Read Bibliya Yera 1951 Yobu 19 Bible Online

Yobu 19 - Bibliya Yera 1951 bible

Yobu 19

¹Maze Yobu arishura,

²ati Muzogeza hehe kubabaza umutima wanje, Mukamvunaguza amagambo yanyu?

³Ubu n’ubugira icumi munshinyagurira; Nta n’agasoni mugira ko kungirira nabi.

⁴Namba naracumuye koko, Igicumuro canje ni jewe kiriko.

⁵Namba mugomba kunyiratako, No kunyagiririsha ivyago vyanje mubindemēka,

⁶Mumenye yukw ar’ Imana yubitse urubanza rwanje, Ikanta hagati mu mutego.

⁷Rāba, ntakishwa n’umuryano, ariko sinumvirwa; Ndatabaza, sincirwe urubereye.

⁸Inzira yanje yarayishibije ngo sinshobore kuhaca; Kandi yakwiragije umwiza mu nzira zanje.

⁹Yanyaze icubahiro canje, Inyambura n’igitsibo co mu mutwe wanje.

¹⁰Yansanganguye impande zose, ndapfuye; Kand’ ivyizigiro vyanje yabiranduye nk’igiti.

¹¹Yandometseko n’uburake bgayo, Imparūra mu barwanizi bayo.

¹²Ingabo zayo zaziye icarimwe, zitegura inzira yo kuntera, Zisagaza irya n’ino y’urugo rwanje.

¹³Yantandukanije n’abo tuvukana, Kandi n’abo twari tuzinanyi baranyihakanye.

¹⁴Ab’i wacu bantaye, N’abakunzi banje pfampfe banyibagiye.

¹⁵Ababa mu rugo rwanje, n’ incoreke zanje, bangize nk’ umushitsi: Mbaye nk’umunyamahanga mu maso yabo.

¹⁶Mpamagara umushumba wanje, ntaruha anyitaba, Naho nomukomera ibobo.

¹⁷Umugore wanje azinutswe ubgaku bganje, Nteye ishishi bene mama.

¹⁸Mbere n’abana bato barankēngēra; Iyo mvuye hasi bamvuga nabi.

¹⁹Abajanama banje baranzinutswe bose, N’abo nakunda bahindukiye kundwanya.

²⁰Amagufa yanje amatanye n’ urukoba n’inyama: Nshigaje gatoya ngapfa.

²¹Mungirire akagongwe, mungirire akagongwe, yemwe bakunzi banje, Kuk’ ukuboko kw’ Uhoraho kwankozeko.

²²N’iki kibatera kundendereza nk’ukw Imana ingize? Uk’umubiri wanje wabaye ntikubahāgije?

²³Icompa amajambo yanje akaba yanditswe! Icompa akaba yanditswe mu gitabo!

²⁴Icompa akaba akorogoshowe mu gitandara N’ikaramu y’icuma, n’icuma c’isāsu, akazohoraho!

²⁵Ariko jewe ubganje nzi yuk’ Umucunguzi wanje ariho, Kandi ko kw iherezo azohagarara kw isi:

²⁶Kand’ urukoba rwanje ni rwamara kubora, Nzobona Imana mfise umubiri.

²⁷Nzoyībonera ubganje, Amaso yanje azoyitegereza, nta wundi nzorāba. Umushaha wanje udendebuwe n’inkumbu.

²⁸Ko muvuga muti Ngo tumutemvye: Mut’ Inyanduruko y’ivyiwe imubonetseko!

²⁹Ni mutinye inkota: Kuk’ uburake bgihamagarira inkota, Kandi mumenye yuk’ urubanza ruzocibga.