Read Bibliya Yera 1951 Kuvayo 36 Bible Online

Kuvayo 36 - Bibliya Yera 1951 bible

Kuvayo 36

¹Besaleli na Oholiyabu n’ umuntu wese w’umuhinga, abo Uhoraho yashizemw’ ubuhinga n’ubgenge ngo bamenye gukora vyose vy’iryo hema, baze babikore nk’uk’ Uhoraho yabigeze vyose.

²Nuko Mose ahamagara Besaleli na Oholiyabu, n’umuntu wese w’ umuhinga, ab’ Uhoraho yashize ubuhinga mu mutima, mbere n’umuntu wese yasunitswe n’umutima kuza gukora ico gikorwa.

³Mose abaha ya mashikanwa yose, ayo Abisirayeli bāshikaniye gukora ivy’ iryo hema, ngo bayakoreshe. Kand’ uko bukeye mu gitondo bākomeza kumuzanira ayandi mashikanwa avuye ku mitima ikunze,

⁴bituma abo bantu bose b’ abahinga bakora ibikorwa vyose vyo kur’ iryo hema, bahērako baraza, umuntu wese ava ku gikorwa ciwe yakora,

⁵babarira Mose, bat’ Ereg’ abantu bazanye ibirenze rwose ku vyo Uhoraho yageze gukora.

⁶Nuko Mose ashinga kubibuza, babitāngāza aho bashagaje hose, bati Ntihaze hagire umugabo cank’ umugore asubira gukora ikindi kintu na kimwe co gushikana kubg’ iryo hema. Uko ni ko bābujije abantu kugira ikindi bazana.

⁷Kukw ivyo bari bafise vyari bihāgije gukora ico gikorwa cose, bigasāguka.

⁸Umuntu wese w’umuhinga mu bakora ico gikorwa, akora iryo hema ry’imbere, barisakaza impuzu cumi; izo mpuzu zajishwe mu nyuzi zera derere nziza zihinzwe neza, no mu nyuzi z’amasufe no mu z’amashigisha no mu zisa n’ agahama; kandi zari zijishwekw ibishushanyo vy’abakerubi, bijishwe n’abahinga bavyo.

⁹Uburebure bg’impuzu yose bgar’ amatambge mirongwibiri n’umunani y’ukuboko uciriye mu nkokora, ubgaguke bgayo bgar’ amatambge ane: impuzu zose zari cabugerwe.

¹⁰Besaleli arōngōranya impuzu zitanu ukwazo, zindi zitanu azirōngōranya ukwazo.

¹¹Atēra utugombo tw’udutambara tw’amasufe ku ruhande rumwe rw’impuzu iherera izārōngōranijwe za mbere, atēra n’utundi tugombo nk’utwo ku ruhande rw’impuzu iherera izindi mu zārōngōranijwe za kabiri.

¹²Utwo tugombo yatēye ku mpuzu imwe twari mirongwitanu, no mu zindi za kabiri zārōngōranijwe, atēra utundi mirongwitanu nyene ku ruhande rw’iherera izindi; utwo tugombo twari dutumberanye.

¹³Acura uturinda mirongwitanu mw izahabu, adufatanisha izo mpuzu zārōngōranijwe: nukw iryo hema ry’imbere ricika rimwe ryiramvuriye.

¹⁴Atakw ajisha impuzu mu bushenza bg’impene, zo kuba ihema ryo gupfuka iryo hema ry’ imbere; ajisha impuzu cumi n’ imwe.

¹⁵Uburebure bg’impuzu yose bgar’ amatambge mirongwitatu y’ukuboko uciriye mu nkokora; ubgaguke bgayo bgar’ amatambge ane; izo mpuzu ukw ari cumi n’imwe zari cabugerwe.

¹⁶Arōngōranya impuzu zitanu ukwazo, zitandatu na zo ukwazo.

¹⁷Atēra utugombo mirongwitanu ku ruhande rw’impuzu iherera izārōngōranijwe za mbere, atēra n’utundi mirongwitanu nyene ku ruhande rw’impuzu iherera izindi mu zārōngōranijwe za kabiri.

