Read Bibliya Yera 1951 Kuvayo 37 Bible Online

Kuvayo 37 - Bibliya Yera 1951 bible

Kuvayo 37

¹Besaleli abāza isandugu mu giti citwa umushita: uburebure bgayo bg’umurambararo bgar’ amatambge abiri n’igice y’ukuboko uciriye mu nkokora, ubgaguke bgayo bgar’ itambge rimwe n’igice, uburebure bg’igihagararo bgar’ itambge rimwe n’igice nyene.

²Ayomekakw izahabu iramuye imbere n’inyuma, ayikīkūzak’ umuguno w’izahabu impande zose.

³Avugutira izahabu, ayikūramw’ ibigombo bine vyo kuyitērako, abitēra ku maguru yayo ukw ar’ ane, ibigombo bibiri biba ku ruhande rumwe, bindi bibiri biba ku rundi.

⁴Abāza iminiho mu mushita, ayomekakw izahabu;

⁵araheza yinjiza iyo miniho yo kurerura iyo sandugu mur’ ivyo bigombo vyo ku mpande zayo.

⁶Acura n’umutemere wo guhongerako mw izahabu iramuye; uburebure bgawo bg’ umurambararo bgar’ amatambge abiri n’igihimba y’ukuboko uciriye mu nkokora, ubgaguke bgawo bgar’ itambge rimwe n’igihimba.

⁷Akora abakerubi babiri mw izahabu, mu mitwe yompi y’uwo mutemere wo guhongerako, abakoze mu buryo bgo gucura.

⁸Umukerubi umwe amukora mu mutwe umwe, uwundi amukora mu wundi; abo bakerubi abashamika kur’ uwo mutemere wo guhongerako mu mitwe yawo yompi, baba kimwe na wo.

⁹Abo bakerubi bari bashanje amababa hejuru, ayo mababa yabo yar’ akingiye uwo mutemere wo guhongerako, bārarābana; bari bashize amaso kur’ uwo mutemere.

¹⁰Maz’ abāza ameza mu giti citwa umushita: uburebure bgayo bg’umurambararo bgar’ amatambge abiri y’ukuboko uciriye mu nkokora, ubgaguke bgayo bgar’ itambge rimwe, uburebure bg’ igihagararo bgar’ itambge rimwe n’igihimba.

¹¹Ayomekakw izahabu iramuye, ayakīkūza umuguno w’izahabu impande zose.

¹²Ayabāzira ibizingiti vyo kugumya amaguru bikīkūje impande zose, ubgaguke bgavyo bungana n’urushi, abikīkūzak’ umuguno w’izahabu impande zose.

¹³Avugutira izahabu, ayikūramw’ ibigombo bine vy’ayo meza, abitēra ku nkokora ukw ari zine zo ku maguru yayo ukw ar’ ane.

¹⁴Ivyo bigombo vyari hafi ya vya bizingiti, vyar’ ivyo kwinjizamw’ iminiho yo kurerura ayo meza.

¹⁵Abāza iminiho mu mushita yo kurerura ameza, ayomekakw izahabu.

¹⁶Acura ibintu vyo kur’ ayo meza, amasahani yayo, n’udukombe twayo, n’imibehe n’amakarabo vyayo vyo gusukisha ibiturire ku gicaniro; abicura mw izahabu iramuye.

¹⁷Akora ico guterekakw amatara mw izahabu iramuye; ico gitereko cose, hamwe n’intebe yaco n’umutumba waco, cār’ igicurano; ibikombe vyaco, bigizwe bga mapfundo apfundikiyekw amashurwe, vyari bicuriwe kuri co, vyari kimwe na co.

¹⁸Cari gifise amashami atandatu mu mbavu zaco: mu ruhande rumwe rw’ico gitereko hār’ amashami atatu, mu rundi ruhande rwaco hāri yandi atatu.

¹⁹Ishami rimwe ryari rifise ibikombe bitatu bisa n’amashurwe y’igiti citwa shakedi, igikombe cose cari kigizwe bga pfundo ripfundikiyekw ishurwe; n’irindi shami n’uko: amashami yose ukw ar’ atandatu ashamitse kur’ ico gitereko ni ko yar’ ameze.

²⁰Kand’ umutumba w’ico gitereko warikw ibikombe bine, bisa n’ayo mashurwe ya shakedi nyene; vyari bigizwe bga mapfundo apfundikiyekw amashurwe;

²¹aho amashami ashamikiye kur’ ico gitereko hose ukw ar’atandatu, hār’ ipfundo ahahera musi aho amashami ahūrira, bicuriwe kuri co, vyari kimwe.

²²Amapfundo yaco n’amashami yaco vyari bicuriwe kuri co, vyari kimwe na co: cose hamwe cār’ igicurano gicuzwe mw izahabu iramuye.

²³Araheza agicurira amatara ndwi, n’imakasi zaco zo gutunganya urutambi, n’ udusahani two gushirwak’ umunyota warwo, abicuze mw izahabu iramuye.

²⁴Ico gitereko, bo n’ibintu vyaco vyose, yabikoze mw izahabu iramuye, inganya kuriba n’italanto imwe.[20]

²⁵Abāza igicaniro co kwoserezakw imibavu mu giti citwa umushita; uburebure bgaco bgar’ itambge rimwe ry’ukuboko uciriye mu nkokora, ubgaguke bgar’ itambge rimwe nyene: cangana impande zose; uburebure bgaco bg’igihagararo bgar’ amatambge abiri; amahembe yaco yar’ abāziwe kuri co, yari kimwe na co.

²⁶Acomekakw izahabu iramuye, hejuru kuri co, no mu mbavu zaco impande zose, no ku mahembe yaco; agikīkūzak’ umuguno w’izahabu impande zose.

²⁷Musi y’uwo muguno waco, ahahera mu mbavu zaco zompi, agicurira ibigombo bibiri‐bibiri vy’ izahabu; abitēra mu mpande zaco zompi, biba ivyo kwinjizamw’ iminiho yo kukirerura.

²⁸Abāza iminiho mu giti c’umushita, ayomekakw izahabu.

²⁹Atunganya amavuta yera yo kurobanuza abahabga ibango, n’ imibavu iroranye y’ibintu bimoga, abikora nk’umuhinga yabimogoreye.