Read Bibliya Yera 1951 Kuvayo 25 Bible Online

Kuvayo 25 - Bibliya Yera 1951 bible

Kuvayo 25

¹Uhoraho abarira Mose,

²ati Barira Abisirayeli bankoranirize amashikanwa; muze mwākīrire umuntu wese aritanze rivuye ku mutima.

³Kand’ amashikanwa muzobākīrira az’ abe aya: amazahabu, n’amafeza, n’imiringa,

⁴n’inyuzi z’amasufe n’iz’ amashigisha n’izisa n’agahama n’ izera derere, n’ubushenza bg’ impene;

⁵n’insāto z’impfizi z’ intama zazizwe mu gahama, n’ insāto z’ibikōko vyitwa tahashi[12], n’imbaho z’ibiti vyitwa imishita,

⁶n’amavuta y’amatara, n’ibintu bimoga vyo kuvanga n’amavuta yo kurobanuza abahabga ibango, n’ ibindi vyo kwosa bitamirana;

⁷n’utubuyenge twitwa shohamu, n’utundi tubuyenge two gutēra ku mwambaro witwa efodi no ku mwambaro wo mu gikiriza.

⁸Kandi bangirire ahēra ho kuba, kugira ngo nze ngerēre hagati muri bo.

⁹Nk’ukw ivyo ngira nkwereke vyose bimeze, mu vy’ikigereranyo c’iryo hema[13] nzobamwo, no mu vy’ikigereranyo c’ibintu vyaryo vyose, abe ari ko muzobikora.

¹⁰Nuko baze babāze isandugu mu giti citwa umushita: uburebure bg’umurambararo bgayo buze bube amatambge abiri n’igice y’ ukuboko uciriye mu nkokora, ubaguke bgayo bube itambge rimwe n’igice, uburebure bg’igihagararo bube itambge rimwe n’igice nyene.

¹¹Uz’ uyomekekw izahabu iramuye imbere n’inyuma, kand’ uz’ uyikīkūzek’ umuguno w’izahabu impande zose.

¹²Kand’ uz’ uvugutire izahabu, ukūremw’ ibigombo bine vyo kuyitērako, ubitēre ku maguru yayo ukw ar’ ane, ibigombo bibiri bibe ku ruhande rumwe, bindi bibiri bibe ku rundi.

¹³Kand’ uz’ ubāze iminiho mu mushita, uyomekekw izahabu.

¹⁴Uheze winjize iyo miniho yo kurerura iyo sandugu mur’ ivyo bigombo vyo ku mpande zayo.

¹⁵Iyo miniho yame mu bigombo vy’isandugu, ntiz’ isokōrwe.

¹⁶Kand’ uz’ ushire mur’ iyo sandugu Ibishinga intahe nzoguha.

¹⁷Uz’ ucure n’umutemere wo guhongerako mw izahabu iramuye; uburebure bgawo bg’ umurambararo buze bube amatambge abiri n’igihimba y’ukuboko uciriye mu nkokora, ubgaguke bgawo bube itambge rimwe n’igihimba.

¹⁸Kand’ uz’ ukore abakerubi babiri mw izahabu, mu mitwe yompi y’uwo mutemere wo guhongerako, ubakoze mu buryo bgo gucura.

¹⁹Kand’ umukerubi umwe abe mu mutwe umwe, uwundi abe mu wundi; kand’ abo bakerubi ubashamike kur’ uwo mutemere wo guhongerako mu mitwe yawo yompi, babe kimwe na wo.

²⁰Abo bakerubi babe abashanje amababa hejuru, ayo mababa yabo ngw akingīre uwo mutemere wo guhongerako, barābane; bashire amaso kur’ uwo mutemere.

²¹Uheze urumye uwo mutemere wo guhongerako kuri ya sandugu, uyishizemwo vya Bishinga intahe nzoguha.

