Read Bibliya Yera 1951 Kuvayo 38 Bible Online

Kuvayo 38 - Bibliya Yera 1951 bible

Kuvayo 38

¹Abāza igicaniro co kwoserezakw ibimazi mu giti c’ umushita; uburebure bgaco bgar’ amatambge atanu y’ukuboko uciriye mu nkokora, ubgaguke bgaco bgar’ atanu nyene, cangana impande zose; uburebure bgaco bg’ igihagararo bgar’ amatambge atatu.

²Agiha amahembe ku nkokora zaco ukw ari zine, ayo mahembe yaco yabāziwe kuri co, aba kimwe na co; araheza acomekakw imiringa.

³Acura ibintu vyose vy’ ico gicaniro: inzavya, n’ibintu vyo kuyoza umunyota, n’imibehe, n’ivyo kwōkōza inyama, n’ivyo kurahuza: ivyo bintu vyaco vyose yabicuze mu miringa.

⁴Ico gicaniro agicurira ikintu c’insobane kimeze bga rusenga, agicuze mu miringa, agishira musi y’ igikugīrwa gikīkūje ico gicaniro, gihēra hasi, kigarukira ahacāgatije ico gicaniro nyene.

⁵Avugutira imiringa, ayikūramw’ ibigombo bine vyo gutera ku nkokora zine za ca kintu c’insobane cācuzwe mu miringa, biba ivyo kwinjizamw’ iminiho.

⁶Abāza iminiho mu giti c’umushita, ayomekakw imiringa.

⁷Yinjiza iyo miniho mur’ ivyo bigombo biri mu mbavu z’ico gicaniro, yo kukirerura; yakibāje mu mbaho, akigira igisamāre.

⁸Maz’ acura ikigārigāri mu miringa, co gukaraba, acura n’ intebe yaco mu miringa nyene, abicuze mu vyīrore vy’imiringa vy’abagore bākoranira ku muryango w’ihema ry’ibonaniro gukora ibikorwa.

⁹Maz’ akora urugo; ku ruhande ruhera i bumanuko, impuzu zo kubamba ngo zibe urugo zari zijishwe mu nyuzi zera derere nziza zihinzwe neza, uburebure bgazo bg’amakika bgar’ amatambge ijana y’ukuboko uciriye mu nkokora.

¹⁰Ibirimbi vyo kuzimanikako vyari mirongwibiri, n’ ibitereko vyavyo vyo kubinegamwo vyari mirongwibiri nyene, bicuzwe mu miringa: imisumari yo kuri vyo yar’ icuzwe mw ifeza, bo n’ imitambikwa yo kuri vyo.

¹¹No ku ruhande ruhera i burārūko na rwo uburebure bg’amakika bg’izo mpuzu bgar’ amatambge ijana nyene, n’ibirimbi vyazo vyari mirongwibiri, n’ibitereko vyavyo vyari mirongwibiri nyene bicuzwe mu miringa; imisumari yo kuri vyo yar’ icuzwe mw ifeza, bo n’imitambikwa yo kuri vyo.

¹²Ku ruhande rw’i burengerazuba, impuzu zo kubamba zar’ iz’ amatambge mirongwitanu; ibirimbi vyazo vyari cumi, n’ibitereko vyavyo vyari cumi nyene; imisumari yo kuri vyo yar’ icuzwe mw ifeza, bo n’ imitambikwa yo kuri vyo.

¹³No ku ruhande rw’i burasirazuba, amatambge yazo yari mirongwitanu nyene.

¹⁴Ku ruhande rumwe ruhera kw irembo impuzu zo kubamba zar’ iz’ amatambge cumi n’atanu; ibirimbi vyazo vyari bitatu, n’ibitereko vyavyo vyari bitatu nyene.

¹⁵No ku rundi ruhande rwaryo vyari kuno; hepfo y’ irembo ry’urwo rugo no haruguru, impuzu zo kubamba zar’ iz’ amatambge cumi‐cumi n’atanu; ibirimbi vyazo vyari bitatu‐bitatu, n’ibitereko vyavyo vyari bitatu‐bitatu nyene.

¹⁶Impuzu zose zo kubamba impande zose ngo zibe urugo, zari zijishwe mu nyuzi zera derere nziza zihinzwe neza.

¹⁷Ibitereko vyo kunegamw’ ibirimbi vyari bicuzwe mu miringa; imisumari yo kur’ ivyo birimbi, bo n’imitambikwa yo kuri vyo, vyari bicuzwe mw ifeza; ku mitwe yavyo vyari vyometswekw ifeza; ibirimbi vyose vy’urwo rugo vyarikw imitambikwa icuzwe mw ifeza.

