Read Bibliya Yera 1951 Kuvayo 16 Bible Online

Kuvayo 16 - Bibliya Yera 1951 bible

Kuvayo 16

¹Ishengero ryose ry’Abisirayeli bavuduka i Elimu, bataha mu bugaragwa bg’i Sini, buri hagati ya Elimu na Sinayi, hari ku musi ugira icumi na gatanu w’ukwezi gukurikira ukwo baviriye mu gihugu ca Egiputa.

²Ishengero ryose ry’Abisirayeli bidodombera Mose na Aroni mur’ ubgo bugaragwa,

³barababarira, bat’ Uhoraho iy’ apfuma atwicira mu gihugu ca Egiputa, tucīteretse inkono z’inyama, tukirya ivyo kurya tugahāga; none mwadukūyeyo mutuzana mur’ ubu bugaragwa kugira ngw iri shengero ryose mutwicishe inzara.

⁴Maz’ Uhoraho abarira Mose, ati Rāba, ngira ngo ndabacuncuburire umutsima uvuye mw ijuru: uko bukeye abantu baze bame baja kwegeranya ivy’ uwo musi, kugira ngo mbagerageze ndābe yuko bitondera ivyagezwe vyanje, canke ko batavyitondera.

⁵Kandi ku wa gatandatu, igihe basorongora ivyo bazanye, bazosanga harimw’ ibingana kabiri n’ivyo bahora bazana.

⁶Nuko Mose na Aroni babarira Abisirayeli bose, bati Ku mugoroba ni ho muja kumenya yuk’ Uhoraho ari we yabakūye mu gihugu ca Egiputa;

⁷kandi mu gitondo ni ho muzobona icubahiro c’Uhoraho: kuko yumvise ingene mumwidodombera; natwe ga twar’ iki, aho mutwidodombera?

⁸Mose arababgira, at’ Ivyo murabibona igihe Uhoraho aja kubaha inyama zo kurya kur’ uyu mugoroba, mu gitondo akazobaha umutsima, mukarya mugahāga; kuk’ Uhoraho yumvise imyidodombo yanyu mumwidodombera; natwe twar’ iki? erega si twebge mwidodombera, mwidodombera Uhoraho.

⁹Maze Mose abarira Aroni, ati Barira ikoraniro ryose ry’Abisirayeli, uti Ni mwīgire hafi imbere y’ Uhoraho, uti Kuko yumvise imyidodombo yanyu.

¹⁰Nuko Aroni akirikw aravugana n’ikoraniro ryose ry’Abisirayeli, bahindukiye babona mu bugaragwa ubgiza bg’ Uhoraho bgiyerekaniye muri ca gicu.

¹¹Uhoraho abarira Mose,

¹²ati Numvise imyidodombo y’ Abisirayeli; non’ ubabarire, uti Kur’ uyu mugoroba murarya inyama, kandi mu gitondo muzorya umutsima, muhāge: uti Muzoca mumenya kw ari we Uhoraho Imana yanyu.

¹³Nuko ku mugoroba inkware ziraza, zigwa aho bashagaje, zirahazimya; mu gitondo buca ikime gitonze impande zaho zose.

¹⁴Ikime kimaze guta, hasi aho mu bugaragwa haboneka utuntu duto‐duto nk’utuvunguka, duto‐duto nk’ikime cavuze.

¹⁵Abisirayeli babibonye, barabazanya, bat’ Ibi n’ibiki? kuko batāmenye ivy’ ari vyo. Mose arababgira, at’ Uwo n’umutsima Uhoraho abahaye kw ivyo kurya.

¹⁶Ibi ni vyo Uhoraho yavuze, at’ Umuntu wese yegeranye ibihwanye n’igisa ciwe, kand’ ajanire abo mw ihema ryiwe ingero yitwa omeru imwe‐imwe ku muntu ku muntu, nk’ ukw igitigiri c’abantu banyu kingana.

¹⁷Abisirayeli babigenza bartyo, baravyegeranya, bamwe begeranya vyinshi, abandi bike.

¹⁸Babigeze kuri ya ngero yitwa omeru, uwegeranije vyinshi asanga nta co asāguye; uwegeranije bike asanga nta co akehaniwe: umuntu wese asanga yegeranije ibihwanye n’igisa ciwe.

¹⁹Maze Mose arabīhaniza, ati Ntihagire umuntu abirāza.

²⁰Yamara Mose ntibamwumvira: bamwe babirāzako, basanga vyaboze, binyagara inyo. Mose arabarakira.

²¹Nuko bama bavyegeranya uko bukeye, umuntu wese ibihwanye n’igisa ciwe: izuba ngo risasike, bikayaga.

²²Maze ku wa gatandatu begeranya ivyo kurya bingana kabiri n’ivyo bahora bazana: umuntu wese agira omeru zibiri‐zibiri; abakuru bose b’iryo shengero baraza babibarira Mose.

²³Arababarira, at’ Ivyo ni vyo Uhoraho yavuze, at’ Ejo uzoba umusi wo kuruhūka, w’isabato irobanuriwe Uhoraho; ni bagende barondere ivyo bagomba, bateke ivyo bagomba; ibisāgutse babibīke, babirāze.

²⁴Nuko barabirāza nk’uko Mose yabageze; ntivyabora, ntivyagwa urunyo na rumwe.

²⁵Mose arababgira, at’ Uyu musi murye ivyo, kuk’ uyu musi ar’ uw’ isabato y’Uhoraho; uyu musi ntimubibona ku musozi.

²⁶Mu misi itandatu muzokwama muvyegeranya, arik’ ūgira indwi n’ uw’ isabato: kuri wo ntibizoboneka.

²⁷Ariko kur’ uwo musi ugira indwi bamwe mu bantu baja kuvyegeranya, barabibura.

²⁸Uhoraho abaza Mose, ati Muzogeza hehe kwanka kwitondera ivyagezwe vyanje n’amabgirizwa yanje?

²⁹Rāba, jewe Uhoraho ko nabahaye isabato, ni co catumye mbaha ivyo kurya vy’imisi ibiri ku wa gatandatu. Umuntu wese n’agume ah’ ari, ntihagire umuntu ayegayega ku musi ugira indwi.

³⁰Nuko ku w’indwi abantu bararuhuka.

³¹Ab’ inzu ya Isirayeli bita utwo tuntu manu: twasa n’utubuto tw’agati kitwa gadi, kandi twera de: twasōsa nk’udutsima turimw’ ubūki.

³²Mose arababgira, at’ Iki ni co Uhoraho yabageze, at’ Ingero ya omeru yuzuye manu ibīkirwe ab’ urunganwe rwanyu uko ruzogenda rukurikirana, kugira ngo baze barābe umutsima yabagaburiye mu bugaragwa, igihe yabakūra mu gihugu ca Egiputa.

³³Mose abarira Aroni, ati Jana urwavya, urusukemwo manu yuzuye omeru imwe, urutereke imbere y’Uhoraho, kugira ngo rubīkirwe ab’urunganwe rwanyu uko ruzogenda rukurikirana.

³⁴Nuko Aroni arutereka imbere y’ Ibishinga intahe, ngo rwameho, nk’uk’ Uhoraho yabariye Mose.

³⁵Abisirayeli bamara imyaka mirongwine barya manu, bageza aho bashikiye mu gihugu kirimw’ abantu; barya manu bashitsa aho bagereye ku rugabano rw’igihugu c’i Kanani.

³⁶Ingero yitwa efa irimw’ izitwa omeru cumi.