Read Bibliya Yera 1951 Kuvayo 39 Bible Online

Kuvayo 39 - Bibliya Yera 1951 bible

Kuvayo 39

¹Za nyuzi z’amasufe n’iz’ amashigisha n’izisa n’agahama bazijishamw’ imyambaro ijishitse neza yo kwambara mu gukora Ahēra, ni yo myambaro yejejwe yo kwambara Aroni, nk’uk’ Uhoraho yabariye Mose.

²Besaleli ajishisha umwambaro witwa efodi intahe z’izahabu, n’ inyuzi z’amasufe, n’iz’ amashigisha, n’izisa n’agahama, n’izera derere nziza zihinzwe neza.

³Bacura amazahabu kugeza abaye uduhuhwa, badukebaguramw’intahe zo kujererenga mur’ izo nyuzi z’amasufe n’iz’amashigisha n’izisa n’agahama n’izera derere nziza, abahinga bavyo baba ari bo babikora.

⁴Bakora ibizāna vy’uwo mwambaro, babitēra kuri wo; babitēra ku nzāno zawo zompi.

⁵Umusipi ujishwe n’abahinga, ujishiwe kuri wo, wo kuwukenyeza, uba kimwe na wo, wajishwe nka wo; bawujishishije intahe z’izahabu n’inyuzi z’amasufe n’iz’ amashigisha n’izisa n’agahama n’ izera derere nziza zihinzwe neza, nk’uk’ Uhoraho yabariye Mose.

⁶Batunganya utubuyenge twitwa shohamu, baturumya mu tugenegene tw’izahabu, batwandikakw amazina y’abana ba Isirayeli mu buryo bgo guca amagarwe, nk’ abaca amagarwe ku kabuyenge ko kudoma ikimenyetso.

⁷Besaleli adutēra ahahera ku bitugu ku bizāna vya efodi, kugira ngo tubere Abisirayeli utubuyenge two kwibukwako, nk’uk’ Uhoraho yabariye Mose.

⁸Ajishisha umupfuko wo kwambara mu gikiriza, abahinga bavyo baba ari bo babikora, nk’uko efodi yajishwe; bawujisha mu ntahe z’izahabu no mu nyuzi z’ amasufe n’iz’ amashigisha n’izisa n’agahama, n’izera derere nziza zihinzwe neza.

⁹Bawukora bawukubiranije, uringaniye impande zose; uburebure bgawo bgar’ itambge rimwe ry’intoke, n’ubgaguke bgawo bgar’ itambge rimwe nyene: war’ ukubiranije.

¹⁰Bawudombagizak’ utubuyenge mu mirongo ine: umurongo wa mbere war’ umurongo w’utwitwa odemu na pitida na bareketi;

¹¹mu wa kabiri har’ utwitwa nofekina na safiro na yahalomu;

¹²mu wa gatatu har’ utwitwa leshemu na shevo na akilama;

¹³mu wa kane har’ utwitwa tarushishi na shohamu na yasipi; twagenda turumikwa mu tugenegene tw’izahabu.

¹⁴Utwo tubuyenge twanganya igitigiri n’amazina y’abana ba Isirayeli; twar’ icumi na tubiri, nk’ukw amazina yabo ar’ icumi n’abiri; twari tumeze nk’ utubuyenge two kudoma ibimenyetso, twagenda twandikwakw izina mu buryo bgo guca amagarwe, twar’ utw’ iyo miryango ukw ar’ icumi n’ibiri.

¹⁵Kur’ uwo mupfuko wo kwambara mu gikiriza bashirakw imigufu icuzwe mw izahabu iramuye, ikozwe nk’ imigozi itsivye.

¹⁶Bacura utugenegene tubiri mw izahabu, n’impeta zibiri z’izahabu nyene; izo mpeta zompi bazitera ku mitwe yawo yompi yo haruguru.

¹⁷Baraheza barumya iyo migufu yompi y’izahabu itsivye kur’ izo mpeta zompi zo ku mitwe y’uwo mupfuko wo ku gikiriza.

¹⁸Iyindi mitwe yompi y’ivyo bitsibo vy’ imigufu vyompi bayirumya kur’ utwo tugenegene twompi, bayitēra kuri vya bizāna vya efodi vyo ku bitugu, ku ruhande rw’imbere.

¹⁹Bacura izindi mpeta zibiri mw izahabu, bazitēra ku mitwe yompi yo hepfo y’uwo mupfuko wo ku gikiriza, ku mubuga wawo, ku ruhande rw’imbere ruhera kuri efodi.

²⁰Bacura n’izindi mpeta zibiri mw izahabu, bazitēra ahahera imbere aho vya bizāna bibiri vya efodi vyo ku bitugu bitērewe, haruguru ya wa musipi wajishwe n’abahinga, wo gukenyeza efodi.

²¹Uwo mupfuko wo kwambara ku gikiriza bawufatanisha impeta zawo n’impeta zo kuri efodi akagozi ko mu nyuzi z’amasufe, kugira ng’ ugume kuri wa musipi wa efodi wajishwe n’abahinga, uwo mupfuko ngo woye gukūrwa kuri efodi, babigenjeje nk’uk’ Uhoraho yabariye Mose.