¹⁸Igihuzu co gukinga mw irembo ry’urwo rugo cari kijererenzwekw amabara n’abahinga, cari kijishwe mu nyuzi z’amasufe no mu z’amashigisha no mu zisa n’agahama, no mu zera derere nziza zihinzwe neza; uburebure bgaco bg’amakika bgar’ amatambge mirongwibiri, uburebure bg’igihagararo bgar’ amatambge atanu: bgari cabugerwe n’ubg’ izindi mpuzu zo kubamba ngo zibe urugo.

¹⁹Ibirimbi vyaco vyari bine, n’ibitereko vyavyo vyari bine nyene, vyacuzwe mu miringa; imisumari yo kuri vyo yar’ icuzwe mw ifeza, kandi vyari vyometswekw ifeza ku mitwe yavyo, bifise n’imitambikwa yacuzwe mw ifeza nyene.

²⁰Imambo zose z’iryo hema, n’iz’ urugo rurikīkūje impande zose, zari zicuzwe mu miringa.

²¹Iki ni co gitigiri c’ivyakoze iryo hema, ari ryo hema ry’Ibishinga intahe, nk’uko Mose yageze ko biharūrwa, Abalewi baba ari bo babiharūra, baharūzwa na Itamari, mwene Aroni umuherezi.

²²Kandi Besaleli mwene Uri, Uri mwene Huri, wo mu muryango wa Yuda, ni we yakoze ivyo Uhoraho yabariye Mose vyose.

²³Yar’ afatanije na Oholiyabu mwene Ahisamaki, wo mu muryango wa Dani, umuntu azi guca amagarwe ku tubuyenge, w’umukozi w’umuhanga, umuhinga wo kujererenga amabara y’inyuzi z’ amasufe n’iz’ amashigisha n’izisa n’agahama n’izera derere.

²⁴Amazahabu yose yakoreshejwe mu gucura ivy’ iryo hema vyose, ari yo mazahabu y’amashikanwa, yanganya kuriba n’ italanto[21] mirongwibiri n’icenda na shekeli amajana ndwi na mirongwitatu, yagezwe kuri shekeli ir’ Ahēra.

²⁵Amafeza yatanzwe n’ abaharūwe bo mw ikoraniro yanganya kuriba n’italanto ijana na shekeli igihumbi n’amajana ndwi na mirongwirindwi na zitanu, yagezwe kuri shekeli ir’ Ahēra;

²⁶yatanzwe n’abantu ibihumbi amajana atandatu na bitatu n’ amajana atanu na mirongwitanu, umuntu wese yarēngāna agashirwa mu gitigiri c’abāharūwe, amaze imyaka mirongwibiri cank’ isāga, yatanga beka imwe, ari yo kigabane ca shekeli yagezwe kuri shekeli ir’ Ahēra.

²⁷Izo talanto z’ifeza, ukw ar’ ijana, zar’ izo gutekwa zikavugutirwa, ngo zivemw’ ibitereko vyo kurokezamw’ inkingi z’iryo hema, n’iza ca gihuzu co gukingīra Ahēra cane: za talanto ukw ar’ ijana zāvuyemw’ ibitereko ijana nyene, igitereko cose cāvuye mw italanto imwe.

²⁸Na za shekeli z’ifeza ukw ar’ igihumbi n’amajana ndwi na mirongwirindwi na zitanu, yazicuzemw’ imisumari yo ku birimbi, aziyagiriza no ku mitwe yavyo, azicuramwo n’imitambikwa yo kuri vyo.

²⁹Kand’ imiringa y’amashikanwa yanganya kuriba n’italanto mirongwirindwi na shekeli ibihumbi bibiri n’amajana ane.

³⁰Na yo ayicuramw’ ibitereko vyo kurokezamw’ inkingi za ca gihuzu co gukinga ku muryango w’ihema ry’ibonaniro, ayicuramwo na ca gicaniro c’imiringa, na ca kintu c’insobane caco c’imiringa nyene, bo n’ibintu vy’ico gicaniro vyose,

³¹n’ibitereko vyo kunegamw’ ibirimbi vy’urugo impande zose, bo n’ibitereko vyo kunegamw’ ibirimbi bitambagije mw irembo ryarwo, n’imambo zose z’iryo hema, bo n’iz’ urwo rugo rwaryo rurikīkūje impande zose.