Read Bibliya Yera 1951 Nehemiya 12 Bible Online

Nehemiya 12 - Bibliya Yera 1951 bible

Nehemiya 12

¹ Aba ni bo baherezi n’Abalewi bādūganye na Zerubabeli mwene Sheyalitiyeli na Yosuwa; ni Seraya na Yeremiya na Ezira,

²na Amariya na Maluki na Hatushi,

³na Shekaniya na Rehumu na Meremoti,

⁴na Ido na Ginetoyi na Abiya,

⁵na Miyamini na Mahadiya na Biliga,

⁶na Shemaya na Yoyaribu na Yedaya,

⁷na Salu na Amoki na Hilukiya na Yedaya wundi. Abo ni bo bār’ abakuru b’abaherezi na bagenzi babo mu gihe ca Yosuwa.

⁸Kand’ Abalewi ni Yosuwa na Binuwi na Kadimiyeli na Sherebiya na Yuda na Mataniya; Mataniya uwo, bo na bagenzi biwe, ni bo baterera abandi indirimbo z’ ishimwe;

⁹kandi bagenzi babo Bakibukiya na Uno bākūranwa na bo, bahāna imbu.

¹⁰Yosuwa yavyaye Yoyakimu, Yoyakimu avyara Eliyashibu, Eliyashibu avyara Yoyada,

¹¹Yoyada avyara Yonatani, Yonatani avyara Yaduwa.

¹²Abaherezi bo mu gihe ca Yoyakimu b’abakuru b’amazu ya ba sekuruza n’aba: mu ba Seraya ni Meraya; mu ba Yeremiya ni Hananiya;

¹³mu ba Ezira ni Meshulamu; mu ba Amariya ni Yehohanani;

¹⁴mu ba Maluki ni Yonatani; mu ba Shebaniya ni Yosefu;

¹⁵mu ba Harimu ni Adina; mu ba Merayoti ni Helikayi;

¹⁶mu ba Ido ni Zekariya; mu ba Ginetoni ni Meshulamu;

¹⁷mu ba Abiya ni Zikuri; mu ba Minyamini no mu ba Mohadiya ni Pilitayi;

¹⁸mu ba Biliga ni Shamuwa; mu ba Shemaya ni Yehonatani;

¹⁹mu ba Yoyaribu ni Matenayi; mu ba Yedaya ni Uzi;

²⁰mu ba Salayi ni Kalayi; mu ba Amoki ni Eberi;

²¹mu ba Hilukiya ni Hashabiya; mu ba Yedaya ni Netaneli.

²²Mu Balewi, abakuru b’amazu ya ba sekuruza banditswe mu gihe ca Eliyashibu na Yoyada na Yohanani na Yaduwa; abaherezi na bo banditswe ku ngoma ya Dariyo Umuperesi.

²³Abandurutse kuri Lewi bo mu bakuru b’amazu ya ba sekuruza bari banditswe mu gitabo c’ivyo ku ngoma, kugeza igihe ca Yohanani mwene Eliyashibu.

²⁴Kand’ abakuru b’ Abalewi ni Hashabiya na Sherebiya na Yosuwa mwene Kadimiyeli na bagenzi babo, bari bashinzwe guhimbaza Imana no kuyishima, bakurikiye ibgirizwa rya Dawidi umuntu w’Imana, bahāna imbu.

²⁵Mataniya na Bakibukiya na Obadiya na Meshulamu na Talimoni na Akubu bar’ abashibamyi barinda amazu y’ububīko yo ku marembo.

²⁶Abo ni bo bāriho mu gihe ca Yoyakimu mwene Yosuwa, Yosuwa wa Yehozadaki, no mu gihe ca Nehemiya icēgēra c’umwami, na Ezira umuherezi, ari we munyabgenge w’ivyanditswe.

²⁷Igihe bāshikiriza Imana uruzitiro rw’i Yerusalemu, bāhamagaye Abalewi aho bāba hose, ngo baze i Yerusalemu ku musi mukuru wo kurushikiriza Imana banezerewe, ngo bashimishe indirimbo bafise n’ivyo kuvuza vyitwa matowazi bo n’amakembe n’inanga.

²⁸Nukw abaririmvyi barakorana bava mu biyaya bikikije i Yerusalemu no mu mihana y’ Abanetofati,

²⁹n’i Beti‐gilugali no mu misozi y’i Geba n’i Azimaveti, kukw abaririmvyi bari biyubakiye imigerero impande zose z’i Yerusalemu.

