Read Bibliya Yera 1951 Kuvayo 8 Bible Online

Kuvayo 8 - Bibliya Yera 1951 bible

Kuvayo 8

¹Uhoraho abarira Mose, ati Ja kwa Farawo, umubarire, ut’ Uku ni k’Uhoraho agize, ngo Reka abantu biwe bagende, bamusabe.

²Ngo Na ho ni wanka kubarekura, igihugu cawe arakigomorera ibikere iyo kiva kikagera:

³uruzi ruruzura ibikere, bidūge bije mu nzu yawe no haruguru, no ku buriri bgawe, no mu nzu z’abanyarugo bawe no mu z’abantu bawe, no mu dutanure twawe two kwotsamw’ imitsima, no mu mato yawe yo gucumba;

⁴ibikere bizodūga binyagare kuri wewe no ku bantu bawe no ku banyarugo bawe bose.

⁵Uhoraho abarira Mose, ati Barira Aroni, uti Ramvura ukuboko kwawe gufise ya nkoni yawe hejuru y’inzūzi no ku migende y’ amazi no ku bidengeri, udūze ibikere bije mu gihugu ca Egiputa.

⁶Aroni aramvura ukuboko kwiwe hejuru y’amazi ya Egiputa; ibikere biradūga, bizimanganya igihugu ca Egiputa.

⁷Na ba banyamarēba babigira bartyo babikoresheje amarēba yabo, badūza ibikere, bija mu gihugu ca Egiputa.

⁸Farawo aca ahamagaza Mose na Aroni, arababgira, ati Ni munyingingire Uhoraho, ankize ibi bikere, abikūre no mu bantu banje, nanje mpeze ndekure abantu biwe bagende, baje gushikanira Uhoraho ibimazi.

⁹Mose yishura Farawo, ati Pfa kunsigūrira gusa, umbarire igihe nogusabira, mwe n’ abanyarugo bawe n’abantu bawe, kw ibikere vyotikizwa bikakuvako, bikava no mu ngoro zawe, bigasigara mu ruzi honyene.

¹⁰Aramwishura, ati Hoba ejo. Na we aramubarira, ati Bizoba uk’ uvuze, kugira ng’ umenye yukw ata wuhwanye n’Uhoraho Imana yacu.

¹¹Ibikere bizokuvako, bive no mu ngoro zawe, no ku banyarugo bawe, no ku bantu bawe, bisigare mu ruzi honyene.

¹²Nuko Mose na Aroni barasohoka, bava imbere ya Farawo; Mose atakambira Uhoraho kubg’ ivyo bikere yagomoreye Farawo.

¹³Uhoraho abigira nk’uko Mose yavuze; vya bikere bipfira mu mazu no mu ngo no mu mirima, biraherengetera.

¹⁴Babirunda ibirundo, igihugu kiranuka.

¹⁵Maze Farawo abonye ko habaye impore, yikomantaza umutima, ntiyabumvira, nk’uk’ Uhoraho yari yaravuze.

¹⁶Uhoraho abarira Mose, ati Bgira Aroni, uti Manika inkoni yawe, ukubite umukungugu wo hasi, uhinduke imibu mu gihugu cose ca Egiputa.

¹⁷Babigira bartyo; Aroni amanika ukuboko kwiwe gufashe ya nkoni, akubita umukungugu wo hasi, imibu iba ku bantu no ku bitungwa; umukungugu wose wo mu gihugu cose ca Egiputa uhinduka imibu.

¹⁸Abanyamarēba bakoresha amarēba yabo ngo barekure imibu, ntibabishobora; nukw imibu iba ku bantu no ku bitungwa.

¹⁹Maz’ abo banyamarēba babarira Farawo, bat’ Ibi bitewe n’ urutoke rw’Imana. Arik’ umutima wa Farawo urakomantara, ntiyumvira Mose na Aroni, nk’ uk’ Uhoraho yari yaravuze.

²⁰Uhoraho abarira Mose, at’ Uz’ uzinduke kwa Farawo mu gaturuturu, uhagarare imbere yiwe; eh’ azoba yīkoze aja ku ruzi; umubarire, ut’ Uhoraho agize ngo Reka abantu biwe bagende, bamusabe.

²¹Na ho n’utabarekura, ngw azogutēza amasinzi y’ibibugu, bibe kuri wewe no ku banyarugo bawe no ku bantu bawe no mu ngoro zawe: amazu y’ Abanyegiputa azokwuzura amasinzi y’ibibugu, bizimanganye no hasi aho bahagaze.

²²Kur’ uwo musi ngw azorobanura igihugu c’i Gosheni, ah’ abantu biwe baba, ayo masinzi y’ibibugu ngo ntabeyo; kugira ng’umenye yukw ar’ Uhoraho ari hagati mur’ iki gihugu.

²³Kandi ngw azoshira itandukaniro hagati y’abantu biwe n’abawe: ejo ni h’ico kimenyetso kizobaho.

²⁴Uhoraho abigira artyo: amasinzi y’ibibugu aza ar’ icago mu ngoro ya Farawo no mu nzu z’abanyarugo biwe; kand’ igihugu cose ca Egiputa cononekara kubg’ ayo masinzi y’ibibugu.

²⁵Farawo ahamagaza Mose na Aroni, ati Ni mugende, mushikanire Imana yanyu ibimazi ngaha mur’ iki gihugu.

²⁶Mose aramwishura, ati Ntibibereye ko twokora durtyo, kuko twoba dushikaniye Uhoraho Imana yacu ivyitwa umuziro ku Banyegiputa; mbeg’ ivyo Abanyegiputa bīta umuziro twobishikana babona, ntibotwicisha amabuye?

²⁷Dukwiye kugenda urugendo rw’imisi itatu tuje mu bugaragwa, tubone gushikanira Uhoraho Imana yacu, nk’ ukw izotubarira.

²⁸Farawo aramwishura, ati Ndabaretse mugende, kugira ngo mushikanire Uhoraho Imana yanyu ibimazi mu bugaragwa: mugabo ntimuje kure cane; kandi munsabire.

²⁹Mose aramwishura, at’ Ehe ndagiye; ndasaba Uhoraho, ejo az’ akūre ayo masinzi y’ibibugu kuri wewe, mwe n’abanyarugo bawe n’ abantu bawe. Ariko Nyaguhora ku ngoma, woye kwongera kuduhenda, ngo wanke kurekura abantu ngo bagende bashikanire Uhoraho ibimazi.

³⁰Mose arasohoka, ava imbere ya Farawo, atakambira Uhoraho.

³¹Uhoraho abigira nk’ uko Mose yavuze; akūra ayo masinzi y’ibibugu kuri Farawo, no ku banyarugo biwe no ku bantu biwe: ntihasigara na kimwe.

³²Ariko Farawo asubira kwikomantaza umutima ico gihe na co, ntiyarekura ubgo bgoko ngo bugende.