Read Bibliya Yera 1951 Yobu 18 Bible Online

Yobu 18 - Bibliya Yera 1951 bible

Yobu 18

¹Maze Biludadi w’i Shuhi arishura,

²ati Muzogeza ryari kurondera amajambo? Ni mwiyumvire, hanyuma tubone kuvuga.

³N’iki gituma tugereranywa n’ibikōko, Tugahinduka nk’abatagira ubgenge mu maso yanyu?

⁴Wewe witabagurana uburake bgawe, Mbeg’ isi yohebga kubgawe? Cank’ igitandara cokūrwaho kubgawe?

⁵N’ukuri urumuri rw’umunyakibi ruzozima, Kand’ urubeya rw’umuriro wiwe ntiruzokwaka.

⁶Umuco uzocura umwiza mu nzu yiwe, N’itara rimanitse hejuru yiwe rizozima.

⁷Intambuko ziwe z’inkomezi zizopfunywa, Imigabo yiwe ubgiwe ni yo izomutsinda hasi.

⁸Ereg’ ivyiwe birenge ni vyo bimutsinda mu ruriba, Agaca ku gitsiburira.

⁹Ikigāmo[4] kizomufata igitsintsiri, Umutego uzomucakira.

¹⁰Impururu yo kumufata ihishijwe mw ivu, Umushibuka umutegeye mu nzira.

¹¹Azoterwa ubgoba n’ibimukanga irya n’ino, Bizomukinagiza vyōmye ku bitsintsiri vyiwe.

¹²Inkomezi ziwe zizomarwa n’ inzara, Kand’ ivyago bizoba bibunze i ruhande yiwe.

¹³Ingingo z’umubiri wiwe zizotsontsomerwa, Mber’ imfura y’urupfu izozitsontsomera.

¹⁴Azorandurwa mu rugo rwiwe yishimira, Azokwegerwa imbere y’ umwami w’ibiteye ubgoba.

¹⁵Abatar’ abiwe bazokwinjira urugo rwiwe; Amazuku azosukwa ahantu yahora aba.

¹⁶Imizi yiwe izokwumira hasi, N’ishami ryiwe rizokabiranira hejuru.

¹⁷Kwibukwa kwiwe kuzozimangana mw isi, Kand’ izina ryiwe ntirizokwongera kuvugwa mu nzira.

¹⁸Azokwirukanwa ave mu muco, aje mu mwiza; Mber’ azocibga mw isi.

¹⁹Ntazogira umuhungu cank’ umwuzukuru mu bgoko bgiwe, Cank’ ūzosigara aho yahora.

²⁰Abazoza inyuma yiwe bazotangarira umusi wiwe, Nk’ukw abāmwitangiye imbere bātewe n’ubgoba.

²¹N’ukuri aho ni ho i wabo w’ūgabitanya, Kand’ aho ni ho hantu h’ ūtazi Imana.