Read Bibliya Yera 1951 Kuvayo 10 Bible Online

Kuvayo 10 - Bibliya Yera 1951 bible

Kuvayo 10

¹Uhoraho abarira Mose, ati Ja kwa Farawo; kuko nkomantaje umutima wiwe, n’iy’ abantu biwe, kugira ngo nerekanire ibi bimenyetso vyanje hagati muri bo,

²no kugira ngo nawe uz’ udondere umwana wawe n’umwuzukuru wawe ukuntu namāramāje Abanyegiputa, n’ibimenyetso vyanje nakoreye hagati muri bo; mumenye yuko nd’ Uhoraho.

³Mose na Aroni baja kwa Farawo, baramubgira, bat’ Uku ni k’ Uhoraho, Imana y’Abaheburayo, agize, ng’ Uzogeza ryari kwanka kwicisha bugufi imbere yiwe? Ngo Reka abantu biwe, bagende bamusabe.

⁴Ngo Na ho ni wanka kubarekura, ejo ngw azorekura inzige, zihēre ku rubibe rwawe,

⁵zizimanganye igihugu, umuntu ntashobore kubona hasi: zizorya ivyasigaye vyakize, ivyo rwa rubura rwabasigarije, zirye n’igiti canyu cose cameze ku gahinga.

⁶Zizokwuzura ingoro zawe, n’inzu z’abanyarugo bawe bose, n’iz’ Abanyegiputa bose: izo ba so na ba sogokuru batigeze kubona, uhereye igihe babereyeho, ukageza n’ubu. Nuko Mose arahindukira, ava imbere ya Farawo.

⁷Maz’ abantu ba Farawo baramubaza, bati Mbeg’ uriya azogeza ryari kutubera icago? Reka abo bantu bagende, baje gusaba Uhoraho Imana yabo: aho nturabona ko Egiputa hapfuye?

⁸Bagarura Mose na Aroni kuri Farawo; arababgira, ati Ni mugende, muje gusaba Uhoraho Imana yanyu: arikw abazogenda n’abaki n’abaki?

⁹Mose aramwishura, ati Tuzojana n’abana n’abatāma, n’abahungu bacu n’ abakobga, mbere n’imikuku yacu n’amasho tuzobijana: kuko dukwiye kugirira Uhoraho umusi mukuru.

¹⁰Arabishura, ati Yemwe ga ye, Uhoraho abane namwe nkabarekura, ngo mujane n’abana banyu! Ni mwiyubare, kukw ivyo mugabiye ari bibi!

¹¹Ivyo ntibishoboka; mwebge abagabo ni mugende, muje gusaba Uhoraho, kukw ar’ ico murondera! Babirukana imbere ya Farawo.

¹²Maz’ Uhoraho abarira Mose, ati Ramvura ukuboko kwawe hejuru y’igihugu ca Egiputa, haze inzige, zize mu gihugu ca Egiputa, zirye icameze cose mu gihugu, mber’ ivyo rwa rubura rwasize vyose.

¹³Mose atunga ya nkoni yiwe hejuru y’igihugu ca Egiputa, Uhoraho azana umuyaga mur’ ico gihugu uvuye i burasirazuba, wiriza umusi ukesha ijoro; bukeye, uwo muyaga uvuye i burasirazuba uzana inzige.

¹⁴Zirasenyuka ziza mu gihugu ca Egiputa hose, zigwa mu gihugu iyo kiva kikagera; zar’ icago gikomeye cane: uhereye kera hose ntihigeze kubah’ inzige nk’izo, kandi ntihazokwongera kuboneka izingana na zo.

¹⁵Zizimanganya igihugu cose, bituma igihugu gicura umwiza; zirya icameze cose mu gihugu, n’ivyamye ku biti vyose, ivyo rwa rubura rwashigaje: mu gihugu cose ca Egiputa ntihasigara ikintu na kimwe gitotahaye, naho coba igiti cank’ ikindi cose cameze ku gahinga.

¹⁶Farawo ni kwo guhamagaza Mose na Aroni vuba; arababarira, ati Nacumuye k’Uhoraho Imana yanyu no kuri mwebge.

¹⁷None rero ndakwinginze, icaha canje ukimparire iri rimwe gusa, munyingingire Uhoraho Imana yanyu, ankūrek’ uru rupfu iri rimwe gusa.

¹⁸Nuko Mose arasohoka, ava imbere ya Farawo, atakambira Uhoraho.

¹⁹Uhoraho ahindura umuyaga uva i burengerazuba, w’igihuhuta gikomeye cane, utwara za nzige, uzisuka mu Kiyaga Gitukura: ntihasigara na rumwe mu gihugu cose ca Egiputa.

²⁰Yamar’ Uhoraho akomantaza umutima wa Farawo, ntiyarekura Abisirayeli ngo bagende.

²¹Uhoraho abarira Mose, ati Tunga ukuboko kwawe mw ijuru, umwiza ucure mu gihugu ca Egiputa, umwiza umeze nk’ikintu cokabakabga.

²²Mose atunga ukuboko mw ijuru, umwiza w’ umuzitanya ucura mu gihugu cose ca Egiputa, umara gatatu;

²³ntihāgira ūbona uwundi, canke ngo hagire ūhaguruka ngw ave ah’ ari, bimara gatatu: ariko mu mazu y’ Abisirayeli bose ho hārabona.

²⁴Farawo ahamagaza Mose, aramubarira, ati Nuko ni mugende, muje gusaba Uhoraho; n’abana banyu na bo mubajane: mugabo imikuku yanyu n’amasho yanyu vyo bisigare.

²⁵Mose aramwishura, at’ Ukwiye no kutwemerera ivyo tuzokūramw’ ibimazi vyo gushikana n’ivyo kwosa, ngo tubone guha Uhoraho Imana yacu ibimazi.

²⁶Itunga ryacu rikwiye kujana natwe: ntihazosigara n’ urwara; kukw ari ryo dukwiye kuzokwābirakw ivyo guhēreza Uhoraho Imana yacu. Kandi ntituzi ivyo tuzohēreza Uhoraho uko bingana tutarashikayo.

²⁷Arik’ Uhoraho akomantaza umutima wa Farawo, ntiyemera kubarekura ngo bagende.

²⁸Farawo abarira Mose, ati Mva i ruhande! Uzire akaziri, ntuze wongere kungaruka mu maso, kuk’ umusi uzosubira kungaruka mu maso uzopfa!

²⁹Mose aramwishura, at’ Uvuze ko: sinzosubira kukugaruka mu maso ukundi.