Read Bibliya Yera 1951 Yobu 2 Bible Online

Yobu 2 - Bibliya Yera 1951 bible

Yobu 2

¹Uwundi musi abana b’Imana baje bashengereye Uhoraho, na Satani azanana na bo gushengerera Uhoraho.

²Uhoraho abaza Satani, at’ Uvuye hehe? Satani yishura Uhoraho, ati Mvuye gukwiragira mw isi no kuyigendagendamwo.

³Uhoraho abaza Satani, ati Mbega witegereje umusavyi wanje Yobu, yukw ata wuhwanye na we mw isi, ar’ umuntu atunganye w’umugororotsi, anyubaha, akitandukanya n’ikibi? Erega yakomeje ukugororoka kwiwe gushitsa n’ubu, naho wanteye kumugeseza ata co ndamuhōye.

⁴Maze Satani yishura Uhoraho, at’ Amagara akābga ayandi! Mber’ ivy’ umuntu atunze vyose yobitanga ku magara yiwe.

⁵Ariko pfa gutuma ukuboko kwawe, utere amagufa yiwe n’umubiri wiwe, urābe kw atazokurogotako imbonankubone.

⁶Uhoraho yishura Satani, at’ Eh’ ari mu kuboko kwawe; kimwe gusa, uzigurize ubugingo bgiwe.

⁷Nuko Satani aca arasohoka, ava imbere y’Uhoraho, atēza Yobu ibihute bikomeye uhēreye mu bgōro bg’ikirenge ugashitsa mu gitwariro.

⁸Nuko yābīra urujo rwo kwiyagarisha; araheza yicara ku gikuburiro c’umunyota.

⁹Maz’ umugore wiwe aramubaza, ati Mbega n’ubu uracakomeje kwa kugororoka kwawe? Tuka Imana, upfe uveho.

¹⁰Arikw aramwishura, at’ Uvuze nk’umwe wo mu bagore b’ibipfapfa. Mbega none twohabga ivyiza bisa mu biganza vy’Imana, tukanka kwākīra n’ibibi na vyo? Mur’ ivyo vyose Yobu ntiyakoresheje icaha akanwa kiwe.

¹¹Nukw abakunzi ba Yobu batatu bumvise ivyo vyago vyose vyamuteye, baraza, umuntu wese muri bo ava i we: Elifazi w’i Temani, na Biludadi w’i Shuhi, na Zofari w’i Nayama; baragana indagano kuja kumugarukirako no kumugandaza.

¹²Bunamuye amaso bakiri kure ntibaruha bamumenya, baca baraturika bararira; umuntu wese muri bo yitantamurirak’ umutamana wiwe, basūrira umukungugu hejuru y’ imitwe yabo.

¹³Maze bicarana na we hasi, bamara imisi ndwi ku murango no mw ijoro; ntihāgira ūmubgira ijambo, kubgo kubona umubabaro wiwe kw ari mwinshi cane.