²²Aho ni ho nzohora mbonanira nawe, nkakubarira ivyo ngushikirije vyose vy’ivyagezwe ngeze Abisirayeli, ndi hejuru y’uwo mutemere wo guhongerako, hagati y’abo bakerubi bo kw isandugu y’Ibishinga intahe.

²³Kand’ uz’ ubāze ameza mu giti citwa umushita: uburebure bgayo bg’umurambararo bube amatambge abiri y’ukuboko uciriye mu nkokora, ubgaguke bgayo bube itambge rimwe, uburebure bg’igihagararo bube itambge rimwe n’igihimba.

²⁴Uz’ uyomekekw izahabu iramuye, uyakīkūze umuguno w’izahabu impande zose.

²⁵Uz’ uyabāzire ibizingiti vyo kugumya amaguru biyakīkūze impande zose, ubgaguke bgavyo bungane n’urushi, ubikīkūzek’ umuguno w’izahabu impande zose.

²⁶Kand’ uz’ uyacurire ibigombo bine mw izahabu, ubitēre ku nkokora ukw ari zine zo ku maguru yayo ukw ar’ ane.

²⁷Ivyo bigombo bibe hafi ya vya bizingiti, bibe ivyo kwinjizamw’ iminiho yo kurerura ayo meza.

²⁸Kand’ uz’ ubāze iminiho mu mushita, uyomekekw izahabu, ibe iyo kurerura ameza.

²⁹Kand’ uz’ ucure amasahani n’udukombe vy’ayo meza, bo n’amakarabo n’imibehe vyayo vyo gusukisha ibiturire ku gicaniro: uz’ ubicure mw izahabu iramuye.

³⁰Uz’ utereke kur’ ayo meza imitsima y’ibiterekērwa, yame imbere yanje na ntaryo.

³¹Kand’ uz’ ukore ico guterekakw amatara mw izahabu iramuye; ico gitereko cose, hamwe n’intebe yaco n’umutumba waco, kize kibe igicurano; ibikombe vyaco, bigizwe bga mapfundo apfundikiyekw amashurwe, bize bicurirwe kuri co, bibe kimwe na co.

³²Kandi kize kigire amashami atandatu mu mbavu zaco: mu ruhande rumwe rw’ico gitereko haze habe amashami atatu, mu rundi ruhande rwaco habe yandi atatu.

³³Ishami rimwe rize rigire ibikombe bitatu bisa n’amashurwe y’igiti citwa shakedi, igikombe cose kigirwe bga pfundo ripfundikiyekw ishurwe; n’irindi shami n’uko: amashami yose ukw ar’ atandatu ashamitse kur’ ico gitereko abe ari kw amera.

³⁴Kand’ umutumba w’ico gitereko uz’ ugire ibikombe bine, bisa n’ayo mashurwe ya shakedi nyene, bigizwe bga mapfundo apfundikiyekw amashurwe;

³⁵ah’ amashami ashamikiye kur’ ico gitereko hose ukw ar’ atandatu, haze habe ipfundo ahahera musi ah’ amashami ahūrira bicuriwe kuri co, bibe kimwe.

³⁶Amapfundo yaco n’ amashami yaco bicurirwe kuri co, bibe kimwe na co: cose hamwe kibe igicurano gicuzwe mw izahabu iramuye.

³⁷Uheze uz’ ugicurire amatara ndwi, ayo matara az’ aterekwe kuri co uburyo butuma abonesha imbere yaco.

³⁸Imakasi zaco zo gutunganya urutambi, bo n’udusahani two gushirwak’ umunyota warwo, bize bicurwe mw izahabu iramuye.

³⁹Ico gitereko, bo n’ivyo bintu vyaco vyose, bize bikorwe mw izahabu iramuye, inganye kuriba n’italanto[14] imwe.

⁴⁰Uz’ ugire umwete wo kubikoresha, ubigereranije n’ikigereranyo cavyo werekewe kur’ uyu musozi.