Read Bibliya Yera 1951 Ezira 8 Bible Online

Ezira 8 - Bibliya Yera 1951 bible

Ezira 8

¹Aba ni bo bakuru b’amazu ya ba sekuruza twādūganye tuva i Babuloni, ku ngoma y’umwami Aritazeruzi, kand’ uku ni kwo ba sekuruza badōndōrwa.

²Mu ba Finehasi ni Gerushomu; mu ba Itamari ni Daniyeli; mu ba Dawidi ni Hatushi,

³wo muri bene Shekaniya; mu ba Paroshi ni Zekariya, kandi yandikanywe n’ abagabo ijana na mirongwitanu banditswe mu gitabo kidōndōra ba sekuruza.

⁴Mu ba Pahati‐mowabu ni Elihowenayi mwene Zerahiya, kand’ uwo yandikanywe n’abagabo amajana abiri.

⁵Mu ba Shekaniya ni mwene Yahaziyeli, kand’ uwo yandikanywe n’ abagabo amajana atatu.

⁶Mu ba Adini ni Ebedi mwene Yonatani; uwo yandikanywe n’abagabo mirongwitanu.

⁷Mu ba Elamu ni Yeshaya mwene Ataliya, na we yandikanywe n’abagabo mirongwirindwi.

⁸Mu ba Shefatiya ni Zebadiya mwene Mikayeli, na we yandikanywe n’abagabo mirongumunani.

⁹Mu ba Yowabu ni Obadiya mwene Yehiyeli, na we yandikanywe n’abagabo amajana abiri n’icumi n’umunani.

¹⁰Mu ba Shelomiti ni mwene Yosifiya, na we yandikanywe n’abagabo ijana na mirongwitandatu.

¹¹Mu ba Bebayi ni Zekariya mwene Bebayi nyene, na we yandikanywe n’abagabo mirongwibiri n’ umunani.

¹²Mu ba Azigadi ni Yohanani mwene Hakatani, na we yandikanywe n’abagabo ijana n’ icumi.

¹³Mu ba Adonikamu, ari bo baje hanyuma, aya ni yo mazina yabo: Elifeleti na Yeweli na Shemaya, na bo bandikanywe n’ abagabo mirongwitandatu.

¹⁴Kandi mu ba Bigivayi ni Utayi na Zabudi, na bo bandikanywe n’ abagabo mirongwirindwi.

¹⁵Nuko mbakoraniriza ku ruzi rusēsera muri Ahava, tuhaca insago, tuhamara imisi itatu. Nitegereje abo bantu n’abaherezi, nsanga nta n’umwe wo mu Balewi ari muri bo.

¹⁶Maze ntuma kuri Eliyezeri na Ariyeli na Shemaya na Elinatani na Yaribu na Elinatani wundi na Natani na Zekariya na Meshulamu, ari bo bantu b’abashingantahe, bo na Yoyaribu na Elinatani b’abigisha.

¹⁷Ndaheza ndabatuma kuri Ido w’umushingantahe w’ahītwa i Kasifiya, mbabgira ubutumwa bazomubgira bo na bagenzi biwe babawe ibango ry’ibikorwa vy’ urusengero, aho bāba i Kasifiya nyene, ngo baturungikire abo guhēreza mu ngoro y’Imana yacu.

¹⁸Maze kubg’ ikiganza ciza c’ Imana yacu cari kuri twebge batuzanira umuntu w’umunyabgenge wo mu bandurutse kuri Mahili, Mahili wa Lewi, Lewi wa Isirayeli; batuzanira na Sherebiya n’abahungu biwe na bagenzi biwe ukw ar’ icumi n’umunani,

¹⁹na Hashabiya hamwe na Yeshaya wo mu bandurutse kuri Merari, na bagenzi biwe n’abahungu babo ukw ari mirongwibiri,

²⁰bo n’abo mu bahawe ibango ry’ibikorwa vy’urusengero, abandurutse ku bo Dawidi n’abāmutwarira bāri bāratanze ngo bakorere Abalewi, abanyebango amajana abiri na mirongwibiri, bose badōndwa amazina yabo.

²¹Maze ntāngāriza aho nyene kur’ urwo ruzi Ahava ivyo kwisonzesha, kugira ngo twicishe bugufi imbere y’Imana yacu, ngo tuyisabe iduhe kugira urugendo rwiza, twebge n’abana bacu n’ ibintu vyacu vyose.

