Read Bibliya Yera 1951 Kuvayo 5 Bible Online

Kuvayo 5 - Bibliya Yera 1951 bible

Kuvayo 5

¹Hanyuma y’ivyo, Mose na Aroni baragenda babarira Farawo, bat’ Uhoraho, Imana y’Abisirayeli, igize ngo Rekura abantu bayo, bagende, bayigirire imisi mikuru mu bugaragwa.

²Farawo arababaza, at’ Uhoraho ni nde, ngo ndamwumvire, ndekure Abisirayeli? Uhoraho sindamuzi, kandi sindekura Abisirayeli.

³Baramubgira, bat’ Imana y’Abaheburayo yaratwiyeretse: none turasavye, uturekure tuje mu bugaragwa, tugende urugendo rw’ imisi itatu, kugira ngo tuze dushikanire Uhoraho Imana yacu ibimazi, yoye kuzohava idutērēra ikīza cank’ inkota.

⁴Umwami wa Egiputa arababaza, ati Mbega Mose na Aroni, n’iki gitumye mutesha abo bantu ibikorwa vyabo? Ni mugende musubire ku bikebere vyanyu!

⁵Farawo atakw aravuga, ati Rāba, abantu bo mu gihugu ingen’ ari benshi: none namwe mugomba kubakūra ku bikebere vyabo!

⁶Kur’ uwo musi nyene Farawo abarira abakoresha abo bantu, n’abarōngōzi babo,

⁷ati Ntimwongere guha abantu ibiganogano vyo kubumbana n’amatafari nka mbere: ni bagende bavyironderere ubgabo.

⁸Kand’ igitigiri c’amatafari basanzwe babumba, bakigumeko; ntimubagabanye na makeya: kukw ar’ abanebge, ni co kibatakisha ngo ni bagende, bashikanire Imana yabo ibimazi.

⁹Abo bantu ni babazigire ku bikorwa bikomeye, abe ari vyo bitwaririka, boye gushira imitima ku magambo y’ibinyoma.

¹⁰Abakoresha ubgo bgoko barasohoka, bo n’abarōngōzi babo, babarira abantu, bati Farawo agize ngo ntakibaha ibiganogano.

¹¹Ni mugende ubganyu, mwironderere ibiganogano aho mwobibona hose; kandi ntimuzogabanywa igitigiri mwaciriwe na gatoya.

¹²Nukw abantu bakwiragira mu gihugu cose ca Egiputa kwironderera udushingweshingwe mu mwanya w’ibiganogano.

¹³Kand’ ababakoresha barabasunika, bati Mushitse ibikorwa vyanyu, ivyo mwagerewe vy’imisi yose, nk’uko mwari musanzwe mukora mukibona ibiganogano.

¹⁴Abarōngōzi b’Abisirayeli, bāshizweho kurōngōra n’abakoresha ba Farawo, barakubitwa, barababaza, bati N’iki catumye mudashitsa ivyo mwagerewe ejo n’ uyu musi, ngo mukwize amatafari nk’uko mwahora?

¹⁵Maz’ abo barōngōzi b’Abisirayeli baragenda batakambira Farawo, bati Mbeg’ uduhoye iki, twebge abasavyi bawe?

¹⁶Nta biganogano duhabga, maze bakatubgira ngo ni tubumbe amatafari: kandi none rāba, twebge abasavyi bawe turakubitwa; ariko ni mwebge mugiriye nabi abantu bawe!

¹⁷Arabishura, ati Mur’ abanebge, mur’ abanebge! Ni co kibatera kuvuga ngo mugende gushikanira Uhoraho ibimazi.

¹⁸Nuko ni mugende mukore: ariko nta biganogano muzohabga: yamara ntimuzobura gushitsa igitigiri c’amatafari.

¹⁹Abo barōngōzi b’Abisirayeli bamenya ko babonye ibara, kuko babariwe kutazohaza itafari na rimwe ku yo baciriwe ku musi n’ umusi.

²⁰Bakiva kwa Farawo, basanga Mose na Aroni babategereje mu nzira;

²¹barababarira, bat’ Uhoraho n’arābe ico mudukoreye, abahane, kuko mutumye Farawo n’abantu biwe batwanka urunuka, mukabaha inkota yo kutwica.

²²Mose asubira k’Uhoraho, aramubaza, ati Mwami, n’iki gitumye ugirira nabi ubu bgoko? kandi n’iki catumye untuma?

²³Kuk’ uhereye aho nashikiye kwa Farawo, nkamubarira mw izina ryawe, yaciye agirira nabi ubu bgoko: nawe nta co watabaye abantu bawe na gatoya.