Read Bibliya Yera 1951 Kuvayo 28 Bible Online

Kuvayo 28 - Bibliya Yera 1951 bible

Kuvayo 28

¹Kand’ uze wīgize hafi yawe Aroni mukurwawe n’abana biwe, ubarobanure mu Bisirayeli, kugira ngo bankorere igikorwa c’ubuherezi: Aroni nyene, na Nadabu na Abihu, na Eleyazari na Itamari, abana biwe.

²Uz’ ujishishirize Aroni mukurwawe imyambaro, iz’ ibe iyejejwe, yo kumutera icubahiro no kumushariza.

³Kand’ uz’ ubgire abahinga bose, abo nujuje impwemu y’ubgenge, ngo bajishe imyambaro ya Aroni yo kumurobanura, kugira ngw ankorere igikorwa c’ubuherezi.

⁴Iyi abe ari yo myambaro bazojisha: umupfuko wo kwambara mu gikiriza, n’umwambaro witwa efodi, n’umwinjiro, n’ikanzo y’insobane, n’igitambara co kuzingīra mu mutwe, n’umukanda: nuko baze bajishire Aroni mukurwawe n’abana biwe imyambaro iz’ ibe iyejejwe, kugira ngo bankorere igikorwa c’ubuherezi.

⁵Baze bakoreshe intahe z’izahabu, n’inyuzi z’amasufe n’iz’ amashigisha n’izisa n’agahama, n’izera derere.

⁶Umwambaro witwa efodi baze bawujishishe intahe z’izahabu, n’ inyuzi z’amasufe, n’iz’ amashigisha, n’izisa n’agahama, n’izera derere nziza zihinzwe neza, ujishwe n’ abahinga bavyo.

⁷Uz’ ugire ibizāna bibiri vyo ku bitugu, bifate ku nzāno zayo zompi, kugira ngo biwufatanirize hamwe.

⁸Kand’ umusipi ujishwe n’abahinga, ujishiwe kuri wo, wo kuwukenyeza, uz’ ujishwe nka wo, ube kimwe na wo; baze bawujishe mu ntahe z’izahabu no mu nyuzi z’amasufe no mu z’amashigisha no mu zisa n’agahama no mu zera derere nziza zihinzwe neza.

⁹Kand’ uze wābīre utubuyenge tubiri twitwa shohamu, utwandikekw amazina y’abana ba Isirayeli mu buryo bgo guca amagarwe.

¹⁰Mu mazina yabo uze wandike atandatu ku kabuyenge kamwe, yandi atandatu uyandike ku kandi kabuyenge, nk’uko bakurikiranye.

¹¹Nk’uk’ umuntu azi guca amagarwe ku kabuyenge ko kudoma ikimenyetso, abe ari ko nawe wandika amazina y’abana ba Isirayeli kur’ utwo tubuyenge twompi: uheze uturumike mu tugenegene tw’izahabu.

¹²Utēre utwo tubuyenge twompi ahahera ku bitugu ku bizāna vya efodi, tubere Abisirayeli utubuyenge two kwibukwako: Aroni aze yambare amazina y’abana ba Isirayeli ku bitugu vyiwe vyompi, ayazane imbere yanje, jewe Uhoraho, kuba icibutso.

¹³Kand’ uz’ ucure utugenegene mw izahabu,

¹⁴n’imigufu ibiri y’izahabu iramuye, uyigire nk’ imigozi itsivye; ivyo bitsibo vy’ imigufu ubirumye kur’ utwo tugenegene.

¹⁵Kand’ uz’ ujishishe umupfuko wo kwambara mu gikiriza wo kwahukanya imanza: abahinga bavyo abe ari bo bawujisha; uko efodi ijishwe abe ari k’uwujishisha: uwujishishe mu ntahe z’izahabu no mu nyuzi z’amasufe n’iz’ amashigisha n’izisa n’agahama n’izera derere nziza zihinzwe neza.

¹⁶Uz’ ukorwe ukubiranijwe, uringanire impande zose: uburebure bgawo bube itambge rimwe ry’ intoke, n’ubgaguke bgawo bube itambge rimwe nyene.

¹⁷Kand’ uheze uwudombagizek’ utubuyenge mu mirongo ine: mu murongo wa mbere haze habe utubuyenge twitwa odemu na pitida na bareketi;

¹⁸mu wa kabiri habe utwitwa nofekina na safiro na yahalomu;

¹⁹mu wa gatatu habe utwitwa leshemu na shevo na akilama;

²⁰mu wa kane habe utwitwa tarushishi na shohamu na yasipi: tuze tugende turumikwa mu tugenegene tw’izahabu.

²¹Utwo tubuyenge tunganye igitigiri n’amazina y’ abana ba Isirayeli: tube icumi na tubiri nk’ukw amazina yabo ar’ icumi n’abiri: tumere nk’utubuyenge two kudoma ibimenyetso, tugende twandikwakw izina mu buryo bgo guca amagarwe, tube utw’ iyo miryango ukw ar’ icumi n’ibiri.

²²Kandi kur’ uwo mupfuko wo kwambara mu gikiriza uz’ uwushireko ya migufu icuzwe mw izahabu iramuye, ikozwe nk’imigozi itsivye.

²³Uwo mupfuko uz’ uwucurire impeta zibiri z’izahabu, uzitēre ku mitwe yawo yompi yo haruguru.

