Read Bibliya Yera 1951 Yobu 16 Bible Online

Yobu 16 - Bibliya Yera 1951 bible

Yobu 16

¹Maze Yobu arishura,

²ati Numvise vyinshi ben’ ivyo: Mwese mur’ abagandazi bagorana.

³Mbeg’ amagambo atwarwa n’umuyaga ntazogira iherezo? Ikigutera kwishura n’iki?

⁴Erega nanje noshoboye kuvuga nkamwe, Iyaba ari mwebge mwari mumeze nkanje, Nanje noshoboye gukoranya amagambo yo kubanegura, Nkabazunguriza umutwe.

⁵Nanje nobaremeshesha akanwa kanje, Kwirura kwo gupfa kubomboranya iminwa yanje kwoborohereza.

⁶Yamara n’iyo ngize ico mvuga, umubabaro wanje ntiworoherwa; Canke niyumanganije, ntugabanuka.

⁷Ariko noneh’ irambutamitse, Yagesheje abanje bose.

⁸Yaransūmiye, bihinduka ibinyagiriza: Kunanuka kwanje kwankūriye hasi, kuranyagiriza imbonankubone.

⁹Yantabaguranye uburake bgayo impōye ubusa; Yandyanirije insya z’amenyo; Īndwanya intungiriye igitsure.

¹⁰Baranyasamiye n’akanwa kabo, Bankoze kw itama bantuka; Bankoraniyeko.

¹¹Imana yangabuye mu batayubaha; Intereye mu maboko y’inkozi z’ibibi.

¹²Nari nibereye mu mahoro, maz’ iramvunagura; Mbere yansūmiye kw izosi, irankenyagura: Kand’ inshinga nk’uruti rw’ icumu.

¹³Abarashi bayo bantanze irya n’ino, Intobekeranije mu mafyigo ata kagongwe; Ishēshe amara yanje hasi.

¹⁴Yiyongeranya kunca ibihengeri, Insūmiye imeze nk’ikigatanya.

¹⁵Nibaririyekw amagunira ku mubiri wanje; Ihembe ryanje narishiburiye mu mukungugu.

¹⁶Amaso yanje akobowe no kurira, Kand’ igitūtu c’urupfu cubikije ku bigohe vyanje;

¹⁷Nah’ ata muryano wari mu maboko yanje, Kand’ ugusenga kwanje kukaba kwari gutunganye.

¹⁸Wa si we, ntutwikire amaraso yanje, Gutakamba kwanje ntikugire aho guhengeshanya.

¹⁹Rāba n’ubu Icabona canje kiri mw ijuru, Ūnyineze ar’ iyo hejuru.

²⁰Abakunzi banje barankēngēra, Arikw ijisho ryanje risuka amosozi imbere y’Imana,

²¹Kugira ngo habeh’ uwitsa ivy’ umuntu ku Mana, Nk’uk’ umuntu avugira mugenzi we!

²²Kukw imyaka mike ni yashira, Nzojana inzira ntazogarukamw’ ukundi.