūje hirya no hino kur’ ico kiyaga; utwo turende twari dutondeshejwe mu mirongo ibiri, twāvugutiranywe na co kikiri mu nkero.

⁴Cari giteretswe ku bishushanyo vy’ amapfizi cumi n’abiri; atatu yarāba i burārūko, yandi atatu yarāba i burengerazuba, yandi atatu yarāba i bumanuko, yandi atatu yarāba i burasirazuba; ico kiyaga cari giteretse kur’ ayo mapfizi, kandi yose yar’ ahānye imigongo.

⁵Intimba yaco yangana n’ikiganza c’umuntu, kand’ umunwa waco war’ umeze nk’uw’ igikombe, canke nk’ishurwe ry’irebe; cuzuzwa n’imibindi ibihumbi bitatu.

⁶Acura n’ibigarigari cumi vyo kurongamwo; bitanu abishira ku ruhande rw’i buryo, bindi bitanu i bumoso; bābirongamw’ inyama z’ibimazi vyo kwosa, ariko ca gikarabiro citwa ikiyaga car’ ic’ abaherezi co gukarabiramwo.

⁷Acura n’ibiterekwakw amatara cumi mw izahabu, nk’ukw ibgirizwa ryavyo riri, abitereka mu rusengero, bitanu mu ruhande rw’i buryo, bindi bitanu mu ruhande rw’i bumoso.

⁸Abāza n’ameza cumi, ayatereka mu rusengero, atanu mu ruhande rw’i buryo, yandi atanu mu ruhande rw’i bumoso nyene. Acurisha n’amakarabo ijana mw izahabu.

⁹Yubakisha n’urugo rw’inyubakwa, ari ho hār’ ah’ abaherezi, bo n’urugo rw’intangāro, akoresha n’ inzugi zarwo; izo nzugi zarwo azomekakw imiringa.

¹⁰Ca gikarabiro citwa ikiyaga agishira ku ruhande rw’i buryo bg’iyo ngoro, ku mfuruka ihera i burasirazuba n’i bumanuko.

¹¹ Maz’ imibindi n’ivyuma vyo kuyora umunyota n’imibehe Huramu arabikora na vyo. Uko ni ko yanonosoye igikorwa yakorera umwami Salomo c’ingoro y’Imana.

¹²Ivyo yakoze vyar’ ibi: za nkingi zompi, na ya myashi yompi yiburungushuye yari mu mitwe y’izo nkingi, n’ibimeze bga nsenga bibiri vyari kuri ya myashi yiburungushuye yari mu mitwe y’ izo nkingi;

¹³na vya bishushanyo vy’amakomamanga amajana ane bitondeshejwe kur’ izo nsenga, imirongo ibiri‐ibiri ku nsenga zompi, uko zari kur’ iyo myashi yompi yiburungushuye yari mu mitwe y’izo nkingi;

¹⁴akora na vya bitereko, na vya bigarigari vyo gutereka kuri vyo;

¹⁵na ca kiyaga, na vya bishushanyo vy’amapfizi ukw ar’ icumi na bibiri cari giteretsweko;

¹⁶na ya mibindi na vya vyuma vyo kuyora umunyota n’ivyo kwāruza inyama; ivyo bintu vyose Huramu‐abi yakoreye umwami Salomo vy’ingoro y’Uhoraho, yabikoze mu miringa y’imyākāka.

¹⁷Umwami yabikoreshereje mu kiyaya ca Yorodani bivugutiwe mu nkero, ahantu hār’ ibumba, hagati y’i Sukoti n’i Sereda.

¹⁸Uko ni ko Salomo yakoze ivyo bintu vyose vy’isinzi; uburemerezi bg’imiringa vyakūwemwo ntibgāmenyekanye.

¹⁹Kandi Salomo acurisha ibintu vyose vyo mu ngoro y’Imana, ni vyo ibi: igicaniro c’izahabu, n’ ameza y’imitsima y’ibiterekērwa;

²⁰n’ibiterekwakw amatara vyacuzwe mw izahabu iramuye, bo n’ amatara yavyo, kugira ngw aze yame yākira hino y’Ahēra Cane, nk’uko vyashinzwe;

²¹n’ibisa n’amashurwe, n’ayo matara nyene, n’imakasi zayo zo gutunganya urutambi, na vyo vyar’ ivy’ izahabu y’indobānurwa;

²²n’ imbugita, n’imibehe, n’udukombe, n’udusahani two gushirwak’ umunyota, na vyo nyene vyar’ ivy’ izahabu iramuye; n’amapata y’ inzugi zo haruguru zija Ahēra Cane, n’ay’ inzugi z’ingoro ubgayo, ari rwo rusengero, na yo yar’ ay’ izahabu.