¹⁸Acura uturinda mirongwitanu mu miringa two gufatanya iryo hema, kugira ngo ricike rimwe ryiramvuriye.

¹⁹Abarīranya ico kurenza hejuru y’iryo hema mu nsāto z’amapfizi y’intama zizizwe mu gahama, hejuru yaco akirenzakw ikindi gikozwe mu nsāto z’ibikōko vyitwa tahashi.[19]

²⁰Abāza imbaho mu giti c’ umushita zo guhagarika iryo hema ry’imbere, arazishinga.

²¹Uburebure bg’urubaho rumwe‐rumwe bgar’ amatambge cumi y’ ukuboko uciriye mu nkokora, ubgaguke bgarwo bgar’ itambge rimwe n’igihimba.

²²Kandi ku rubaho rumwe‐rumwe har’ inkago zibiri zifatanye; uko ni ko yakoze ku mbaho zose z’iryo hema.

²³Nuko rer’ abāza izo mbaho z’iryo hema, izo mu ruhande ahahera i bumanuko ziba mirongwibiri.

²⁴Kand’ acura ibitereko mirongwine mw ifeza, vyo kuja musi y’izo mbaho ukw ari mirongwibiri: ibitereko bibiri‐bibiri bija musi y’urubaho rumwe‐rumwe, vyo kurokezwamwo za nkago ukw ari zibiri nyene.

²⁵Abāza n’izindi mbaho mirongwibiri z’ urundi ruhande rw’iryo hema, ruhera i burārūko,

²⁶na zo azicurira ibitereko vyazo mirongwine mw ifeza: ibitereko bibiri‐bibiri vyo kuja musi y’urubaho rumwe‐rumwe.

²⁷Kand’ abāza imbaho zitandatu z’ahahera inyuma kur’ iryo hema, aharābana n’i burengerazuba.

²⁸Abāza n’imbaho zibiri zo ku mfuruka z’iryo hema ahahera inyuma nyene.

²⁹Hasi zari zibiri‐zibiri, arikw ahahera hejuru zari zimatanye, aho ikigombo ca mbere kigera; uko ni ko yazikoze zompi ku mfuruka zompi z’ahahera inyuma.

³⁰Nukw izo mbaho zose na zose zari munani, n’ibitereko vyazo vy’ ifeza cumi na bitandatu: ibitereko bibiri‐bibiri bija musi y’urubaho rumwe‐rumwe.

³¹Abāza ibiti vy’intumba mu giti citwa umushita: ibiti bitanu vyo kuja ku mbaho zo ku ruhande rumwe rw’iryo hema,

³²n’ibindi bitanu vyo kuja ku zo ku rundi ruhande rwaryo, n’ibindi bitanu vyo kuja ku z’ahahera inyuma kuri ryo, ahahera i burengerazuba.

³³Igiti co hagati y’ibindi, kiri hagati kur’ izo mbaho, akigira umwishikira.

³⁴Kand’ izo mbaho azomekakw izahabu, maz’ azicurira ibigombo vy’ izahabu vyo gusobekamwo vya biti; n’ivyo biti na vyo avyomekakw izahabu.

³⁵Ajisha igihuzu co gukingīra, akijisha mu nyuzi z’amasufe no mu z’amashigisha no mu zisa n’ agahama, no mu zera derere nziza zihinzwe neza; kandi cari kijishwekw ibishushanyo vy’abekerubi, bijishwe n’abahinga bavyo.

³⁶Akibāzira inkingi zine mu giti c’umushita, azomekakw izahabu, azitērakw imisumari yacuzwe mw izahabu; avugutira ifeza, ayikūramw’ ibitereko bine vyo kuzinegamwo.

³⁷Kand’ ajisha igihuzu co gukinga ku muryango w’ ihema, mu nyuzi z’amasufe no mu z’amashigisha no mu zisa n’agahama, no mu zera derere nziza zihinzwe neza, cari kijererenzwekw amabara n’abahinga.

³⁸Abāza inkingi zitanu zaco, azitērakw imisumari; ku mitwe yazo azomekakw izahabu, bo n’ imitambikwa yazo; ibitereko vyazo ukw ari bitanu vyari bicuzwe mu miringa.