Read Bibliya Yera 1951 Kuvayo 1 Bible Online

Kuvayo 1 - Bibliya Yera 1951 bible

Kuvayo 1

¹Aya ni yo mazina ya bene Isirayeli bagiye muri Egiputa, bajanye na Yakobo, umuntu wese ajana n’abo mu rugo rwiwe:

²Reyubeni, na Simeyoni, na Lewi, na Yuda,

³na Isakari, na Zebuloni, na Benyamini,

⁴na Dani, na Nafutali, na Gadi, na Asheri.

⁵Abantu bose bāndurutse mu rura rwa Yakobo bari mirongwirindwi, hakora Yosefu yar’ asanzwe ari muri Egiputa.

⁶Nuko Yosefu arapfa, n’abo bavukana bose barapfa, bo n’ urunganwe rwose rw’ico gihe.

⁷Abisirayeli bararondoka, baravyara cane, baragwira, baba igisata; buzura ico gihugu.

⁸Nuko muri Egiputa hima uwundi mwami, atigeze kumenya ivya Yosefu.

⁹Maz’ abarira abantu biwe, ati Rāba Abisirayeli bahindutse ihanga rituruta mu bginshi riturusha n’inkomezi.

¹⁰Enda tubaronderere inama y’ubgenge, kugira ngo boye kugwira, bakazohava bīfatanya n’abansi bacu, haramutse habaye intambara, bakaturwanya, bakava mur’ iki gihugu.

¹¹Nuko babaha abo kubakebera ibikebere ngo babatwaze ituntu babīkoreze ibiremereye. Bubakira Farawo ibisagara vyitwa Pitomu na Ramusesi vy’ibigega.

¹²Ariko, uko barushiriza kubatwaza ituntu, na bo ni ko barushiriza kugwira no kugasāra; nukw Abanyegiputa karabarya mu nda kubg’ Abisirayeli.

¹³Bacuranguza Abisirayeli barabacumukuza,

¹⁴batuntuza imitima yabo kubgo kubakoresha ibikorwa bitamisha, vyo mu rwondo no mu matafari n’ibikorwa vyose vyo mu ndimiro, ivyo babakoresha vyose, babacuranguza babacumukuza.

¹⁵Hārih’ abākirizi bākīra Abaheburayokazi, umwe yitwa Shifura, uwundi yitwa Puwa: nuk’ umwami wa Egiputa arababarira,

¹⁶ati Ni mwākīra abagore b’Abaheburayo, mwitegereze neza ikivutse: ni havuka umuhungu, muze mwame mumuniga, ariko ni yaba umukobga mumureke.

¹⁷Arikw abo bākirizi bubaha Imana, ntibagira nk’uk’ umwami wa Egiputa yabageze, bareka n’ abana b’abahungu.

¹⁸Maz’ umwami wa Egiputa ahamagaza abo bākirizi, arababaza, ati N’iki catumye mukora murtyo, mukareka abana b’abahungu?

¹⁹Abākirizi bishura Farawo, bati N’ ukw abagore b’Abaheburayo batamera nk’ab’ Abanyegiputa, kuko banyarutsa, bakavyara umwākirizi atarabashikīra.

²⁰Imana igirira neza abo bākirizi; iryo hanga rica riragwira, riba igisata.

²¹Kandi kukw abo bākirizi bubashe Imana, ibaha uruvyaro.

²²Farawo araheza abarira abantu biwe bose, at’ Umuhungu wese azovuka, muze mumute mu ruzi, arik’ umukobga mumureke.