Read Bibliya Yera 1951 Kuvayo 33 Bible Online

Kuvayo 33 - Bibliya Yera 1951 bible

Kuvayo 33

¹Uhoraho abarira Mose, ati N’ugende, uve ino, mwe n’ abantu wakūye mu gihugu ca Egiputa, mudūge muje mu gihugu narahiye Aburahamu na Isaka na Yakobo ko nzogiha uruvyaro rwabo.

²Nanje ndarungika umumarayika abaje imbere, kandi nzocirukanamw’ Abanyakanani, n’ Abamori, n’Abaheti, n’Abaferizi, n’Abahiwi, n’Abayebusi:

³muje mur’ ico gihugu gitemba amata n’ ubūki. Ariko jeho sindūgana namwe, ngo ngendere hagati muri mwebge; kuko mur’ ihanga ritagonda izosi: nohava mbatikiriza mu nzira.

⁴Abantu bumvise iyo nkuru mbi bagira umubabaro, ntihaba hakigira umuntu yambara utugenegene twiwe two gushaza.

⁵Uhoraho abarira Mose, ati Barira Abisirayeli, uti Mur’ ihanga ritagonda izosi; uti Yogendera hagati muri mwebge n’akanya isase, yobatikiza: uti Nuko rero ni mwiyambure utugenegene twanyu two gushaza, kugira ngw amenye ukw abagirira.

⁶Nukw Abisirayeli biyambura utugenegene twabo, uhereye bakiva ku musozi Horebu, no mu rundi rugendo rwabo rwose.

⁷Mose yajana ihema, akarishinga hirya y’aho bashagaje, ahītāngūye, yaryita ihema ry’ibonaniro. Uwagomba gusigūza Uhoraho wese yava aho bashagaje, akaja kw ihema ry’ibonaniro hirya yaho.

⁸Kand’ uko Mose yava aho bashagaje, agiye kur’ iryo hema, abantu bose bāva hasi, umuntu wese agahagarara ku muryango w’ihema ryiwe, bakamukurikiza amaso, gushitsa aho yinjiriye mur’ iryo hema.

⁹Mose yamara kwinjira mw ihema, ya nkingi y’igicu ikamanuka, igahagarara ku muryango waryo: Uhoraho akagānīra na Mose.

¹⁰Abantu bose bakabona iyo nkingi y’igicu ihagaze ku muryango w’iryo hema, bakava hasi, umuntu wese agasenga ari ku muryango w’ihema ryiwe.

¹¹Uhoraho akīgānīrira na Mose imbonankubone, nk’uk’ umuntu agānīra na mugenzi we. Maze Mose agasubira aho bashagaje; arik’ umufasha wiwe, Yosuwa mwene Nuni, w’umusore, ntiyava kur’ iryo hema.

¹²Maze Mose abgira Uhoraho, ati Rāba, wambariye ngo Dūgana abo bantu, ariko ntiwammenyesha uwo udutumanye. Yamara waravuze, uti Ndakuzi izina, kandi wagiriwe ubuntu imbere yanje.

¹³None rero, ndakwinginze, asangwa nagiriwe ubuntu imbere yawe koko, n’unyereke imigendere yawe, kugira ngo nkumenye, mbone kurushiriza kugirirwa ubuntu imbere yawe: kandi wibuke yukw iryo hanga ar’ iryawe.

¹⁴Aramwishura, at’ Ubganje nzokwijanira namwe, mbashikane amahoro.

¹⁵Mose aramwishura, at’ Ubgawe n’utajana natwe, ntudukūre ino.

¹⁶None n’iki comenyekanisha yuko nagiriwe ubuntu imbere yawe, twe n’iryo hanga? Mbega s’uko wojana natwe, bigatuma twe n’ihanga ryawe dutandukanywa n’amahanga yose ashagaje kw isi?

¹⁷Uhoraho yishura Mose, ati N’ico uvuze na co ndagikora, kuko nakugiriye ubuntu, nkakumenya izina.

¹⁸Mose aramwishura, ati Ndakwinginze, nyereka ubgiza bgawe.

¹⁹Uhoraho aramwishura, at’ Ukugira neza kwanje kwose nzogucisha imbere yawe, nivuge mw izina ko nd’ Uhoraho nd’ imbere yawe; kandi nzogirira ubuntu uwo nzobugirira, ngirire n’ikigongwe uwo nzokigirira.

²⁰Kand’ ati Ntiworāba mu nyonga hanje: kuk’ umuntu atondāba mu nyonga ngw abeho.

²¹Uhoraho arongera aravuga, at’ Ehe rāba, harih’ ahantu hafi yanje, nawe uz’ uhagarare ku gitandara;

²²maz’ ubgiza bganje bukiriko buraguca i ruhande, nzogushira mur’ ico gitandara, ahameze nk’igihoro, ngukingirize urushi rwanje, gushitsa aho nzoba ndēngāniye,

²³mpeze nkūreh’ urushi rwanje, urābe mu bitugu vyanje: ariko mu nyonga hanje ntihashobora kuboneka.