Read Bibliya Yera 1951 Ezira 7 Bible Online

Ezira 7 - Bibliya Yera 1951 bible

Ezira 7

¹Hanyuma y’ivyo, ku ngoma ya Aritazeruzi umwami w’i Buperesi, haza Ezira mwene Seraya, Seraya wa Azariya, Azariya wa Hilukiya,

²Hilukiya wa Shalumu, Shalumu wa Sadoki, Sadoki wa Ahitubu,

³Ahitubu wa Amariya, Amariya wa Azariya, Azariya wa Merayoti,

⁴Merayoti wa Zerahiya, Zerahiya wa Uzi, Uzi wa Buki,

⁵Buki wa Abishuwa, Abishuwa wa Finehasi, Finehasi wa Eleyazari, Eleyazari wa Aroni umuherezi mukuru;

⁶uwo Ezira aradūga ava i Babuloni; kandi yar’ umunyabgenge w’ivyanditswe kandi w’umuhanga mu vy’ivyagezwe vya Mose vyatanzwe n’ Uhoraho Imana y’Abisirayeli. Umwami amuha ivyo yamusavye vyose, abiheshwa n’ikiganza c’ Uhoraho Imana yiwe cari kuri we.

⁷Nuko bamwe mu Bisirayeli badūgana n’abaherezi bamwe n’ Abalewi n’abaririmvyi b’abashibamyi n’abahawe ibango ry’ibikorwa vy’urusengero; abo baja i Yerusalemu mu mwaka ugira indwi Aritazeruzi ari ku ngoma.

⁸Nuko Ezira ashika i Yerusalemu mu kwezi kwa gatanu kwo mu mwaka ugira indwi nyene uwo mwami ari ku ngoma.

⁹Yari yahagurutse ava i Babuloni ku musi wa mbere w’ukwezi kwa mbere, maz’ ashika i Yerusalemu ku musi wa mbere w’ukwezi kwa gatanu, abihawe n’ikiganza ciza c’Imana cari kuri we;

¹⁰kuko Ezira yari yarīnāmūye mu mutima kwitwaririka ivyagezwe vy’Uhoraho ngw abishitse, kandi ngo yigishe mu Bisirayeli amabgirizwa n’amatēka.

¹¹Aya majambo n’amwe n’ayo mu cete umwami Aritazeruzi yahaye Ezira umuherezi ari we mwanditsi, mbere yar’ umwanditsi azi amajambo y’ivyagezwe vy’ Uhoraho n’ivyo yashingiye Abisirayeli:

¹²ngo Jewe Aritazeruzi umwami aganza abami, ndakwandikiye Ezira umuherezi, umunyabgenge azi ivyagezwe vy’Imana Nyen’ ijuru: n’amahoro neza?

¹³None nshinze ibgirizwa ryo kurekura abo mu bantu b’ Abisirayeli bose baba mu bihugu vyanje bīgombera ubgabo kujana nawe i Yerusalemu, bo n’abaherezi babo n’Abalewi.

¹⁴Kuko jewe umwami n’abajanama banje ukw ar’ indwi, tugutumye ng’ uje kubaza ivy’ i Buyuda n’i Yerusalemu, nk’ukw ivyagezwe vy’Imana yawe bimeze, ivy’ ufise mu maboko yawe;

¹⁵kandi ng’ ugende ujanye amafeza n’amazahabu, ayo jewe umwami n’abajanama banje twashikaniye Imana y’Abisirayeli iba i Yerusalemu,

¹⁶bo n’amafeza yose n’amazahabu uzosanga mu gihugu c’i Babuloni cose, hamwe n’amashikanwa y’abantu n’ay’ abaherezi, ayo bāshikaniye ingoro y’Imana yabo ir’ i Yerusalemu bivuye ku mitima;

¹⁷ni co gituma ayo mahera ukwiye kugira umwete cane wo kuzoyagura amamasa n’ amapfizi y’intama bo n’imyagazi, hamwe n’amashikanwa y’amafu n’ay’ ibiturire agendana na vyo, ukazobitangira ku gicaniro c’ingoro y’Imana yanyu i Yerusalemu.

¹⁸Kand’ ibizosāguka kur’ ayo mafeza n’amazahabu, mwe na bagenzi banyu muze mubikoreshe uko mubona bikwiye, mukurikiye ivyo Imana yanyu igomba;

¹⁹kand’ ibintu vy’imbombovu uhawe vyo gukoresha mu ngoro y’Imana yawe, uz’ ubishikirize iyo Mana y’i Yerusalemu.

²⁰Kand’ ibintu vyose ingoro y’ Imana yawe izokenera, ivyo uzoba ukwiye gutanga, uz’ uhore ubikūra mu nzu ibīkwamw’ ibintu vyanje.

²¹Kandi jewe umwami Aritazeruzi, mbariye abazezwabintu banje bose bo hakurya y’ uruzi, ku vya Ezira umuherezi, umwanditsi w’ivyagezwe vy’Imana Nyen’ ijuru, yukw ivy’ azobāka vyose bizohora bitanganwa umwete,

²²bikagarukira kw italanto z’ ifeza ijana, n’ingero zitwa koro z’ingano ijana, n’imibindi ya vino ijana, n’imibindi y’amavuta ijana nyene, n’umunyu utarinze kugerwa.

²³Ic’ Imana Nyen’ ijuru izokwaka cose kize gihore kigirirwa ingoro yayo bidatevye, kugira ng’ uburake bgayo ntibube ku gihugu canje n’abahungu banje.

²⁴Kandi turabamenyesha ivy’ abaherezi n’Abalewi, n’abaririmvyi n’abashibamyi, n’abahawe ibango ry’ibikorwa vy’urusengero, n’abakozi bo mur’ iyo ngoro y’ Imana bose uko bangana, ko bitemewe ko bākwa ikori cank’ ikibuguro cank’ ingorore.

²⁵Kandi nawe Ezira, nk’uk’ ubgenge bg’ Imana buri muri wewe, uz’ utore abashingantahe n’abacamanza bo gucīra imanza abantu bose bo hakurya y’uruzi, abazi ivyagezwe vy’Imana yawe bose; n’ūtabizi muze muhore mubimwigisha.

²⁶Maz’ ūtazokwumvira ivyagezwe vy’Imana yawe n’ivyagezwe vyanje umwami, baze bagire umwete wo kumucīra urubanza, ar’ urwo kwicwa, cank’ urwo gucibga, cank’ urwo kunyagwa ivyiwe, cank’ urwo kubohwa.

²⁷Uhoraho Imana ya ba sogokuruza aragahezagirwa, yashize mu mutima w’umwami imigabo imeze irtyo, yo gushariza ingoro y’Uhoraho ir’ i Yerusalemu.

²⁸Kandi ni we yerekanye imbabazi ziwe kuri jewe imbere y’ umwami n’abajanama biwe, n’ imbere y’abaganwa biwe bose bahambaye. Nuko ndemeshwa n’ikiganza c’Uhoraho Imana yanje cari kuri jewe; nca nkoranya abakuru bo mu Bisirayeli ngo tudūgane.