²²Kand’ umwinjiro wo kwambarirwako efodi Besaleli awujisha mu nyuzi z’amasufe gusa;

²³asatura urwano muri wo hagati, nk’urw’ ikanzo y’icuma,[22] arutērakw akandi kajishano kameze nk’ umusōzo karukīkūje, kugira ngo ntiruze rucike.

²⁴Ku mubuga w’uwo mwambaro bawutērak’ udusa n’amakomamanga dukozwe mu nyuzi z’amasufe n’iz’ amashigisha n’izisa n’agahama, n’izera derere zihinzwe neza.

²⁵Bacura imidende mw izahabu iramuye, bayitēra hagati y’ayo makomamanga ku mubuga w’uwo mwambaro impande zose, babirobekeranije,

²⁶iyo midende bayirobekeranya n’ayo makomamanga, bikīkūza umubuga w’uwo mwinjiro impande zose, uba uwo kwambarwa mu guhereza, nk’uk’ Uhoraho yabariye Mose.

²⁷Kandi bajishira Aroni n’ abana biwe amakanzo mu nyuzi zera derere nziza,

²⁸bajisha n’ igitambara co kuzingīra mu mutwe mu nyuzi zera derere nziza, n’udukofero dushajije na two nyene mu nyuzi zera derere nziza, bo n’amabutura mu nyuzi zera derere nziza zihinzwe neza,

²⁹n’ umukanda mu nyuzi zera derere nziza zihinzwe neza, no mu z’ amasufe n’iz’ amashigisha n’izisa n’agahama, wajererenzwekw amabara n’abahinga bavyo, nk’uk’ Uhoraho yabariye Mose.

³⁰Maze bacura akabāte, ni co gitsibo cera, mw izahabu iramuye, bakandikakw amajambo mu buryo bgo guca amagarwe ku kabuyenge ko kudoma ikimenyetso, ngo YEREJWE UHORAHO.

³¹Bagapfundikakw akagozi ko mu nyuzi z’amasufe, ko kugafatisha hejuru kuri ca gitambara co kuzingīra mu mutwe, nk’uk’ Uhoraho yabariye Mose.

³²Uko ni ko barangije gukora ivy’ iryo hema vyose, ari ryo hema ry’ibonaniro; Abisirayeli bākoze vyose, nk’uk’ Uhoraho yabariye Mose: uko ni ko bābikoze.

³³Bazanira Mose iryo hema ry’imbere, n’ihema ryo hejuru, n’ibintu vyaryo vyose, n’uturinda twaryo, n’imbaho zaryo, n’ ibiti vy’intumba vyaryo, n’inkingi zaryo, n’ibitereko vyo kuzirokezamwo,

³⁴n’ico kurenza hejuru yaryo cakozwe mu nsāto z’amapfizi y’intama zazizwe mu gahama, n’ikindi co kurenza hejuru yaco cakozwe mu nsāto z’ ibikōko vyitwa tahashi,[23] n’igihuzu co gukingīra Ahēra cane;

³⁵n’ isandugu y’Ibishinga intahe, n’ iminiho yayo, n’umutemere wo guhongerako;

³⁶n’ameza, n’ ibintu vyayo vyose, n’imitsima y’ibiterekerwa;

³⁷n’igiterekwakw amatara c’izahabu iramuye, n’ amatara yaco nyene, ari yo matara yo gushirwa kuri co, n’ibintu vyaco vyose, n’amavuta y’ayo matara;

³⁸n’igicaniro cacuzwe mw izahabu, n’amavuta yo kurobanuza abahabga ibango n’imibavu itāmirana, n’igihuzu co gukinga ku muryango w’ihema;

³⁹n’igicaniro cacuzwe mu miringa, n’ikintu caco c’insobane cacuzwe mu miringa nyene, n’iminiho yaco, n’ibintu vyaco vyose; n’ ikigārigāri, n’intebe yaco;

⁴⁰n’ impuzu zo kubamba ngo zibe urugo, n’ibirimbi vyarwo, n’ibitereko vyo kubinegamwo, n’impuzu yo gukinga mw irembo ry’ urwo rugo, n’imigozi yarwo, n’ imambo zarwo, n’ibintu vyose vyo gukoresha mur’ iryo hema, ari ryo hema ry’ibonaniro;

⁴¹n’ imyambaro ijishitse neza yo kwambara mu gukora Ahēra, ni yo myambaro yejejwe yo kwambara Aroni umuherezi, n’imyambaro y’ abana biwe, yo kwambara mu gukora igikorwa c’ubuherezi.

⁴²Nk’uk’ Uhoraho yari yarabibariye Mose, Abisirayeli ni ko bābikoze vyose.

⁴³Mose yitegereza ivyo bākoze vyose, asanga barabiroranije; nk’uk’ Uhoraho yari yaravuze, ni ko bābikoze: Mose arabahezagira.