Read Bibliya Yera 1951 Kuvayo 17 Bible Online

Kuvayo 17 - Bibliya Yera 1951 bible

Kuvayo 17

¹Ishengero ryose ry’ Abisirayeli riva mu bugaragwa bg’i Sini, bagenda baratāhīra, nk’ uk’ Uhoraho yabageze, barinda bashika i Refidimu, basagazayo. Abantu basanga nta mazi ariho yo kunywa.

²Maz’ abantu batonganya Mose, bati Duhe amazi, tunywe. Mose arababaza, ati Muntonganiriza iki? N’iki kibateye kugerageza Uhoraho?

³Abantu bahicirwa n’inyota, bidodombera Mose, bati Wadukūriye iki muri Egiputa kutwicisha inyota, twe n’abana bacu n’ibitungwa vyacu?

⁴Maze Mose atakambira Uhoraho, ati Mbeg’ aba bantu ndabagire nte? ko bashigaje gatoya bakantera amabuye.

⁵Uhoraho abarira Mose, ati Ca imbere y’abantu, ujane bamwe mu bakuru b’Abisirayeli; witwaze na ya nkoni wakubitishije rwa ruzi, ugende.

⁶Ehe rāba nanje ndahagarara imbere yawe hariya ku gitandara c’i Horebu; nawe uheze uje gukubita ico gitandara, amazi aca yisuka avuye muri co, abantu banywe. Nuko Mose abikora artyo imbere y’abakuru b’Abisirayeli.

⁷Yita aho hantu Masa[6] na Meriba[7] kukw Abisirayeli bamutonganije, kandi kuko bagerageje Uhoraho, bakabaza ngo Mbeg’ Uhoraho ari muri twebge, canke ntari muri twebge?

⁸Maze haza Abamaleki, baterera Abisirayeli i Refidimu.

⁹Mose abarira Yosuwa, ati Dusobanurire abantu, ubajane murwanye Abamaleki; nanje ejo nzohagarara ku mpinga y’umusozi, nitwaje ya nkoni y’Imana.

¹⁰Yosuwa agira nk’uko Mose yamubariye nyene, aja kurwanya Abamaleki: Mose na Aroni na Huri baradūga, baja ku mpinga y’uwo musozi.

¹¹Maze Mose iy’ amanitse amaboko Abisirayeli baranesha: ngw ayamanure, Abamaleki bakanesha.

¹²Maz’ amaboko ya Mose araruha; bābīra ibuye, bararimutega, aryicarako; Aroni na Huri bagumya amaboko yiwe, umwe ku ruhande rumwe, uwundi ku rundi: amaboko yiwe araguma gushitsa izuba rirenze.

¹³Yosuwa aririkisha inkota abantu bose b’Abamaleki.

¹⁴Uhoraho abarira Mose, ati Ni wandike ivyo mu gitabo, bibe icibutso; ubibarire Yosuwa, ubimwumvishe, yuko nzozimanganya ukumenyekana kw’Abamaleki, bībagirane mu bo musi y’ijuru bose.

¹⁵Maze Mose yubaka igicaniro, acita Yehovanisi:[8]

¹⁶aravuga, at’ Uhoraho yamanitse ukuboko arahira kw azorwanya Abamaleki, kuva ku runganwe rumwe gushitsa ku rundi, birtyo birtyo.