Read Bibliya Yera 1951 Esiteri 7 Bible Online

Esiteri 7 - Bibliya Yera 1951 bible

Esiteri 7

¹Nuk’ umwami na Hamani baza gusangira n’umwamikazi Esiteri.

²Maze kur’ uwo musi ugira kabiri wo kunywa igiturire ca vino, umwami yongera kubaza Esiteri, at’ Ico usaba n’iki ga mwamikazi Esiteri, ukagihabga? Urondera iki? N’iyo coba igisate c’igihugu canje uragihabga.

³Maz’ umwamikazi Esiteri aramwishura, ati Namba ngize ubutoni imbere yawe, mugenzi, ukavyemera, mwami, nsabiye agatwe kanje, nsabiye n’ubgoko bgacu;

⁴kuko twe n’ubgoko bgacu twaguzwe, ngo tugesezwe, twicwe, duhone. Iyo tuba twaraguzwe ngo tuje mu buja gusa, nocereje, kuko naho vyodukomereye cane, sinorinze kugora umwami.

⁵Maz’ umwami Ahasuwerusi abaza umwamikazi Esiteri, ati Ni nde yubahutse kwīgīra inama nk’iyo, kand’ ari hehe?

⁶Esiteri aramwishura, ati N’umubisha kandi n’umwansi, ni we uyu muyobe Hamani! Maze Hamani acikira ivutu imbere y’umwami n’umwamikazi.

⁷Umwami aca ahagurukana uburake, ava ku giturire ca vino, arasohoka aja mu nyubakwa yo ku ngoro; Hamani na we ava hasi ngw asabire agatwe kiwe ku mwamikazi Esiteri; kuko yar’ abonye k’umwami amaramaje kumwica.

⁸Maz’ umwami aragaruka, avuye mu nyubakwa yo ku ngoro, yinjira ha handi hār’ igiturire ca vino: asanga Hamani yikubise ku musegamuro Esiteri yariko. Umwami aravuga, ati Mbeg’ agira ngw afatire n’umwamikazi mu ngoro yanje aho mbona? Iryo jambo rikiva mu kanwa k’umwami, Hamani bamupfuka mu maso.

⁹Maze Haribona, umwe mu nkone zama hafi y’umwami, aravuga, at’ Ushime mbere kwa Hamani hashinze igiti c’intambge mirongwitanu z’ukuboko uciriye mu nkokora, ico Hamani yagereye Moridekayi, kand’ ari we yavuze ijambo ryākijije umwami. Umwami aravuga, ati Mube ari co mumumanikako.

¹⁰Nuko Hamani bamumanika kur’ ico giti nyene yari yiteguriye Moridekayi. Maz’ uburake bg’umwami burahwama.