Read Bibliya Yera 1951 Yobu 17 Bible Online

Yobu 17 - Bibliya Yera 1951 bible

Yobu 17

¹Ubugingo bganje buraheze, Imisi yanje irashize, Imva iranyiteze.

²Ereg’ abacokoranyi barankikije, Ijisho ryanje nta kindi ribona atar’ akavyongo kabo.

³Enda se tanga ingwati, unyishinge wewe ubgawe: Uwundi twokorana mu ntoke duhānye isezerano yoba nde?

⁴Kuko wahishije ubgenge imitima yabo: Ni co gituma utazobashira hejuru.

⁵Umuntu ashengerera bagenzi biwe ngo banyagwe, Amaso y’abana biwe azokoboka.

⁶Ariko yangize iciro ry’imigani mu bantu, Mpindutse uwo gucirwa mu maso.

⁷Ijisho ryanje rikabiranijwe n’ intuntu, N’ingingo zanje zose zimeze nk’igitūtu.

⁸Ivyo bizotuma abatunganye bumirwa, N’umuntu atagira igicumuro ngw avuduke arwanye ūtubaha Imana.

⁹Arik’ umugororotsi azokomerera mu nzira yiwe, N’ūfise amaboko yiziguye azokwama yunguka inkomezi.

¹⁰Ariko mweho ni mushireko muje imbere mwese, Na ho nyene nta munyabgenge n’umwe nobona muri mwebge.

¹¹Imisi yanje iraheze, imigabo yanje ipfuye umuhimba, Iyo nari mfise mu mutima wanje.

¹²Ijoro baryita umurango, Bat’ Umuco uraje; kandi hakir’ umwiza.

¹³Ko nziga i kuzimu kw ari ho i wanje, Nkaba nshashe uburiri bganje mu mwiza,

¹⁴Nkaba mbariye rwa rwobo, nti Ni wewe data, Nkabarira n’inyo, nti Ni wewe mama, kand’ ukaba na mushikanje;

¹⁵Non’ ivyizigiro vyanje biri hehe? Kand’ ivyo vyizigiro vyanje ni nde azoruha abibona?

¹⁶Bizomanuka bishike ku bihindizo vy’i kuzimu, Igihe nzoronka uburuhukiro mu mukungugu.