Read Bibliya Yera 1951 Kuvayo 24 Bible Online

Kuvayo 24 - Bibliya Yera 1951 bible

Kuvayo 24

¹Uhoraho abarira Mose, ati Dūga aho ndi, mwe na Aroni na Nadabu na Abihu, n’abakuru bo mu Bisirayeli mirongwirindwi, musenge mukiri kure:

²Mose abe ari we yīgira hafi yanje wenyene, arikw abo bari kumwe ntibanyegēre, cank’ abandi bantu ngo badūgane na we.

³Mose araza, abgira abantu amajambo yose y’Uhoraho n’ amabgirizwa yiwe yose: abantu bose bamwishurira icarimwe, bat’ Ivyo Uhoraho avuze vyose tuzobikora.

⁴Nuko Mose yandika amajambo yose y’Uhoraho, maze bukeye akoroka kare, yubaka igicaniro musi y’uwo musozi, ashinga inkingi z’amabuye cumi na zibiri, nk’ukw imiryango y’Abisirayeli ari cumi n’ibiri.

⁵Atuma imisore yo mu Bisirayeli ija gutanga ibimazi, iravyosa, no kubāgira Uhoraho amashuri y’imikangara kw ibimazi vy’ishimwe.

⁶Mose yābīra igice ca kabiri c’amaraso, agisuka mu nzavya, ikindi na co akimija ku gicaniro.

⁷Araheza yābīra igitabo c’isezerano, agisomera abantu; baramubarira, bat’ Ivyo Uhoraho avuze vyose tuzobikora, kandi tuzomwumvira.

⁸Maze Mose yābīra ya maraso, ayamija abantu, arababarira, ati Ngayo amaraso y’isezerano Uhoraho asezeranye namwe, nk’ukw ayo majambo yose ari.

⁹Maze Mose adūgana na Aroni na Nadabu na Abihu, na ba bakuru b’Abisirayeli mirongwirindwi:

¹⁰babona Imana y’ Abisirayeli; musi y’ibirenge vyayo hameze nk’umusezero w’amabuye yitwa safiro, usa n’ijuru ubgaryo iyo ryiharanguye.

¹¹Kandi ba bakuru b’Abisirayeli ntihagira ico ibagira; nuko bīrābira Imana, bararya, baranywa.

¹²Uhoraho abarira Mose, ati Dūga, uze aho ndi kur’ uyu musozi, ugumeho; nanje nzoguha ibisate vy’amabuye birikw ivyagezwe n’amabgirizwa, ivyo nanditse ng’ uvyigishe.

¹³Mose avana hasi na Yosuwa umufasha wiwe, adūga ku musozi w’Imana.

¹⁴Abarira ba bakuru, ati Muturorērere hano, mushitse aho tuzogarukira aho muri; kandi rāba, musigaranye Aroni na Huri; ni hagira ūpfa ikintu n’uwundi, az’ aze kuri bo, yitware.

¹⁵Nuko Mose adūga kur’ uwo musozi, ca gicu c’igipfungu kirawutwīkīra.

¹⁶Ubgiza bg’Uhoraho buguma kur’ uwo musozi Sinayi, ico gipfungu kiwutwīkīra imisi itandatu; ku musi ugira indwi, Uhoraho ahamagara Mose n’ijwi rirenga ari mur’ ico gicu c’igipfungu.

¹⁷Ishusho y’ubgiza bg’Uhoraho, Abisirayeli bayibona isa n’umuriro utōngōra, ku gatwe k’uyo musozi.

¹⁸Nuko Mose adwēbēra hagati mur’ ico gipfungu, adūga kur’ uwo musozi; awumarakw imisi mirongwine n’amajoro mirongwine.