Read Bibliya Yera 1951 Kuvayo 29 Bible Online

Kuvayo 29 - Bibliya Yera 1951 bible

Kuvayo 29

¹Uku abe ari k’uzobagenza mu kubarobanura, ngo bankorere igikorwa c’ubuherezi. Wābīre imasa y’umukangara n’impfizi z’intama zibiri zitagira agasembga,

²n’imitsima itambiwe, n’udutsima tutambiwe twacumbanywe n’amavuta ya elayo, n’utundi dutsima tutambiwe nyene tubēhūye, dusutswekw amavuta ya elayo, uyicumvye mw ifu y’ingano igogōretse.

³Uyishire mu ndumane imwe, uyizanane na ya masa na za mpfizi z’intama zompi.

⁴Kandi Aroni n’abana biwe uz’ ubazane ku muryango w’ihema ry’ibonaniro, ubūhagirireho.

⁵Wābīre ya myambaro, uheze wambike Aroni ya kanzo, na wa mwinjiro wo kwambarirwako efodi, umwambike na efodi nyene, na wa mupfuko wo kwambarwa mu gikiriza, umukenyeze na wa musipi wa efodi ujishwe n’abahinga;

⁶umwambike na ca gitambara mu mutwe, ugishireko na ca gitsibo cera.[17]

⁷Maze wābīre amavuta yo kurobanuza abahabga ibango, uyamusuke mu mutwe, uyamurobanuze.

⁸Uheze uzane n’abana biwe, ubambike ya makanzo.

⁹Aroni n’abana biwe ubakenyeze imikanda, ubambike na twa dukofero: maze bazoba begukiye ubuherezi, kibe icagezwe c’intahava: ushikirize Aroni n’abana biwe iryo bango.

¹⁰Uz’ uzane ya masa imbere y’ ihema ry’ibonaniro: Aroni n’abana biwe bayirambike ibiganza mu ruhanga.

¹¹Uyikererere imbere yanje, jewe Uhoraho, ku muryango w’ihema ry’ibonaniro.

¹²Wābīre ku maraso y’iyo masa, uyasīgīshe urutoke ku mahembe y’igicaniro, amaraso yose uheze uyavyagize ahahera hasi ku gicaniro.

¹³Maze wābīre urubambanda rwose rwōrōshe amara, n’agashami gatoya k’igitigu, n’amafyigo yompi, n’ ibinure bifashe kuri yo, uvyosereze ku gicaniro.

¹⁴Arikw inyama z’iyo masa, n’urusato rwayo, n’amayezi yayo, ubituririre inyuma y’insago: kizoba ar’ ikimazi gitangiwe ivyaha.

¹⁵Uteko wābīre impfizi y’ intama imwe muri za zindi; Aroni n’abana biwe bayirambike ibiganza mu ruhanga.

¹⁶Uyikerere, wābīre amaraso yayo uyamijagire ku gicaniro impande zose.

¹⁷Uyijanjagure, uyishire mu bikenye vyayo, uronge amara yayo bo n’ ibikenye vyayo vy’amaguru, ubirunde hamwe n’ibindi bikenye vyayo n’umutwe wayo.

¹⁸Uheze wosereze ivy’ iyo ntama vyose ku gicaniro: kizoba ar’ ikimazi noserejwe, jewe Uhoraho, n’umubabge umota neza, ikimazi nshikaniwe, gitōngōwe n’umuriro.

¹⁹Maz’ uze wābīre iyo mpfizi y’intama ya kabiri, Aroni n’abana biwe na yo bayirambike ibiganza mu ruhanga.

²⁰Uheze uyikerere, wābīre ku maraso yayo, uyakoze ku gutwi kw’i buryo kwa Aroni ahahera hejuru, no ku matwi y’i buryo y’abana biwe ahahera hejuru nyene, no ku bikumu vyabo vy’i buryo, no ku mano yabo manini y’i buryo, ayandi uyamijagire ku gicaniro impande zose.

²¹Wābīre ku maraso yo ku gicaniro, no kuri ya mavuta yo kurobanuza abahabga ibango, ubicucagire Aroni n’imyambaro yiwe, n’abana biwe n’imyambaro yabo; nukw azoba yejejwe, bo n’imyambaro yiwe, n’abana biwe n’ imyambaro yabo.

²²Uheze wābīre ibinure vy’iyo mpfizi y’intama, n’umurizo wayo uko wagahometsekw ibinure, n’ urubambanda rwōrōshe amara, n’agashami gatoya k’igitigu, n’ amafyigo yompi, n’ibinure bihometse kuri yo, n’igikenye c’ukuguru kwayo kw’i buryo, kukw ar’ impfizi y’intama yo kubinjiza mur’ iryo bango;

²³wābīre n’umutsima umwe muri ya yindi, n’ agatsima kamwe kācumbanywe n’amavuta ya elayo, n’akandi kamwe kabēhūye, uyikūye muri ya ndumane y’imitsima itambiwe izoba iteretse imbere yanje;

²⁴ivyo vyose ubishire ku mashi ya Aroni no ku y’abana biwe, ubizunguze, bibe ishikanwa rizungurijwe imbere yanje.

