Read Bibliya Yera 1951 Kuvayo 22 Bible Online

Kuvayo 22 - Bibliya Yera 1951 bible

Kuvayo 22

¹Umuntu ni yiba inka cank’ intama, akayibāga cank’ akayishōra, inka az’ ayirihe zitanu, intama ayirihe zine.

²Umusuma ni basanga amena, bakamutsindaho, uwamwishe amaraso yiwe ntaz’ amukore.

³Arik’ ūzomwica izuba rirashe, amaraso yiwe azomukora. Umusuma akwiye kuriha; na ho ni yaba adafise ico ariha, agurwe ahōrwa ubusuma bgiwe.

⁴Ni yaramuka afatanywe inyibano ikibona, ar’ inka cank’ indogoba cank’ intama, az’ ayitangane n’iyindi y’imperekeza.

⁵Umuntu ni yōnēsha umurima cank’ imizabibu, akareka ico atunze kikōna umurima w’uwundi, az’ amurihe ku murima wiwe ibirusha ibindi kuba vyiza, canke ku mizabibu yiwe irusha iyindi kuba myiza.

⁶Umuriro ni waccroka, ugafata uruzitiro rw’amahwa, ukarandagata, hagasha imikama y’ ingano, cank’ izigihagaze, cank’ umurima wose, uwacanye uwo muriro ntaz’ abure kubiriha.

⁷Umuntu ni yabītsa mugenzi we amahera cank’ ibindi bintu, bikībirwa i we, uwavyivye ni yaboneka az’ arihe ibingana na vyo kabiri.

⁸Uwavyivye n’ataboneka, nyen’ urwo rugo aze imbere y’ Imana, kugira ngo bamurahize kw atākojeje ukuboko ku bintu vya mugenzi we.

⁹Mu vyo kugungana vyose, naho yoba inka, cank’ indogoba, cank’ intama, cank’ impuzu, cank’ ikindi kintu cose cazimiye, umuntu akagifata, akavuga, ati Ngiki! urubanza rw’ abo bompi rujanwe ku Mana, uwo Imana izocira urubanza kw’ atsinzwe, az’ arihe uwo wundi ikingana na co kabiri.

¹⁰Umuntu ni yabītsa mugenzi we indogoba cank’ inka cank’ intama cank’ ikindi gitungwa cose, kigapfa canke kikavunika canke kikanyagwa, ata muntu abibona;

¹¹indahiro aja kurahira izina ry’ Uhoraho iz’ abe ari yo ibarangiriza, yukw atākojeje ukuboko ku bintu vya mugenzi we; nyene vyo ayemere, uwo ntārinde kumuriha.

¹²Ariko ni hagira icībirwa i we, az’ akirihe nyene co.

¹³Na ho ni catabagurwa n’igikōko, azane ikirangara kibishingira intahe; ntārinde kuriha iyatabaguwe.

¹⁴Canke ni hagira igitungano umuntu atīra mugenzi we, kikavunika canke kigapfa, nyene co atari ho ari, uwo ntaz’ abure kukiriha.

¹⁵Ariko nyene co ni yahaba, uwo ntaz’ akirihe, ni yaba yagitanze ku mpēra, iyo mpēra nyene izoba ibaye indihano.

¹⁶Umuntu ni yahendagiza umwigeme ataribgasabge, akaryamana na we, ntaz’ abure kumukwa ngw abe umugore wiwe.

¹⁷Ariko se ni yanka kumumushingira, na ho nyene atange inkwano nk’uko bahora bakwa abandi bigeme.

¹⁸Umurozikazi ntimuze mumureke ngw abeho.

¹⁹Ūzoryamana n’igitungano ntaz’ abure kwicwa.

²⁰Ūzotanga ikimazi, akagiha iyindi mana, atari jewe Uhoraho jenyene, az’ arandurwe rwose.

²¹Umunyamahanga ntimuze mumugirire nabi, canke ngo mumuhahaze, kuko namwe mwar’ abanyamahanga mu gihugu ca Egiputa.

²²Ntihaze hagire umupfakazi cank’ impfuvyi mucuranguza.

²³Ni mwagira ico mubacuranguzako na gitoya, bakantakambira, sinzobura kwumviriza ugutakamba kwabo;

²⁴maz’ uburake bganje bukaziriringa, nkabīcīsha inkota, abagore banyu bagasigara ar’ abapfakazi, n’abana banyu bakaba impfuvyi.

²⁵Ni hagira ūgurāna amahera umuntu uw’ ari we wese wo mu bantu banje, w’umubanyi wiwe w’umworo, ntaz’ amwugarize mu kumwishuza, kandi ntaz’ amucire ay’ inyungu.

²⁶Ni hagira ūkīzūra impuzu ya mugenzi we kukw amuheraniye, izuba ntirirenge atayimushubije:

²⁷kukw ari yo yipfuka yonyene, ari wo mwambaro wo ku mubiri wiwe; none yokwiyorosa iki? Ni yantakambira, nzomwumviriza, kuko nd’ umunyembabazi.

²⁸Ntihaze hagire ūrogota kuri jewe Imana, canke ngw avume umukuru wo mu bgoko bganyu.

²⁹Ntimuze mutebagane kunshikanira ku vyo mwakikinyuye, ari ku vyo mwejeje, ari ku binyobga vyanyu. Imfura zanyu z’ abahungu muze muzimpe.

³⁰Abe ari ko muzokora no ku nka zanyu no ku ntama zanyu: iy’ uburiza iz’ imarane na nyina imisi ndwi, ku musi ugira umunani muze muyimpe.

³¹Muzoba abantu b’abagabo nirobanuriye; kandi ntimuze murye ku nyama z’ikirangara kiri mu gahinga, iz’ ari zo zose, ariko muze muziterere imbga.