Read Bibliya Yera 1951 Kuvayo 15 Bible Online

Kuvayo 15 - Bibliya Yera 1951 bible

Kuvayo 15

¹Maze Mose n’Abisirayeli baririmbira Uhoraho iyi ndirimbo, bati Ndaririmbira Uhoraho, kukw ari n’intsinzi y’agahebūza. Ifarasi n’ūyigenderako yabinuze mu kiyaga.

²Uhoraho n’inkomezi zanje n’indirimbo yanje, Ampindukiye agakiza. Uwo ni we Mana yanje, nanje ndamuhimbaza; Ni yo Mana ya data, nanje ndayishira hejuru.

³Uhoraho n’intōre mu ntambara, Uhoraho ni ryo zina ryiwe.

⁴Imikogote ya Farawo n’ingabo ziwe yabinuze mu kiyaga, Abagabisha biwe b’intorwa badobeye mu Kiyaga Gitukura.

⁵Amazi yo mw idamba arabarengeye, Barokeye i bgina nk’ibuye.

⁶Ukuboko kwawe kw’i buryo, ewe Uhoraho w’icubahiro kivuye mu bubasha, m Ukuboko kwawe kw’i buryo, ewe Uhoraho, kujanjaguye abamenja.

⁷Ubugabe bgawe buhambaye bgatumye utūra hasi abakwināntājeko. Warekuye uburake bgawe, bubatōngōra nk’ibishingwe.

⁸Gufuha kwo mu mazuru yawe kwarundanije amazi, Imipfunda yema nk’ikirundo; I bgina muri nyina w’ikiyaga haravura.

⁹Umubisha yaravuze, Ati Ndabakurikira, ndabashikīre, ngabanganye iminyago, Ndabīmarekw ishavu; Nsokōre inkota, mbaranduze ukuboko kwanje!

¹⁰Wahuhutishije umuyaga wawe, ikiyaga kirabarengera: Badobera nk’icuma c’isāsu mu mazi ahambaye.

¹¹Uhoraho, mu vyitwa imana n’iyihe ihwanye nawe? N’iyihe ihwanye nawe, wewe w’icubahiro kivuye mu kwera, Wewe uteye ubgoba kubg’ ibihambaye ukora, wewe ukora ibitangaza?

¹²Waramvuye ukuboko kw’i buryo, Isi irabamira.

¹³Kubg’ imbabazi zawe warōngōye abantu wacunguye: Wabarōngōje inkomezi zawe mu nzira ija ahantu hēra, ah’ uba.

¹⁴Amahanga yaravyumvise, ahinda agashitsi; Ab’i Bufilisitiya, ubgoba bubafata nk’ibise.

¹⁵Ico gihe abakuru b’imiryango yo muri Edomu barumirwa; Intōre z’i Mowabu zija mu gatengo; Ab’i Kanani bose bagwa igihumura.

¹⁶Ubgoba no gutinya bizobafata, Ububasha bg’ukuboko kwawe butumye bazojunja nk’ibuye, Gushitsa ah’abantu bawe bazorenganira, ewe Uhoraho, Gushitsa ah’abantu wiguriye bazorenganira.

¹⁷Uzobashikanayo, ubashimangire ku musozi w’ishamvu yawe, Ahantu witunganirije ngo habe i wawe, ewe Uhoraho, Ahēra hāshizweho n’amaboko yawe, Mwami.

¹⁸Uhoraho azokwama ahangamye ibihe bitazoshira.

¹⁹Kuko hamwe amafarasi ya Farawo, n’imikogote yiwe, n’ abagendera ku mafarasi, vyari bimanutse mu kiyaga, Uhoraho abiteranirizakw amazi y’ikiyaga; arikw Abisirayeli bo bāciye hagati mu kiyaga nk’ abaca ku musozi.

²⁰Kandi Miriyamu yavugishwa n’Imana, mushiki wa Aroni, ahitana agashāko k’ingoma; abagore bose barasohoka, baramukurikira bari n’udushāko tw’ingoma, bagenda baravyina;

²¹Miriyamu akabaterera, ati Ni muririmbire Uhoraho, kukw ari n’intsinzi y’agahebūza: Ifarasi n’ūyigenderako yabinuze mu kiyaga.

²²Mose ajana Abisirayeli, bararamvura, bava ku Kiyaga Gitukura, bataha mu bugaragwa bg’i Shura, bagenda imisi itatu mur’ ubgo bugaragwa, babura amazi.

²³Bashitse i Mara, ntibāshobora kunywa amazi yaho, kuko yar’ umururazi; ni co catumye hitwa Mara.[5]

²⁴Maz’ abantu bidodombera Mose, bati Turanywa iki?

²⁵Na we atakambira Uhoraho: Uhoraho amwereka igiti, agiterera mur’ ayo mazi, aca ahinduka meza. Aho ni ho Uhoraho yabashingiye icagezwe n’ibgirizwa, kand’ aho ni ho yabageragereje.

²⁶Arababarira, ati Ni mwagira umwete wo kwumvira Uhoraho Imana yanyu, mugakora ibitunganye mu nyonga ziwe mukumvira ivyagezwe vyiwe, mukitondera ivyo yihanikirije vyose, ngo Nta ndwara azobateza nk’ izo yateje Abanyegiputa; ngo Kukw ari we Uhoraho, abakiza indwara.

²⁷Bashika i Elimu, hār’ amariba cumi n’abiri, n’ibigazi mirongwirindwi: basagaza aho nyene kur’ ayo mazi.