²⁵Uheze ubikūre ku mashi yabo, uvyosereze ku gicaniro, ubigeretse kuri ca kimazi coshejwe, bibe umubabge umota neza imbere yanje, jewe Uhoraho: ico kizoba ar’ ikimazi nshikaniwe gitōngōwe n’umuriro.

²⁶Kandi wābīre inkoro y’iyo mpfizi y’ intama yo kwinjiza Aroni mur’ iryo bango, uyizunguze, ibe ishikanwa rizungurijwe imbere yanje; iyo izoba umwanya wawe.

²⁷Kand’ uz’ urobanure ya nkoro ishikanishwa kuzunguzwa, na ca gikenye c’ukuguru kigerewe abaherezi, co kuzunguzwa nyene, gishinguwe kuri ya mpfizi y’intama yo kubinjiza mw ibango, ari vyo bigerewe Aroni n’abana biwe.

²⁸Ivyo bizoba umuturi Aroni n’abana biwe bazohora bashingura mu Bisirayeli ibihe vyose, kukw ar’ umwanya w’abaherezi mu mashikanwa y’ishimwe Abisirayeli bazohora bashikana; rizoba ishikanwa bangereye, jewe Uhoraho.

²⁹Kand’ imyambaro yejejwe ya Aroni izoba n’iy’ abana biwe bazomusubirira mu gishingo: baze bayambare mu gihe basukwakw amavuta yo kubarobanura mu gushikirizwa iryo bango.

³⁰Umwana wiwe amusubiriye mu gishingo c’ubuherezi az’ ayambare imisi ndwi, ukw agiye kwinjira mw ihema ry’ibonaniro guhērereza Ahēra.

³¹Kandi wābīre ivya ya mpfizi y’intama yo kubinjiza mur’ iryo bango, uteke inyama zayo ahantu hejejwe.

³²Aroni n’abana biwe bazirishe ya mitsima yo mu ndumane, babirīre ku muryango w’ ihema ry’ibonaniro.

³³Babirye, ar’ ivyatanzwe kubabera impongano, ngo binjizwe mur’ iryo bango, bezwe; arik’ ūtar’ umuherezi ntaz’ abiryeko, kukw ar’ ivyera.

³⁴Izo nyama z’ico kimazi cabinjije mw ibango, cank’ imitsima, ni haramuka hagize igisigara, kikarāra, uz’ ugiturire: ntikize kiribge, kukw ar’ icera.

³⁵Ivyo abe ari vyo uzogirira Aroni n’abana biwe, nk’uko ndabikugeze vyose: uz’ umare imisi ndwi ukora ivyo kubinjiza mw ibango.

³⁶Uko bukeye uz’ ukerere ben’ iyo masa y’ikimazi gitangirwa ivyaha, ibe impongano; kand’ igicaniro uz’ ugitangire impongano yo kugitunganya, uz’ ugisukekw amavuta, uceze.

³⁷Uz’ umare imisi ndwi utangira impongano ico gicaniro, uceze; maze kizoba icera cane; ikizogikorako cose kizoba kibaye icera, kibe inyegu yaco.

³⁸Ibi abe ari vyo uzohora utangira kur’ ico gicaniro: uko bukeye, uz’ utange abagazi b’ intama babiri batarengeje umwaka, ubudasība.

³⁹Umwagazi umwe uz’ uwutange mu gitondo, uwundi ku mugoroba.

⁴⁰Umwagazi wa mbere uz’ uwutangane n’ifu igogōretse y’ikigiracumi c’ingero yitwa efa, ivanzwe n’amavuta avuye muri elayo zisekuwe y’ikigira kane c’ ingero yitwa hini, utange n’ikigira kane ca hini nyene ya vino, ribe ishikanwa ry’ibiturire.

⁴¹Uwundi mwagazi uz’ uwutange ku mugoroba, uwutangane n’ishikanwa ry’ifu n’iry’ ibiturire, nk’ ivyo mu gitondo, bibe umubabge umota neza, ikimazi nshikaniwe jewe Uhoraho, gitōngōrwa n’ umuriro.

⁴²Bizoba ibimazi vyo kwoswa vy’intasība ukw ibihe vy’ urunganwe rwanyu bizogenda bikurikirana, bitangirwa ku muryango w’ihema ry’ibonaniro imbere yanje: aho ni ho nzohora mbonanira namwe, ni ho nzoyāgira nawe.

⁴³Aho ni ho nzobonanira n’Abisirayeli; kand’ iryo hema rizokwezwa n’ubgiza bganje.

⁴⁴Nzokweza iryo hema ry’ibonaniro bo n’igicaniro; na Aroni n’abana biwe nzobeza, kugira ngo bankorere igikorwa c’ubuherezi.

⁴⁵Kandi nzoba hagati mu Bisirayeli, mbe Imana yabo.

⁴⁶Na bo bazomenya yuko nd’Uhoraho Imana yabo, yabakūye mu gihugu ca Egiputa, kugira ngo nze mbe hagati muri bo: ni jewe Uhoraho Imana yabo.