Read Bibliya Yera 1951 Nehemiya 1 Bible Online

Nehemiya 1 - Bibliya Yera 1951 bible

Nehemiya 1

¹Amajambo ya Nehemiya mwene Hakaliya. Mu kwezi kwa Kisilevu, mu mwaka ugira mirongwibiri, nari nsanzwe ndi ku murwa i Shushani.

²Maze Hanani, umwe wo muri bene wacu, araza azananye n’abantu bamwe bavuye i Buyuda. Mbabaza inkuru z’amasigarira y’ Abayuda, abāri barasigaye batajanywe ar’ inyagano, mbabaza n’ inkuru z’i Yerusalemu.

³Barambgira, bat’ Abāri barasigaye mur’ ico gihugu batājanywe ar’ inyagano bari n’amarushwa menshi n’ibitētērwa, kand’ inzitiro z’ amabuye z’i Yerusalemu zarasenyutse, n’amarembo yaho yarahiye.

⁴Nuko mmaze kwumva izo nkuru nca nicara ngaho ndarira, mmara imisi mbabaye nisonzesha, nsengera imbere y’Imana Nyen’ ijuru.

⁵Ndavuga, nti Ndakwinginze, ewe Uhoraho, Mana Nyen’ ijuru, Mana nkuru uteye ubgoba, ukagumya isezerano n’ imbabazi ugirira abagukunda bakitondera ivyagezwe vyawe.

⁶None tega ugutwi kwawe wumvirize, tereza n’inyonga zawe witegereze, kugira ngo wumve ugusenga kwanje, jewe umusavyi wawe nsengera imbere yawe mur’ iyi misi ku murango no mw ijoro, nkwingingira abasavyi bawe b’ Abisirayeli, nātura ivyaha twebge Abisirayeli twagucumuyeko; mbere twe n’inzu ya data twaracumuye.

⁷Eka twaragucumuyeko bikomeye, ntitwitondeye ivyagezwe vyawe n’ivyo washinze n’amabgirizwa yawe, ivyo wageze umusavyi wawe Mose.

⁸Ni wibuke ijambo wabariye umusavyi wawe Mose, uti Ni mwandyaruka nzobashwiragiriza mu mahanga;

⁹ut’ Ariko ni mwampindukirira, mukitondera ivyagezwe vyanje mukabishitsa, nah’ abirukanywe bo muri mwebge bazoba bar’ iy’ ijuru riherera, uti Sinobura kubakūrayo nkabēgeranya, nkabazana ha hantu nitoranirije ngw izina ryanje rihabe.

¹⁰None rero, abo ni bo basavyi bawe, kandi n’abantu bawe wacunguje ububasha bgawe bginshi bo n’ukuboko kwawe kw’ inkomezi.

¹¹Bgirukiro, ndakwinginze, tega ugutwi wumve ugusenga kwanje, jewe umusavyi wawe, wumve n’ugusenga kw’ abasavyi bawe bakunda kwubaha izina ryawe, untabare jewe umusavyi wawe, umpe kugira amahirwe uyu musi, no guhangazwa n’uwo muntu nsavye. Kuko nari nsanzwe nd’ umukevyi mpereza umwami igiturire.