²⁴Uheze urumye iyo migufu yompi y’izahabu itsivye kur’ izo mpeta zompi zo ku mitwe y’uwo mupfuko wo ku gikiriza.

²⁵Iyindi mitwe yompi y’ivyo bitsibo vyompi vy’imigufu uyirumye kur’ utwo tugenegene twompi, uyitēre kuri vya bizāna vya efodi vyo ku bitugu, ku ruhande rw’imbere.

²⁶Kand’ uz’ ucure izindi mpeta zibiri mw izahabu, uzitēre ku mitwe yompi yo hepfo y’uwo mupfuko wo ku gikiriza, ku mubuga wawo, ku ruhande rw’ imbere ruhera kuri efodi.

²⁷Kand’ uz’ ucure izindi mpeta zibiri mw izahabu, uzitēre ahahera imbere aho vya bizāna bibiri vya efodi vyo ku bitugu bitērewe, haruguru ya wa musipi wajishwe n’abahinga, wo gukenyeza efodi.

²⁸Kand’ uwo mupfuko wo kwambara ku gikiriza baze bawufatanishe impeta zawo n’impeta zo kuri efodi akagozi ko mu nyuzi z’amasufe, kugira ng’ ugume kuri wa musipi wa efodi wajishwe n’ abahinga, uwo mupfuko woye gukūrwa kuri efodi.

²⁹Aroni, uko yinjiye Ahēra, aze yame yambara ku mutima amazina y’ abana ba Isirayeli ari kur’ uwo mupfuko wo ku gikiriza wo kwahukanya imanza, kugira ngw ayo mazina abe icibutso co gutuma bibukwa ubudasība imbere yanje, jewe Uhoraho.

³⁰Kand’ uz’ ushire Urimu na Tumimu imbere mur’ uwo mupfuko wo ku gikiriza wo kwahukanya imanza, bibe ku mutima wa Aroni, uko yinjiye imbere yanje; Aroni aze yame yambara ivyo kwahukanya imanza z’Abisirayeli ubudasība, iy’ aje imbere yanje, jewe Uhoraho.

³¹Kand’ umwinjiro wo kwambarirwako efodi uz’ uwujishe mu nyuzi z’amasufe gusa;

³²urwano rw’aho gucisha umutwe ruze rusaturwe muri wo hagati, kand’ urwo rwano ruze rutērwekw akandi kajishano kameze nk’umusōzo karukīkūze, rube nk’urwano rw’ikanzo y’icuma,[16] kugira ngo ntiruze rucike.

³³Ku mubuga wawo uz’ uwutērek’ udusa n’ amakomamanga dukozwe mu nyuzi z’amasufe n’iz’ amashigisha n’izisa n’agahama, dukīkūze uwo mubuga impande zose, kand’ uz’ ugende urarobekamw’ imidende y’izahabu iwukīkūze:

³⁴iyo midende y’izahabu iz’ irobekeranywe n’ayo makomamanga, bikīkūze umubuga w’uwo mwinjiro impande zose.

³⁵Aroni aze yame awambara ukw agiye guhereza, kugira ngo ntapfe: kand’ ukujegera kwayo kuze kwame kwumvikana iyo yinjiye Ahēra imbere yanje n’iy’ asohotse.

³⁶Uheze ucure akabāte mw izahabu iramuye, ukandikeko mu buryo bgo guca amagarwe, nk’ uko baca amagarwe ku kabuyenge ko kudoma ikimenyetso, uti YEREJWE UHORAHO.

³⁷Ugapfundikishe akagozi ko mu nyuzi z’ amasufe, kuri ca gitambara kizingiriye mu mutwe.

³⁸Kaze kabe mu ruhanga rwa Aroni, kandi Aroni az’ abe ari we arābgakw ibigabitanijwe mu vyera, ivyo Abisirayeli bazogenda batirimuka mu mashikanwa yabo yera bazotanga yose; kaze kame kaba mu ruhanga rwiwe na ntaryo, kugira ngo jewe Uhoraho mbone kwākīra amashikanwa yabo.

³⁹Kandi ya kanzo uz’ uyijishe mu buryo bg’insobane mu nyuzi zera derere nziza; uz’ ujishe n’ igitambara co kuzingīra mu mutwe mu nyuzi zera derere nziza, bo n’umukanda, abahinga bavyo bawujererengekw amabara.

⁴⁰Kandi n’abana ba Aroni na bo uz’ ubajishire amakanzo, ubajishire n’imikanda n’udukofero, bibe ivyo kubatēra icubahiro no kubashariza.

⁴¹Iyo myambaro yose uz’ uyambike Aroni mukurwawe, bo n’abana biwe, ubasukekw amavuta, ubashikirize iryo bango, ubarobanure, kugira ngo bankorere igikorwa c’ubuherezi.

⁴²Kand’ uz’ ubajishire amabutura mu nyuzi zera derere, bayambare ngo bapfuke ubgambure bgabo; ave mu rukenyerero ashike mu bibero,

⁴³yambare Aroni n’ abana biwe, uko bagiye kwinjira mw ihema ry’ibonaniro, cank’ uko bagiye kwegera igicaniro ngo bakorere Ahēra; kugira ngo ntibagībgeko n’ibigabitanyo, bagapfa: ico kize kimubere icagezwe c’intahava, bo n’uruvyaro rwiwe uko ruzogenda rukurikirana.