²²Kuko vyanteye isoni gusaba umwami umuce w’ingabo n’abagendera ku mafarasi, ngo baze badutabare kwivuna abansi bodutegera mu nzira; kuko twari twabgiye umwami, tut’ Ikiganza c’Imana yacu kiri ku bayitwaririka bose, ngw ibagirire neza; arik’ ububasha bgayo n’uburake birwanya abayireka bose.

²³Nuko turisonzesha, dusaba Imana tuyinginga, iraheza yemera kutwumvira.

²⁴Maze ntora icumi na babiri mu bakuru b’abaherezi, ari bo Sherebiya na Hashabiya, n’abandi cumi muri bagenzi babo.

²⁵Maz’ amafeza n’amazahabu n’ ibintu vy’imbombovu mbigera ku munzane babona, ari vyo vyatanzwekw amashikanwa y’ingoro y’ Imana yacu, ivy’ umwami n’ abajanama biwe n’abaganwa biwe n’Abisirayeli bāriho bose bāshikanye.

²⁶Nuko ndabigera, ndaheza ndabibazēza, ar’ italanto z’ ifeza amajana atandatu na mirongwitanu, n’ibintu vy’imbombovu bicuzwe mu mafeza italanto ijana, n’italanto z’izahabu ijana nyene;

²⁷n’ibikombe vy’izahabu mirongwibiri biciye amahera yitwa dariki igihumbi, n’ibikoreshwa bibiri vy’imiringa myiza isenwe y’ igiciro kinini nk’ic’ izahabu.

²⁸Ndababgira, nti Mwebge mur’ aberejwe Uhoraho, n’ibintu vy’ imbombovu na vyo nyene n’ ivyera, kand’ ayo mafeza n’amazahabu ni yo mashikanwa bashikaniye Uhoraho Imana ya ba sogokuruza bivuye ku mitima.

²⁹Muvyitwaririke mubizigame, kugeza aho muzobigerera ku munzane imbere y’abakuru b’abaherezi n’Abalewi n’abakuru b’ amazu ya ba sogokuruza b’Abisirayeli, mu vyumba vyo mu ngoro y’Uhoraho i Yerusalemu.

³⁰Nukw abaherezi n’Abalewi bākīra ayo mafeza n’amazahabu n’ibindi bintu uk’ urugero rwavyo rwangana, ngo babijane i Yerusalemu mu ngoro y’Imana yacu.

³¹Maze ku musi ugira icumi na kabiri w’ukwezi kwa mbere turahaguruka tuva kur’ urwo ruzi Ahava, ngo tuje i Yerusalemu; ikiganza c’Imana yacu kiba kuri twebge, iradukiza ngo ntitugwe mu maboko y’abansi n’abaturyamiye mu mayira.

³²Dushitse i Yerusalemu turuhuka imisi itatu.

³³Maze ku musi ugira kane bagera ku munzane ayo mafeza n’ amazahabu n’ibindi bintu, babigerera mu ngoro y’Imana yacu, babishikiriza Meremoti mwene Uriya umuherezi, ari kumwe na Eleyazari mwene Finehasi, kandi bari bafatanije na Yozabadi mwene Yosuwa na Nowadiya mwene Binuwi, b’Abalewi.

³⁴Vyose barabiharūra ukw igitigiri cavyo n’ukuriba kwavyo vyangana. Ico gihe nyene ukuriba kwavyo kwose kurandikwa.

³⁵Maz’ abāgarutse bavuye mu kinyago bosereza Imana y’Abisirayeli ibimazi; batanga amamasa cumi n’abiri kw ikimazi c’Abisirayeli bose, n’amapfizi y’ intama mirongwicenda n’atandatu, n’imyagazi y’intama mirongwirindwi n’indwi; batanga n’amasuguru y’impene cumi n’abiri kw ikimazi gitangirwa ivyaha; ivyo vyose vyabaye ikimazi coserezwa Uhoraho.

³⁶Maz’ amajambo y’ umwami bayashikiriza ivyēgēra vyiwe n’abaganza hakuno y’uruzi, na bo batanga ivyo gufasha abantu bo n’ingoro y’Imana.