Read Bibliya Yera 1951 Yobu 1 Bible Online

Yobu 1 - Bibliya Yera 1951 bible

Yobu 1

¹Mu gihugu c’i Uzi hār’ umuntu yitwa Yobu; kand’ uwo muntu yar’ umuntu atunganye w’umugororotsi, yubaha Imana, akitandukanya n’ikibi.

²Yar’ afise abahungu ndwi n’abakobga batatu.

³Itunga ryiwe ryar’ intama ibihumbi ndwi, n’ingamiya ibihumbi bitatu, n’inka igihumbi zirima, n’indogoba zivyara amajana atanu, n’abahinda mu rugo benshi cane; nuk’ uwo muntu yar’ ūhambaye gusumba abantu bose b’i burasirazuba.

⁴Kand’ abahungu biwe bāhora barondera amazimano mu nzu y’ umuntu wese muri bo ku musi ashinze, bagatumira bashiki babo ukw ari batatu ngo baze gusangira na bo.

⁵Nuk’ ukw imisi y’amazimano yabo yahera, Yobu yabatumako ngw abeze, akavyuka kare mu gatondo, agatanga ibimazi vyoswa bihwanye n’igitigiri ca bose: kuko Yobu yavuga, ati Kumbure abahungu banje bācumuye, barogota ku Mana mu mitima yabo. Uko ni ko Yobu yahora agenza ubudasiba.

⁶Umusi ur’ izina abana b’Imana baje bashengereye Uhoraho, kandi na Satani yazananye na bo.

⁷Uhoraho abaza Satani, at’ Uvuye hehe? Satani yishura Uhoraho, ati Mvuye gukwiragira mw isi no kuyigendagendamwo.

⁸Uhoraho abaza Satani, ati Mbega witegereje umusavyi wanje Yobu, yukw ata wuhwanye na we mw isi, ar’ umuntu atunganye w’umugororotsi, anyubaha, akitandukanya n’ikibi?

⁹Maze Satani yishura Uhoraho, ati Mbeg’ ugira ngo Yobu yubahira Imana ubusa?

¹⁰Ntiwamuzitiriye uruzitiro rumukikije, bo n’inzu yiwe, n’ivy’ atunze vyose? Wahezagiye igikorwa c’amaboko yiwe, kand’ itunga ryiwe ryagwiriye mu gihugu.

¹¹Ariko pfa gutuma ukuboko kwawe, wubike ivy’ afise vyose, urābe kw atazokurogotako imbonankubone.

¹²Uhoraho yishura Satani, at’ Eh’ ivy’ afise vyose biri mu kuboko kwawe; ariko we ku mutumba wiwe ntuz’ umukoreko. Nuko Satani aca arasohoka, ava imbere y’Uhoraho.

¹³Maz’ umusi ur’ izina, abahungu n’abakobga ba Yobu bāriko barasangira, banywera vino mu nzu ya mukuru wabo,

¹⁴haza imbitsi kuri Yobu, it’ Inka zariko zirarima, n’indogoba zarisha i ruhande yazo;

¹⁵maz’ Abasabeya barazinyaze, barazitwaye: mbere n’abungere babaririkishije inkota; ni jewe jenyene ndokotse wo kuza kubikubikira.

¹⁶Akibivuga, haza uwundi na we, at’ Umuriro w’Imana watibutse uva mw ijuru, uyigiza intama n’abungere, urabimara; ni jewe jenyene ndokotse wo kuza kubikubikira.

¹⁷Akibivuga, haza uwundi na we, at’ Abakaludaya bigize imice itatu, banyaze ingamiya, barazitwaye: mbere n’abungere babaririkishije inkota; ni jewe jenyene ndokotse wo kuza kubikubikira.

¹⁸Akibivuga, haza uwundi na we, at’ Abahungu bawe n’abakobga bawe bāriko barasangira banywera vino mu nzu ya mukuru wabo,

¹⁹nuko haza umuyaga w’ igihuhuta uturutse mu bugaragwa, uhitana imfuruka zine z’inzu; maz’ isidukira kur’ abo bahungu, barapfa; ni jewe jenyene ndokotse wo kuza kubikubikira.

²⁰Maze Yobu ava hasi, yitantamurirak’ umutamana wiwe yimosha inkomvorera, yikubita hasi, arasenga,

²¹ati Navuye mu nda ya mama nambaye ubusa, kandi nzosubira mu nda y’isi ata co nambaye. Uhoraho ni we yagavye, kand’ Uhoraho ni we agaburuje: izina ry’Uhoraho ni rishemagizwe.

²²Mur’ ivyo vyose Yobu ntiyakoze icaha, canke ngw aherereze amafuti ku Mana.