Read Bibliya Yera 1951 Esiteri 4 Bible Online

Esiteri 4 - Bibliya Yera 1951 bible

Esiteri 4

¹Nuko Moridekayi amenye ibibaye vyose ivy’ ari vyo, yitantamurirakw impuzu ziwe, yambara igunira, yisūrirakw iminyota, arasohoka aja mu gisagara hagati, aborogesha ijwi rirenga ry’ umubabaro.

²Arinda ashika n’ inyuma y’ikirimba c’i bgami: kukw ata wemererwa guca mu kirimba c’i bgami yambaye igunira.

³Kandi mu gihugu cose, ah’ icagezwe c’umwami n’iteka ryiwe bishitse, hāba amaborogo menshi mu Bayuda, no kwisonzesha, n’ amarira, n’ugutaka; kandi benshi bācura imirambararo bari mu magunira no mu minyota.

⁴Maz’ incoreke za Esiteri n’ inkone ziwe baraza barabimubarira; umwamikazi arababara cane: arungikira Moridekayi imyambaro yo kumwambika, ngo bamwambure igunira: ariko ntiyavyemera.

⁵Nuko Esiteri ahamagaza Hataki, umwe mu nkone z’umwami, uwo umwami yamuhaye ngw amutume, amutuma kuri Moridekayi amwihanikirije, ngw amubaze ibibaye ivy’ ari vyo n’inyanduruko yavyo.

⁶Nuko Hataki arasohoka agenda kuri Moridekayi, aho yar’ ari ahantu hiyaguye ku murwa, mw irasukiro ry’ikirimba c’i bgami.

⁷Moridekayi amudōndera vyose ivyamubayeko, n’igitigiri c’amahera uko kingana Hamani yasezeranye gutanga ngw aje mu bubīko bg’ umwami, ayatanze kugira ngw ageseze Abayuda.

⁸Amuha n’ ikopi y’ivyanditswe vy’iryo teka ryamamajwe i Shushani ryo kubageseza, ngw ayereke Esiteri, abimusobanurire; aheze amwihanikirize ngw aje ku mwami, amwinginge, atakambire ubgoko bgabo kuri we.

⁹Nuko Hataki aragaruka, abarira Esiteri amajambo ya Moridekayi.

¹⁰Maze Esiteri avugana na Hataki amurungikana amajambo kuri Moridekayi,

¹¹at’ Ereg’ abamenyekana b’umwami bose, n’abantu bo mu bihugu vy’umwami, barazi yuk’ umuntu wese, ar’ umugabo cank’ umugore, yosanga umwami mu karusha, adahamagawe, har’ icagezwe kimwe gusa kuri ben’ uwo, n’ukwicwa; shit’ umuntu umwami atunze inkoni y’izahabu y’ubugabe bgiwe: bibaye birtyo, uwo ni we akira. Ariko jeho mmaze imisi mirongwitatu ntararengukishwa n’umwami.

¹²Nuko babgira Moridekayi amajambo ya Esiteri.

¹³Maze Moridekayi na we arabatuma yishura Esiteri, ati Ntugire ngo ni wewe wenyene uzokira mu Bayuda bose, kuk’ uri mu ngoro y’umwami.

¹⁴Kuko ni wapfa kwiyumya mur’ iki gihe, nta kizobuza Abayuda gutabarwa bakarokoka, ariko bivuye ahandi; ariko weho n’ab’ inzu ya so muzohona. Nta wubizi, kumbure icakwimitse ng’ube umwamikazi n’ ukugira ng’ uz’ useruke mu gihe gisa n’iki!

¹⁵Maze Esiteri arabatuma yishura Moridekayi,

¹⁶ati Genda ukoranirize hamwe Abayuda bose bar’ i Shushani, mwisonzeshe kubganje, mumare imisi itatu ku murango no mw ijoro mutagira ico murya canke munywa; nanje twe n’incoreke zanje tuzokwisonzesha durtyo nyene, mpeze mbone gushika ah’ umwami ari, nah’ ar’ uguca mu cagezwe: kandi namba ndamukiwe no gupfa, mpfe!

¹⁷Nuko Moridekayi aragenda, akora vyose nk’uko Esiteri yamugeze.