Read Bibliya Yera 1951 Kuvayo 14 Bible Online

Kuvayo 14 - Bibliya Yera 1951 bible

Kuvayo 14

¹Uhoraho abarira Mose,

²ati Barira Abisirayeli bakebanuke, basagaze imbere y’i Pi‐hahiroti, hagati y’i Migidoli n’ikiyaga, aharābana n’i Bayali‐sefoni: aharābana n’aho hantu abe ari ho musagaza, i ruhande y’ikiyaga.

³Farawo ahava yiyumvira ku Bisirayeli, ngw igihugu baciyemwo bāhuvye: ubugaragwa bubataye mu mbombane.

⁴Maz’ umutima wa Farawo ngira ndawukomantaze, abakurikire; nanje nzokwiheshereza icubahiro kuri Farawo no ku ngabo ziwe zose, kand’ Abanyegiputa bazomenya ko nd’ Uhoraho. Nukw Abisirayeli babigenza bartyo.

⁵Maz’ umwami wa Egiputa bamubarira yukw abo bantu bacitse. Farawo n’abamenyekana biwe baragarwa kubg’ abo bantu, barabazanya, bati Mbega twakoze ibiki, kurekura Abisirayeli ngo bagende, ntibabe bakidukorera?

⁶Azirikisha umukogote wiwe ku mafarasi, ajana n’ingabo ziwe;

⁷ajana n’imikogote amajana atandatu y’indobanurwa, n’iyindi mikogote yose yo muri Egiputa, n’ abagabisha bagaba abagendera muri yo baja mu ntambara.

⁸Nuk’ Uhoraho akomantaza umutima wa Farawo umwami wa Egiputa, akurikira Abisirayeli: kand’ abo Bisirayeli bāri bavuyeyo babakobagurije.

⁹Nukw Abanyegiputa barabakurikira, bari n’amafarasi n’ imikogote vyose vya Farawo, n’ abagendera ku mafarasi, n’izindi ngabo ziwe, babahambiriza aho bashagaje hafi y’ikiyaga, i ruhande y’i Pi‐hahiroti, aharābana n’i Bayali‐sefoni.

¹⁰Farawo abegereje, Abisirayeli bunamura amaso, babona Abanyegiputa babōmye inyuma, baranduka imitima; maze batakambira Uhoraho.

¹¹Babaza Mose, bati Mbega nta mva zari muri Egiputa, mu kutuzana gupfira mu bugaragwa? N’iki catumye utugirira urtyo, kudukūra muri Egiputa?

¹²Iki si co twakubgira tukiri muri Egiputa, tuti Tureke, dukorere Abanyegiputa? Kukw iciza, kwar’ uko dukorera Abanyegiputa, hāko dupfira mu bugaragwa.

¹³Mose yishura abantu, ati Nta co mutinya: mwihagararire gusa, murābe agakiza Uhoraho agira ngw abazanire uyu musi: kukw Abanyegiputa mubonye uyu musi mutazokwongera kubabona ukundi.

¹⁴Uhoraho ni we agira ngw abarwanire, namwe ni mwinumire gusa.

¹⁵Uhoraho abaza Mose, ati N’iki gitumye untakira? Barira Abisirayeli bakomeze bagende.

¹⁶Nawe umanike inkoni yawe, uramvure ukuboko hejuru y’ikiyaga, ugitandukanye: Abisirayeli bace hagati mu kiyaga nko ku musozi.

¹⁷Nanje rāba, ndakomantaza imitima y’Abanyegiputa, na bo bahace, babakurikire; maze mbone kwihesha icubahiro kuri Farawo no ku ngabo ziwe zose, no ku mikogote yiwe, no ku bagendera ku mafarasi biwe.

¹⁸Abanyegiputa ni ho bazomenya yuko nd’ Uhoraho, ni namara kwihesha icubahiro kuri Farawo no ku mikogote yiwe, no ku bagendera ku mafarasi biwe.

¹⁹Maz’ umumarayika w’Imana yahora abagenda imbere, avayo, agaruka inyuma yabo; ya nkingi y’igicu iva imbere yabo, iraza ihagarara inyuma yabo,

²⁰ija hagati y’ingabo z’Abanyegiputa n’iz’ Abisirayeli; ku ruhande rwa bamwe hubikiza igicu, hacura umwiza, ku ruhande rw’abandi haba umuco wo kubonesha mw ijoro: ntibāruha bēgerana iryo joro ryose.

²¹Nuko Mose aramvura ukuboko hejuru y’ikiyaga; Uhoraho ahuhutisha umuyaga mwinshi uvuye i burasirazuba, ukēsha ijoro ryose, usubiza ikiyaga inyuma, amazi ayagabanyamwo kubiri, ahindura ikiyaga ahūmūtse.

²²Maz’ Abisirayeli baca hagati mu kiyaga nk’abaca ku musozi; amazi ababera nk’umurombero i buryo n’i bumoso.

²³Abanyegiputa na bo babakurikira hagati mu kiyaga babōmye inyuma, n’amafarasi ya Farawo yose, n’imikogote yiwe, n’abagendera ku mafarasi biwe.

²⁴Nuko mu gicugu ca nyuma Uhoraho acishiriza ari mu nkingi y’umuriro n’igicu, arunguruka ingabo z’Abanyegiputa, azica ivutu.

²⁵Atuma amagurudumu y’ imikogote yabo afata, ntiyaba igikwegeka neza. Maz’ Abanyegiputa baravugana, bat’ Enda duhunge, tureke Abisirayeli, kuk’ Uhoraho abatabara, ari we aturwanya.

²⁶Uhoraho abarira Mose, ati Ramvura ukuboko hejuru y’ikiyaga, amazi ateranire ku Banyegiputa no ku mikogote yabo no ku bagendera ku mafarasi bo muri bo.

²⁷Nuko Mose aramvura ukuboko hejuru y’ikiyaga; umutwenzi utambitse, ikiyaga gisubira muri nyina; maz’ Abanyegiputa bagize ngo barahunga, Uhoraho abacurikiraniriza hagati mu kiyaga.

²⁸Nukw amazi asubirayo, arengera imikogote n’abagendera ku mafarasi, mbere n’ingabo za Farawo zose zāri zigiye mu kiyaga zikurikiye Abisirayeli; ntihārokoka n’umwe muri bo.

²⁹Arikw Abisirayeli bāciye hagati mu kiyaga nk’abaca ku musozi, amazi ababera nk’umurombero i buryo n’i bumoso.

³⁰Uko ni k’Uhoraho yakijije Abisirayeli kur’ uwo musi, abakūra mu maboko y’Abanyegiputa. Maz’ Abisirayeli bībonera imivyimba y’Abanyegiputa irambaraye kw isēsero ry’ikiyaga.

³¹Nukw Abisirayeli babona ibihambaye Uhoraho yakoreye Abanyegiputa: baca batinya Uhoraho, baramwizera, bo n’umusavyi wiwe Mose.