Read Bibliya Yera 1951 Esiteri 5 Bible Online

Esiteri 5 - Bibliya Yera 1951 bible

Esiteri 5

¹Bukeye ku musi ugira gatatu, Esiteri yambara imyambaro yiwe y’ubgamikazi, aragenda ahagarara mu karusha ko ku ngoro y’umwami, aharābana n’iyo ngoro nyene; kand’ umwami yar’ avyagiye ku ntebe yiwe y’ubgami mu ngoro, atumberanye no mw irebe.

²Nuk’ umwami abonye umwamikazi Esiteri ahagaze mu karusha, Esiteri agira ubutoni imbere yiwe; umwami atunga Esiteri inkoni y’ izahabu yar’ afise mu minwe. Maze Esiteri aca yīgira hafi, akora ku mutwe w’iyo nkoni.

³Nuk’ umwami aramubaza, at’ Uragomba iki ga mwamikazi Esiteri? Urasaba iki? Ndakiguha, n’iyo coba igisate c’igihugu canje.

⁴Esiteri aramwishura, ati Mwami, ni wavyemera, uyu musi wozanana na Hamani ku giturire mbīteguriye.

⁵Nuk’ umwami aravuga, ati Ni munyarukane Hamani, kugira ngo bibe nk’uko Esiteri avuze. Nuk’ umwami na Hamani baja ku giturire Esiteri yiteguye.

⁶Bakiri ku giturire ca vino, umwami abaza Esiteri, at’ Ico usaba n’iki, ukagihabga? Urondera iki? N’iyo coba igisate c’igihugu canje uragihabga.

⁷Esiteri aramwishura, at’ Ico nsaba kandi ndondera n’iki:

⁸namba ngize ubutoni imbere yawe, mwami, ukemera kumpa ico nsaba, no gushitsa ico ndondera, mwokwongera kuza, mwe na Hamani, ku giturire nzobītegurira; kand’ ejo ico uvuze nzogikora, mwami.

⁹Nuk’ uwo musi Hamani asohoka ahimbawe, afise akanyamuneza mu mutima; arikw abonye Moridekayi ku kirimba i bgami, atamuhagurukiye canke ngw amuroresheko n’ijisho, bimutera gushungumirwa cane.

¹⁰Yamara Hamani ariyumanganya, arataha; atuma guhamagara abagenzi, n’umugore wiwe Zereshi.

¹¹Nuko Hamani abīgānira ukw atunze, n’uko bimuhaye icubahiro, n’ abana biwe ingen’ ari benshi, n’ ingen’ umwami yamushize hejuru muri vyose, kandi ko yamukujije kuruta abaganwa b’umwami n’ abamenyekana biwe.

¹²Hamani arongera arababgira, ati Kandi n’umwamikazi Esiteri nta wundi yakundiye kwinjirana n’umwami ku giturire yiteguye atari jewe; mbere n’ubu yantumiye ngo n’ejo nze njane n’umwami.

¹³Arikw ivyo vyose nta co bimmariye, nkibona wa Muyuda Moridekayi yicaye ku kirimba i bgami.

¹⁴Nuk’ umugore wiwe Zereshi n’abagenzi biwe bose bamugīra inama, bati Ni bashinge igiti c’intambge mirongwitanu z’ukuboko uciriye mu nkokora, maz’ ejo uz’ usabe umwami atange Moridekayi bakimumanikeko; uheze ubone kwinjirana n’umwami ku giturire unezerewe. Nuko Hamani ashima iyo nama; aca ashingisha ico giti.