³⁰Nukw abaherezi n’Abalewi bariyeza, maze beza abantu n’amarembo n’uruzitiro.

³¹Maze nuriza abakuru b’Abayuda ngo baje hejuru ku ruzitiro, ndabagabanyamw’ imice ibiri minini ngo bagende barōngōye bahimbaza. Umuce umwe ugenda ku ruzitiro werekeye i buryo, kw irembo bacishamw’ umwavu.

³²Bakurikirwa na Hoshaya n’ igice kimwe c’abakuru b’Abayuda,

³³na Azariya na Ezira na Meshulamu,

³⁴na Yuda na Benyamini na Shemaya na Yeremiya,

³⁵n’abahungu b’abaherezi bamwe bafise inzumbete: Zekariya mwene Yonatani, Yonatani wa Shemaya, Shemaya wa Mataniya, Mataniya wa Mikaya, Mikaya wa Zakuri, Zakuri wa Asafu;

³⁶na bagenzi biwe Shemaya na Azareli na Milalayi na Gilalayi na Mahayi na Netaneli na Yuda na Hanani, bari bafise ibintu vyo kuvuza vyar’ ivya Dawidi umuntu w’Imana; kandi Ezira umunyabgenge w’ ivyanditswe yar’ abagiye imbere;

³⁷baca kw irembo rija kw iriba batumbera imbere yabo, badūgira ahadondagirwa haja mu gisagara ca Dawidi, ah’ uruzitiro rudūgira haruguru y’ingoro yar’ iya Dawidi, bashika kw irembo ry’amazi ryerekeye i burasirazuba.

³⁸Uwundi muce w’abagenda bahimbaza ugenda kubasanganira, nanje nari mbakurikiye ndi kumwe n’ikindi gice c’abantu; nuko bagenda hejuru ku ruzitiro, haruguru y’umunara w’amatanure, bashika no ku ruzitiro rw’intimba nini.

³⁹Maze baca haruguru y’irembo ry’Abefurayimu no kw irembo rya kera, no kw irembo ryitwa iry’ Amafi, no ku munara wa Hananeli, no ku wa Hameya, bashika kw irembo ry’intama; nuko bahagarara kw irembo ry’abateramyi.

⁴⁰Maz’ iyo mice yompi y’abagenda bahimbaza ija guhagarara mu ngoro y’Imana, nanje nyene twe n’umuce w’abakuru twari kumwe,

⁴¹bo n’abaherezi Eliyakimu na Mayaseya na Minyamini na Mikaya na Eliyowenayi na Zekariya na Hananiya bafise inzumbete;

⁴²na Mayaseya na Shemaya na Eleyazari na Uzi na Yehohanani na Malakiya na Elamu na Ezeri. Maz’ abaririmvyi baririmba ijwi rirenga, Yezirahiya ni we yabarōngōra.

⁴³Uwo musi batanga ibimazi vyinshi, baranezerwa kukw Imana yar’ ibateye umunezero mwinshi; kandi n’abagore n’ abana baranezerwa, bituma umunezero ur’i Yerusalemu wumvikana kure.

⁴⁴Kur’ uyo musi batoranya abantu bo kuzezwa ivyumba vy’ ububīko vyo kubīkamw’ amashikanwa azunguzwa, n’ay’ umushuzo, n’ay’ ibigiracumi, kugira ngo bayashingure muri vyo, abe imituri y’abaherezi n’Abalewi, nk’ uko vyashinzwe mu vyagezwe, ukw imirima yo mu bisagara yangana, kukw Abayuda banezerejwe n’ukw abaherezi n’Abalewi bari kw ibango ryabo,

⁴⁵bagatako bakagenda bahāna imbu mu gukorera Imana yabo no mu kwiyeza. Kand’ abaririmvyi n’abashibamyi ni ko bāgenza, bakurikiye icagezwe ca Dawidi n’ic’ umuhungu wiwe Salomo.

⁴⁶Kuko kera mu gihe ca Dawidi na Asafu hārih’ abarōngōzi b’abaririmvyi, hakabaho n’indirimbo zo guhimbaza Imana no kuyishima.

⁴⁷Kandi mu gihe ca Zerubabeli na Nehemiya Abisirayeli bātanga imituri y’abaririmvyi n’iy’ abashibamyi, nk’uko vyashinzwe ku musi n’umusi; bakongera bagaha Abalewi ivyejejwe, Abalewi na bo bakabihakw abo kuri Aroni.